Gohed Blong Putum Kingdom Long Fasples
1 I no isi blong putum mo holem Kingdom blong God long fasples long laef taem yumi kasem trabol long saed blong mane, no sam narafala trabol olsem. ?Olsem wanem yumi save gohed blong putum Kingdom long fasples taem i gat ol trabol? ?Olsem wanem sipos yumi kasem wan wok we i mekem yumi mestem ol miting, no we i blokem yumi blong prij? ?Long taem olsem i oraet blong putum Kingdom long seken ples long laef?
2 Yu Mas Gat Strong Bilif: Taem bilif blong yumi i kasem traem olsem, yumi no mas fogetem promes blong Jeova, mo toktok blong Jisas tu, we i talem se bambae yumi kasem help blong God sipos yumi putum Kingdom long fasples. (Sam 37:25; Mat. 6:31-34) Ol samting blong wol oli save pulum yumi no givim hadtaem long yumi, mekem se tingting blong yumi i fasfas, nao yumi no moa gohed blong putum Kingdom long fasples. Sam man oli letem sam samting olsem janis blong kasem haenem long wok, no blong winim plante mane, i kam olsem stamba samting long laef blong olgeta. Be, olsem Pol, yumi mas skelem gud wanem i rili impoten long laef.—Fil. 3:7, 8.
3 ?Yu Nidim Blong Jenisim Sam Samting?: Wan pablisa i talem se: “Tingting blong mi i stap oltaem long wok blong mi—hemia samting we mi laekem moa i winim ol narafala samting. Mi ting se mi save stap olsem wan Witnes, mo long semtaem mi save yusum bighaf long taem blong mi blong lukaot long bisnes blong mi.” Be, hem i stap tingbaot oltaem se hem i save mekem moa long wok blong Jeova. Ale, biaen hem i lego wok blong hem, we i bin blokem hem blong gohed long saed blong spirit. Taem hem i joen fulwan long wok blong Kingdom, hem i talem se: “Naoia, mi harem se laef blong mi i kam gud long ae blong Jeova, hemia nao samting we i rili impoten.”
4 I gud tumas we plante brata sista oli bin lego wok blong olgeta mo janis blong kasem moa mane, nao oli mekem laef blong olgeta i no fasfas, mo oli joen long wok blong prij fultaem. Ol yangfala man blong givhan mo elda we oli no mared yet, oli bin mekem olsem taem oli go long Ministeriol Trening Skul, mo oli stap haremgud long ol nambawan janis blong wok long saed blong Kingdom. Oli stap folem gudfala eksampol blong Pol, taem oli stap glad nomo long wanem samting we oli gat long laef.—1 Kor. 11:1; 1 Tim. 6:6-8; Hib. 13:5.
5 Maet ol man long wol oli jikim tingting blong yumi long saed blong laef, be yumi stap kasem blesing blong Jeova. (1 Kor. 1:26-31) I leftemap tingting blong yumi blong save se Jeova i rere blong yusum yumi fulwan mo bambae i givhan long yumi blong mekem wok blong hem. Bambae i neva gat wan taem bakegen we yumi gat janis olsem naoia blong talemaot Kingdom blong God we i stanap finis. Taswe, naoia i stret taem blong gohed blong putum Kingdom long fasples long laef.