“Yufala i Mas Rere”

¹ Taem Jisas i talemaot ol nambawan profet tok long saed blong en blong rabis wol ya, hem i givim woning se yumi mas lukaot blong no tingting tumas long ol samting blong laef we oli no rili impoten. (Mat. 24:36-39; Luk 21:34, 35) Bigfala trabol ya we God bambae i mekem i kamaot long wol ya, i save kamaot enitaem nomo. Taswe i impoten tumas we yumi lesin long advaes ya blong Jisas se: “Oltaem yufala i mas rere, from we mi, mi Pikinini blong Man, bambae mi kamtru long taem we yufala i no tingbaot.” (Mat. 24:44) ?Wanem i save halpem yumi long saed ya?

² Faet Agensem Ol Wari Mo Samting We i Pulum Tingting: Wan samting we i save mekem yumi foldaon long saed blong spirit, hemia ol wari blong laef. Yumi mas lukaotgud long trap ya. (Luk 21:34) Long sam kantri, ol man oli pua, i no gat wok, mo laef i sas, mekem se ol man oli mas wokhad tumas blong kasem ol stamba samting we oli nidim blong laef. Long sam narafala kantri, i isi nomo long ol man blong kasem ol samting we oli wantem. Sipos tingting blong yumi i stap tumas long ol samting blong laef, denja i save kamaot se bambae yumi no moa tingbaot Kingdom. (Mat. 6:19-24, 31-33) Ol Kristin miting oli halpem yumi blong tingbaot Kingdom oltaem. ?Yu yu putum mak ya blong go long evri miting?​—Hib. 10:24, 25.

³ Wol blong tede i fulap long ol samting we oli save pulum tingting mo stilim taem we yumi mas yusum long wok blong Kingdom. Kompiuta i wan samting we i save kam olsem wan trap sipos man i spenem tumas taem blong lukluk long Intenet, ridim mo sanem ol E-mail, no pleplei ol gem long kompiuta. Man i save westem plante aoa blong wajem televisin no film long video kaset, no blong pleplei, ridim ol stori buk, mo plei spot. Sipos yumi spenem plante taem long ol samting ya, ale bambae yumi gat smol taem mo smol paoa nomo i stap blong mekem ol wok blong Kingdom. I tru se ol pleplei mo spel oli save mekem yumi harem gud smoltaem. Be yumi save harem gud blong olwe sipos yumi mekem Baebol stadi yumi wan mo wetem famle blong yumi. (1 Tim. 4:7, 8) ?Yu yu pemaot taem blong tingting dip long Tok blong God evri dei?​—Efes. 5:15-17.

⁴ !Yumi mas gat bigfala tangkiu se ogenaesesen blong Jeova i stanemap wan program blong tijim yumi long saed blong spirit! Program olsem i halpem yumi blong ‘gat paoa blong ronwe long olgeta trabol ya [we bambae oli kam], mo bambae yumi save stanap long fes blong Pikinini blong Man we yumi no sem.’ (Luk 21:36) I gud yumi yusum fulwan ol program ya long saed blong spirit. Ale from we yumi ‘stap rere,’ bilif we yumi soemaot bambae i mekem we ‘God i ona long yumi, i presem yumi, mo i leftemap nem blong yumi, long Dei ya we bambae Jisas Kraes i kamtru long hem.’​—1 Pita 1:7.

Presem Narafala From Traehad Blong Hem

¹ “?Mi mi no wan gudfala gel tede?” Smol gel ya i krae taem hem i talem tok ya long mama blong hem bifo we hem i slip. Mama blong hem i sek long kwestin ya. Hem i bin luk we smol gel ya i traehad blong mekem gudfala fasin long dei ya. Be hem i no talem wan tok nating blong presem smol gel blong hem. Yes, smol gel ya i krae from we hem i no kasem wan gudfala tok blong mekem hem i harem gud long traehad blong hem. Samting ya i mas mekem yumi, ol yangfala mo ol olfala tu, yumi tingbaot se yumi evriwan i nidim ol gudfala tok blong mekem yumi harem gud. ?Yu yu talem ol gudfala tok long olgeta we oli stap raonabaot long yu taem oli mekem wan gudfala samting?​—Prov. 25:11.

² Ol Kristin brata sista blong yumi oli mekem plante samting we i gud blong presem olgeta from. Ol elda, ol man blong givhan, mo ol paenia, oli wokhad long wok blong olgeta. (1 Tim. 4:10; 5:17) Ol Kristin papa mama oli traem bes blong olgeta blong tijim ol pikinini blong olgeta olsem we Jeova i wantem. (Efes. 6:4) Ol Kristin yangfala oli stap faet strong agensem “spirit we i kamaot long wol.” (1 Kor. 2:12; Efes. 2:1-3) Mo plante narafala Kristin oli gohed strong long wok blong Jeova nating se oli olfala, oli sik, no oli fesem sam narafala traem. (2 Kor. 12:7) Olgeta ya oli nidim we yumi talem ol gudfala tok blong leftemap tingting blong olgeta. ?Yu yu luk ol traehad we olgeta ya oli stap mekem mo yu presem olgeta from?

³ Talem Stret Long Man: Yumi glad taem ol brata we oli givim tok oli talem se kongregesen blong yumi i stap mekem gudfala wok. Be, yumi harem gud moa sipos narafala i kam stret long yumi blong talem sam gudfala tok long wok we yumi bin mekem. Tingbaot eksampol blong Pol long saed ya. Long leta we hem i raetem i go long ol man Rom, long japta 16, hem i talem stret nem blong olgeta man mo woman we oli bin mekem sam bigfala wok. Long olgeta ya i gat Fibi, Prisila mo Akwila, Trifaena mo Trifosa, mo Perisis. (Rom 16:1-4, 12) !Ol tok blong hem ating oli rili leftemap tingting blong ol gudfala brata mo sista ya we oli stap wokhad! Ol gudfala tok olsemia oli soem long ol brata mo sista blong yumi se yumi nidim olgeta, mo i mekem yumi kam klosap moa long yumi. ?Yu yu presem narafala from traehad blong hem i no longtaem, no ating yu no mekem samting ya longtaem lelebet?​—Efes. 4:29.

⁴ Talem Tok We i Kamaot Long Hat: Sipos ol tok blong yumi oli blong mekem i gud long narafala, ol tok ya oli mas tru. Ol man oli haremsave kwiktaem sipos ol tok blong yumi oli tru no oli blong ‘tok swit’ nomo. (Prov. 28:23) Sipos yumi trenem yumi blong luksave gudfala fasin no wok blong narafala, ale bambae yumi wantem talem gudfala tok long olgeta. I gud yumi no holembak ol gudfala tok we oli save mekem i gud long narafala, from we yumi save se ‘tok we man i talem long stret taem blong hem, hem i gud we i gud tumas.’​—Prov. 15:23, NW.