fogivim hem mo taem hem i joen wetem gudfala kampani blong ol brata mo sista. Samting ya i mekem se hem i kam strong long saed blong spirit. Yes, tru long sakrefaes blong Kraes, man we i tanem tingting from sin blong hem bambae i luksave se “gladhat blong God i bigwan tumas.”​—Efesas 1:7.

‘Tingting We i Klin’ Mo ‘Hat We i Niuwan’

Afta we Deved i talemaot sin blong hem, hem i no holem tingting ya se hem i nating nomo. Ol tok we hem i raetem long buk blong Ol Sam, oli soem se hem i harem gud taem hem i talemaot ol sin blong hem, mo hem i gat strong tingting blong gohed long wok blong God. Tingbaot wan eksampol long Ol Sam 32. Vas 1 i talem se: “Man we Hae God i fogivim hem, mo i tekemaot ol sin blong hem, hem i save harem gud.” Nating se sin blong man i bigwan olsem wanem, man ya i save haremgud sipos hem i rili tanem tingting from sin blong hem. Wan rod blong mekem olsem, hemia blong akseptem fulwan se hem i mekem i rong, olsem we Deved i mekem. (2 Samuel 12:13) Hem i no traem blong mekem eskius long fored blong Jeova mo hem i no blemem narafala. Vas 5 i talem se: “‘Bambae mi talemaot sin blong mi long Hae God.’ Nao mi talemaot ol sin blong mi long yu, mi no moa haedem ol samting nogud we mi mi mekem. Nao yu yu fogivim mi, yu tekemaot ol sin blong mi.” Taem man i talemaot ol sin blong hem, hem i save haremgud. Tingting blong hem i no moa stikim hem from ol rong we hem i bin mekem.

Afta we Deved i askem Jeova blong fogivim hem, hem i talem se: “God, plis yu mekem tingting blong mi i klin olgeta. Plis yu mekem we hat blong mi i kam niuwan bakegen, mo i stap strong long yu oltaem.” (Ol Sam 51:10) Deved i askem long God blong givim long hem wan ‘hat we i niuwan’ mo wan ‘tingting we i klin.’ Samting ya i soemaot we Deved i save gud sin we i stap long hem, taswe hem i nidim we God i halpem hem blong klinim hat blong hem mo blong statem wan niufala laef. Deved i no sore tumas long hem wan, be hem i gat strong tingting blong gohed long wok blong God. Hem i prea se: “Masta, plis yu givhan long mi blong mi save tok, nao bambae mi presem yu.”​—Ol Sam 51:15.

?Jeova i mekem wanem taem Deved i soem se hem i rili tanem tingting from sin blong hem mo i wantem traehad blong mekem wok blong hem? Hem i mekem Deved i haremgud tumas taem hem i talem se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.” (Ol Sam 32:8) Long ples ya Jeova i

Wan Kwestin

?Sipos Jeova i rere blong fogivim sin blong man tru long sakrifaes blong Jisas, from wanem ol Kristin oli mas talemaot sin blong olgeta long ol elda blong kongregesen?

Yumi luk se Jeova i fogivim Deved from bigfala sin we hem i mekem wetem Batseba, from we Deved i soem se hem i rili sore from sin blong hem. Taem profet Natan i kam long Deved, Deved i talemaot se: “Mi mi bin mekem wan samting we i nogud olgeta, i agens long Jeova.”​—2 Samuel 12:​13, NW.

Be, afta we Jeova i akseptem sore blong man mo fogivim man we i talemaot sin blong hem, hem i go moa. Wetem lav, Jeova i mekem rod blong halpem man we i sin blong i gohed mo kam strong long saed blong spirit bakegen. Long saed blong Deved, hem i bin kasem help tru long profet Natan. Tede long Kristin kongregesen, i gat ol elda. Olgeta ya oli bigman long saed blong spirit. Disaepol Jemes i talem se: “?I gat wan long yufala we i sik? I gud hem i singaot ol elda blong [“kongregesen,” NW] blong oli kam luk hem. Nao olgeta oli save prea long hem, mo oli save kafsaedem oel i go long hem long nem blong [“Jeova,” NW]. Mo prea blong man we i bilif bambae i hilim sikman ya. Jeova bambae i mekem bodi blong hem i strong bakegen, mo sipos hem i bin mekem sam sin, [Jeova] bambae i fogivim hem from.”​—Jemes 5:​14, 15.

Ol elda we oli gat ekspiriens oli save givhan bigwan long man we i soemaot sore from sin blong