“Wan Hapi Hasban We i Mared Long Wan Naesfala Woman”

SAMTAEM, sam man oli tok agensem ol Witnes blong Jeova se oli stap brekem mared. Be, plante gudfala mared, we wan nomo long tufala i Witnes blong Jeova, oli soemaot se ol tok ya oli giaman nomo. Sipos ol man mo woman oli mekem ol advaes blong Baebol i wok long famle laef blong olgeta, samting ya bambae i halpem olgeta blong gat wan hapi mared. Hemia wan leta we wan Franis niuspepa i prentem:

“Blong klosap 28 yia nao, mi wan hapi hasban we i mared long wan naesfala woman we i wan Witnes blong Jeova. Hem i tijimgud olgeta faef pikinini blong mi wetem fasin kea mo fulap lav, nating se tu long ol pikinini ya oli no blong hem. Tede mi bos long wan bigfala kampani we 45 man i wok long hem. Mi save talem stret se, sipos mi kasem ol gudfala frut long bisnes blong mi, hemia from woman blong mi nomo. Taswe, taem mi luk wan haf long niuspepa we i tokbaot se ol Witnes blong Jeova bambae oli karem trabol i kam long Lot-et-Garonne, mi tekem disisen blong givim wan pruf long yufala [se tok ya i no tru].”

Leta ya i talem tu se: “Oli no smok mo oli no stap drong. ?Samting ya bambae i karem trabol long yumi? Ol Kristin ya oli no agensem mo oli no fosem ol man blong obei long ol rul we oli stap folem. Mo tu, oli soem gudfala eksampel long plante haf blong laef. . . . Oli no joen long ol kruked bisnes no long fasin blong salem drag. Oli no mekem promes blong neva mared, mo mi save talem stret long yufala se oli no ol man we laef blong olgeta i narakaen. . . .

“Ating yufala i askem long mi se: ?From wanem nao yu yu no kam wan Witnes blong Jeova? From we i nidim wan strong bilif mo ol gudfala fasin blong kam wan trufala Kristin, mo i no isi blong faenem ol samting ya long medel blong ol man.”

?Yu Yu Wantem Wan Man Blong Kam Luk Yu?

Nating se yumi stap long wan wol we i trabol, yu save hapi from stret save blong Baebol long saed blong God, Kingdom blong Hem, mo stamba tingting we hem i gat long saed blong fiuja blong ol man. Sipos yu wantem kasem moa save no yu wantem wan man i kam luk yu blong mekem Baebol stadi wetem yu we yu no pem, plis raet long Association “Les Témoins de Jéhovah” B.P. 1741, 98810 Mont Dore, Nouvelle-Calédonie.