?Wanem i Mekem Ol Trufala Kristin Oli Joengud?

¹ ?Wanem i save mekem se bitim sikis milian man long 234 kantri oli joengud, nating se oli toktok 380 defren lanwis? Wan samting nomo, hemia se olgeta evriwan ya oli mekem wosip long Jeova God. (Maeka 2:12; 4:1-3) Ol Witnes blong Jeova oli soemaot klia se ol trufala Kristin tede oli save joengud. Yumi olsem “wan kampani nomo,” we i gat ‘wan man nomo blong lukaot long yumi,’ mo yumi gat strong tingting blong no folem fasin blong ol man blong wol we oli no save joengud.​—Jon 10:16; Efes. 2:2.

² Tingting blong God we i mas kamtru, hemia se olgeta enjel mo man bambae oli joengud blong mekem wosip long trufala God. (Rev. 5:13) Jisas i save se fasin joengud i impoten tumas, taswe hem i tokbaot samting ya long prea blong hem. (Jon 17:20, 21) ?Olsem wanem yumi wanwan i save givhan blong mekem se Kristin kongregesen i joengud?

³ ?Olsem Wanem Blong Joengud?: Sipos i no gat Tok blong God mo spirit blong Hem, ol Kristin oli no save joengud. Taem yumi traehad blong folem ol samting we yumi ridim long Baebol, spirit blong God i gat paoa long laef blong yumi. Nao spirit ya “i stap mekem yumi evriwan i joen gud, mo hem i givim pis long yumi.” (Efes. 4:3) Spirit ya i pulum yumi blong lavlavem yumi. (Kol. 3:13, 14; 1 Pita 4:8) ?Yu yu stap tingting dip long Tok blong God evri dei? Samting ya i save givhan long yu blong joengud wetem ol narafala.

⁴ Wok blong prij mo mekem disaepol, hem tu i mekem yumi joengud. Taem yumi prij wetem ol narafala Kristin, yumi “stap wok olsem wan tim nomo, blong traehad blong mekem ol man oli bilif long gud nius.” Olsem nao, yumi evriwan i wok tugeta “blong talemaot God we i stamba blong trutok.” (Fil. 1:27; 3 Jon 8) Long rod ya, lav we i joenemgud yumi long kongregesen, i kam strong moa. I gud sipos long wik ya, yu singaot wan brata no sista we yutufala i no prij tugeta longtaem, blong hem i joen wetem yu long wok blong prij.

⁵ !I wan bigfala blesing blong joen wetem grup ya! !I no gat wan narafala grup long wol we ol man blong hem oli joengud olsem wan brata nomo! (1 Pita 5:9) I no longtaem i pas, plante taosen man oli lukluk fasin joengud ya long Intenasnal Asembli ya “Leftemap Nem Blong God.” I gud we wanwan long yumi i givhan blong mekem nambawan fasin ya blong joengud i kam strong moa. Yumi mekem olsem, taem yumi stretem ol trabol bitwin yumi long fasin we i soem lav, mo taem yumi talemaot gud nius we yumi “evriwan i gat wan tingting nomo.”​—Rom 15:6.

Faenem Ol Gudfala Man

¹ Tok we i Jisas i talem long saed blong wok blong prij, i putum wan wok long yumi we i no isi. Hem i se: “Taem yufala i go long wan taon no wan vilej, yufala i mas faenem [ol] gudfala man.” (Mat. 10:11) Tede, ol man oli no spenem plante taem long haos blong olgeta. ?Taswe, olsem wanem yumi save faenem ol gudfala man?

² Tingbaot Ples Blong Yu: Fastaem, i gud blong tingbaot ples blong yu. ?Long wanem taem nao, ol man oli stap long haos? ?Long dei, yu save go wea blong faenem olgeta? ?Wanem dei blong wik, mo wanem taem blong dei, we bambae oli glad moa blong storian wetem yu? Yu save karem moa frut long wok blong prij sipos yu jenisim taem blong yu blong prij mo ples we yu yu prij long hem, blong mekem i stret long laef blong ol man long ples blong yu.​—1 Kor. 9:23, 26.

³ Plante pablisa oli faenem se i gud blong prij long sapa. Long taem ya, plante man oli stap spel long haos, mo oli glad blong lesin. Taem ples i kolkol mo ol dei oli sot, i gud blong yusum telefon blong prij long sapa (sipos i oraet blong mekem olsem long ples blong yu). Mo tu, yu save talemaot gud nius long plante moa man sipos yu prij long ol stoa mo ofis, mo long ol ples we fulap man oli stap kam long hem.

⁴ Long wan manis we oli bin makemaot olsem wan spesel manis blong prij, wan kongregesen i prij long aftenun long Sarede mo Sande, mo long sapa long Wenesde mo Fraede. Mo tu, oli yusum telefon blong prij mo oli prij long ol ofis mo stoa. Fulap long kongregesen oli joen mo haremgud long wok ya, mekem se oli gohed nomo blong folem plan ya long ol narafala manis biaen.

⁵ Mekem Ol Visit: Maet i hadwok long ples blong yu blong faenem ol man, taem yu gobak blong visitim olgeta. Sipos i olsem, long fastaem we yu storian wetem man, mo long evri visit biaen, talem wan stret taem we bambae yu kambak blong luk hem bakegen. Afta, yu mas meksua se yu holem taem ya. (Mat. 5:37) Maet yu askem namba blong telefon blong hem, sipos yu luk se i oraet blong mekem olsem. Hemia wan rod blong toktok bakegen wetem hem.

⁶ Sipos yumi traehad blong faenem ol gudfala man mo visitim olgeta bakegen, Jeova bambae i blesem traehad blong yumi.​—Prov. 21:5.