Lukaotgud Long Fasin Blong Yufala Blong Yusum Taem

1. ?Wanem samting we ol man long plante ples oli faenem se i had long olgeta?

¹ Tede i gat fulap samting we man i yusum blong sevem taem mo mekem wok hareap. From samting ya plante man oli faenem se oli gat moa wok, mo oli gat smoltaem nomo blong mekem ol wok ya evriwan. ?Yu yu faenem i had blong folem wan gudfala program blong ol wok long saed blong spirit? ?Yu yu wantem tumas blong gat moa taem blong go prij? ?Olsem wanem blong yusumgud taem blong yumi?​—Sam 90:12; Fil. 1:9-11.

2, 3. ?Wanem trabol we niufala teknoloji i save karem, mo wanem samting we yumi wanwan i save mekem blong jekemap yumi?

² Luksave Ol Samting We i Westem Taem: Wanwan taem i gud we yumi evriwan i jekemap fasin blong yumi blong yusum taem blong yumi. Baebol i talem se: “Yufala i mas lukaot gud long ol fasin blong yufala. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri janis we yufala i kasem blong mekem ol gudfala wok, from we naoia, ol fasin nogud oli gat paoa.” (Efes. 5:15, 16) Tingbaot sam problem we oli kamaot from ol niufala save blong teknoloji. I tru se ol kompiuta mo ol narafala elektronik mesin oli stap mekem gudfala wok, be oli save stap olsem wan trap tu sipos yumi no lukaot gud long hamas taem we yumi spenem long olgeta.​—1 Kor. 7:29, 31.

³ Evri wan long yumi i mas askem long hem wan se: ‘?Mi mi spenem plante taem evri dei blong ridim mo ansarem ol mesej we mi kasem long E-mail, we maet ol mesej ya oli no rili impoten nating? ?Oltaem mi stap storian wetem narafala long telefon no mi stap sanem ol mesej long mobael fon from samting we i nating nomo? (1 Tim. 5:13) ?Mi mi stap lukluk olbaot long Intenet jes blong lukluk nomo be i no gat wan gud risen blong mi mekem olsem? ?Mi mi stap wajem televisin nating se i no gat samting we mi intres blong wajem? ?Mi stap spenem tumas taem blong plei long ol video gem mekem se mi no moa stadi gud long Tok blong God?’ Sipos yumi spenem taem long olkaen samting olsem yumi save kam sik long saed blong spirit.​—Prov. 12:11.

4. ?Wanem jenis we wan yangfala i mekem, mo from wanem hem i mekem olsem?

⁴ Yusum Taem Long Waes Fasin: Ol elektronik mesin oli save bos long taem mo tingting blong yumi isi nomo. Wan yangfala we i stap plei bitim mak long ol video gem i talem stret se: “Samtaem, sipos mi bin plei long wan video gem bifo we mi go prij no bifo we mi go long wan Kristin miting, mi faenem i had blong putum tingting blong mi i stap strong long samting we mi harem. Klosap oltaem mi stap tingbaot se taem mi gobak long haos, bambae mi winim gem ya olsem wanem. Samting ya i mekem we mi no moa stap ridim mo stadi Baebol olsem fastaem. Sloslo mi stap lusum glad blong mi long wok blong God.” From we yangfala ya i luksave se hem i mas mekem sam jenis long laef blong hem, hem i ravemaot evri gem we i stap long kompiuta blong hem. Hem i tingtingbak i se: “Hemia wan samting we i had tumas blong mekem. Long taem ya nao mi luksave se mi fas moa long ol gem ya i bitim God. Be long semtaem mi harem gud from we mi naf blong winim slak fasin ya mo mi save se disisen ya bambae i mekem i gud long mi.”​—Mat. 5:29, 30.

5. ?Olsem wanem yumi save faenem taem blong mekem wok long saed blong spirit, mo samting ya i save givhan long yumi olsem wanem?

⁵ Maet yu tu bambae yu nidim blong mekem olsem sipos yu luk se i gat sam samting we yu mas jenisim. ?Yu luk se yu save karemaot 30 menet evri dei long sam samting we oli no rili impoten? Taem ya i stret blong yu ridim ful Baebol long wan yia. !Fasin ya i save givhan bigwan long yu long saed blong spirit! (Sam 19:7-11; 119:97-100) Jusum sam stret taem blong mekem Baebol riding, rerem ol miting, mo joen long wok blong prij. (1 Kor. 15:58) Taem yu mekem olsem, bambae yu blokem ol samting ya we oli save stilim taem blong yu mo bambae yu save gohed blong “traem save olgeta samting we Masta blong yumi i wantem blong [yumi] mekem.”​—Efes. 5:17.

?Yumi Tokbaot Wanem Long Ol Magasin?

Wajtoa Jen. 15

“Long taem blong yumi, ol man oli no tinghevi tumas blong holem promes we oli mekem. From samting ya plante man oli lusum tras long narafala. ?Yu ting se i gat wan man we yumi save trastem ol promes blong hem? [Letem man i ansa. Ale, ridim Josua 23:14.] Magasin ya i soem olsem wanem yumi save trastem ol promes blong God we oli stap long Baebol.”

Wekap! Jen. 22 (Inglis/Franis)

“Yu luk Hibru hanraet ya, hem i olsem nao we ol man oli raetem nem blong God long lanwis Hibru. [Soem kava blong magasin ya.] Sam man oli tingting strong se i no stret blong talemaot nem ya. Sam narafala man oli yusum nem ya oltaem blong tokbaot God. Magasin ya i tokbaot ol defdefren tingting ya. Mo hem i soem tu olsem wanem yumi save save God tru long nem ya blong hem.” Ridim Ol Sam 83:18 (NW). Mo yu save ridim futnot long Eksodas 3:14.

Wajtoa Feb. 1

“Plante long yumi oli traem lukaot gud long bodi blong olgeta blong oli no sik. Be sam stadi we man i mekem i no longtaem, oli soem se wosip we yumi givim long God hemia tu i save gat paoa long helt blong yumi. ?Yu yu ting se samting ya i tru? [Letem man i ansa. Nao ridim Matiu 5:3.] Haf ya blong Wajtaoa i tokbaot olsem wanem yumi save kasem samting we yumi nidim long wosip blong yumi.”

Wekap! Jen./Maj (Bislama)

“Long ol yia we oli jes pas, plante disasta i kamaot raon long wol from we weta i olbaot. ?Yu ting se wanem nao bambae i karemaot trabol we ol disasta ya i mekem? [Letem man i ansa.] Magasin ya i tokbaot wanem i mekem se weta i jenis mo tu hem i tokbaot samting we Baebol i talem se bambae i stretem trabol ya.” Ridim Aesea 35:1.