Ripot Long Wok Blong Kingdom
Jeova i Givim Ples Blong Spel Long Ol Man Blong Hem
WAN man we i taed tumas from we hem i wokbaot long wan smol rod antap long hil, i glad blong luk wan ples blong spel we sado i stap long hem. Long Nepal, oli kolem ol ples ya se chautara. Maet wan chautara i klosap long wan bigfala nambangga. Man i save sidaon mo spel aninit long sado blong hem. Kaen fasin i pulum ol man blong bildim ol chautara, mo bighaf blong ol man ya oli no wantem se yumi save nem blong olgeta.
Ol stori we oli kamaot long Nepal oli soemaot se Jeova i givim glad mo spel long saed blong spirit, long ol man we oli taed blong “wokbaot” long wol ya.—Ol Sam 23:2.
• Lil Kumari i laef long naesfala taon blong Pokhara. Hem i save luk ol Hil blong Himalaya, we sno i stap antap long olgeta. Be from we famle blong hem i gat smol mane nomo, Lil Kumari i wari tumas mo i ting se hem i no gat hop. Taem wan Witnes blong Jeova i go luk hem long haos blong hem, nambawan hop ya we Baebol i tokbaot i kasem hat blong hem mo wantaem nomo hem i askem witnes ya blong stadi Baebol wetem hem.
Nating se Lil Kumari i laekem tumas stadi blong hem, hem i faenem se i no isi blong gohed, from we famle blong hem i agensem hem bigwan. Be nating se i olsem, hem i no lego stadi. Hem i go oltaem long ol Kristin miting mo hem i traehad blong mekem samting we hem i lanem i wok long laef blong hem, antap moa, hem i ona long man blong hem. From samting ya, hasban blong hem mo mama blong hem, tufala i luksave se Baebol stadi blong Lil Kumari i givhan long fulwan famle.
Naoia hasban blong hem mo sam memba blong famle blong hem oli stadi long Tok blong God. I no longtaem i pas, Lil Kumari wetem 15 memba blong famle blong hem, oli glad blong stap mo lesin long program blong wan asembli long Pokhara. Hem i talem se: “Hom blong mi i olsem wan ples blong spel from we famle blong mi i joen gud tugeta long trufala wosip, mo mi faenem trufala pis long tingting.”
• Nating se loa blong Nepal i agensem fasin blong daonem man from posisen blong hem long komuniti, fasin ya i gat bigfala paoa yet long laef blong ol man long Nepal. From samting ya, plante man oli intres blong save wanem Baebol i talem long saed blong fasin blong mekem i sem mak long olgeta man. Taem Surya Maya i lanem se “God i stap mekem i sem mak nomo long olgeta man,” tijing ya i jenisim laef blong hem mo famle blong hem.—Ol Wok 10:34.
Fasin ya blong mekem i defren long ol man from posisen blong olgeta mo ol kastom blong longtaem finis, oli mekem Surya Maya i harem nogud mo i mekem laef blong hem i had tumas. From we Surya Maya i wan woman we i gat strong bilif, hem i prea plante yia finis long ol aedol we oli god blong hem blong oli givhan long hem. Be neva ol aedol ya oli ansarem prea blong hem. Wan dei hem i singaot strong long ol aedol ya blong halpem hem. Smol bubu gel blong hem, Babita, we i gat sikis yia nomo, i kam long hem mo i askem se: “?From wanem yu singaot i go long ol aedol we oli no save mekem wan samting nating blong givhan long yu?”
Mama blong Babita i stadi Baebol wetem wan Witnes blong Jeova. Babita i glad tumas blong askem bubu woman blong hem i kam long wan Kristin miting. Taem Surya Maya i kam long miting ya, hem i sapraes tumas blong luk se ol man we oli gat ol defren posisen oli glad blong joen tugeta mo i no gat wan i agensem narawan from posisen blong hem. Wantaem nomo hem i askem blong stadi Baebol. Nating se ol man raonabaot long hem oli agensem hem bigwan, hem i no letem fasin blong olgeta i mekem tingting blong hem i foldaon. Mo tu, nating se hem i no save rid gud mo raet gud, samting ya tu i no blokem hem blong gohed gud long saed blong spirit.
Eit yia i pas, mo long ol yia ya sikis memba blong famle blong hem oli kam Witnes blong Jeova. Hasban blong hem mo tri pikinini blong hem tu oli stap insaed long namba ya. Naoia Surya Maya i stap prij fultaem olsem wan paenia. Hem i glad tumas blong givhan long olgeta we laef blong olgeta i had tumas, blong oli faenem trufala ples blong spel we Jeova nomo i save givim.