“Wok Ya Blong Masta Blong Yumi i No Blong Nating”
1 !Hemia wan tok we i leftemap tingting! Wok we yu mekem i go long Jeova i no blong nating. (1 Kor. 15:58) Long defren fasin, tingbaot olsem wanem ol man oli spenem plante taem mo oli traehad blong gat wan gudfala nem, mo blong mekem se oli kasem plante moa mane. Maet oli traem blong spenem plante yia blong kasem wan bigfala edukesen no oli wok olsem slef blong winim plante samting long saed blong bodi. Be from we “ol taem mo ol samting we man i no save long hem,” i mekem se oli neva kasem hae nem ya we oli stap traehad blong kasem, no maet from sam risen we oli no jusum, oli mas laef wetem smol samting nomo. Ol traehad blong olgeta i blong nating nomo i olsem we oli stap “resis olbaot nomo.” (Pri. 1:14; 9:11) Taswe i impoten se yumi gat plante samting blong mekem long wok ya. !Wok ya i no blong nating from we hem i impoten blong olwe!
2 Wok Ya We i Rili Gat Mining: Talemaot gud nius blong Kingdom blong God i wan wok we i moa impoten bitim ol narafala wok long wol. Hem i wan wok we yumi mas mekem nating se ol man oli wantem lesin no nogat. Yumi wantem talem sem tok olsem we Pol i talem se: “Mi mi talemaot naoia long fes blong God, se sipos wan long yufala i lus, be i no fol blong mi, from we mi mi no haedem wan samting long yufala, mi talemaot finis long yufala, olgeta samting we God i wantem.”—Wok 20:26, 27.
3 !Yumi glad tumas taem ol man oli lesin long mesej blong Kingdom! Wan yangfala woman i lusum anti blong hem we i ded. Hem i stap tingting se weples nao anti blong hem i go long hem—?long heven no long hel? Hem i prea long God blong kasem help, hem i yusum nem blong Jeova olsem we sista blong hem i bin tijim hem blong mekem. Smol taem biaen hem i stat stadi Baebol mo i stap go long ol Kristin miting. Fasin blong laef blong hem i jenis bigwan mo hem i no moa joenem ol grup blong ol yangfala we oli stap mekem trabol long taon. Yangfala woman ya i lego smok, ol drag we hem i stap tekem, mo fasin blong stil. Hem i talemaot se: “Lav we mi gat long Jeova, samting ya nomo i mekem we mi livim wan rabis rod blong laef olsem. Jeova nomo we i gat bigfala sore i save givim hop ya long mi, blong laef we i no save finis.” Hem i no moa spenem laef blong hem blong ronem ol samting we i blong nating nomo.
4 Nomata se ol man oli no wantem lesin, be yumi stap mekem wan impoten wok yet. Oli save se ol Witnes blong Jeova oli bin visitim olgeta. Fasin we yu gat blong holem strong, stap tru, mo lav long wok ya oli kam moa klia. ?Taswe hadwok we yu mekem long wok blong Masta i blong nating nomo? !Nogat!