Givim Beswan Sakrefaes Long Jeova

¹ Loa we Jeova i givim long Isrel i talem se ol anamol we oli givim long Hem olsem sakrefaes, i “no mas gat wan samting i rong long bodi” blong olgeta. Hem i no save glad long wan sik anamol. (Lev. 22:​18-20; Mal. 1:​6-9) Mo tu, taem oli mekem sakrefaes, oli mas givim olgeta gris blong anamol i go long Jeova. Hemia beswan haf blong anamol. (Lev. 3:​14-16) Jeova i Papa mo Bigfala Masta blong ol man Isrel, ale i stret nomo we oli givim beswan sakrefaes long hem.

² Tede tu, God i stap skelem ol sakrefaes we yumi givim long hem. Wok we yumi mekem i go long Jeova i mas soemaot bigfala ona we i stret blong givim long hem. I tru, laef blong yumi wanwan i no sem mak. Be nating, i stret we yumi wanwan i luklukgud long fasin blong yumi blong meksua se yumi stap givim beswan sakrefaes long Jeova.​—Efes. 5:10.

³ Wok Wetem Olgeta Hat Blong Yu: Blong givim ona long Jeova mo tajem hat blong ol man, yumi no save mekem wok blong Jeova long fasin we i olsem mesin nomo. Ol tok we yumi talem long saed blong God blong yumi mo long saed blong ol nambawan tingting blong hem long fiuja, oli mas kamaot long hat, yes, long hat we i fulap long tangkiu. (Sam 145:7) Hemia i makemgud long yumi se yumi mas gat wan gudfala program blong ridim Baebol oltaem mo blong stadi yumi wan.​—Prov. 15:28.

⁴ Blong givim beswan sakrefaes long Jeova, yumi mas folem fasin blong hem blong lavem ol man. (Efes. 5:​1, 2) Lav ya bambae i pulum yumi blong traem kasem olgeta man evriwan wetem trutok ya we i save givim laef long olgeta. (Mak 6:34) Lav ya bambae i pulum yumi blong tingbaot olgeta man wanwan we yumi toktok long olgeta. Bambae i pulum yumi blong gohed blong tingbaot olgeta taem yumi aot long haos blong olgeta, mo blong gobak hareap blong luk olgeta bakegen. Lav ya bambae i pulum yumi blong mekem bes blong yumi blong halpem olgeta long saed blong spirit.​—Wok 20:24; 26:​28, 29.

⁵ ‘Sakrefaes Blong Presem God’: Wan narafala samting we yumi save mekem blong givim beswan sakrefaes long Jeova, se yumi save traehad long wok blong prij. Taem yumi gat wan gudfala plan mo yumi putum fulwan tingting blong yumi long wok blong prij, yumi save karem gudfala frut long smoltaem we yumi prij. (1 Tim. 4:10) Sipos yumi reregud, bambae ol toktok blong yumi i kliagud mo i soemaot bilif, nao ating ol man bambae oli glad moa blong lesin long yumi. (Prov. 16:21) Yes, taem yumi talemaot gud nius long ol man, ol tok we i kamaot long hat blong yumi i olsem wan ‘sakrefaes blong presem God.’​—Hib. 13:​15, NW.

Ol Yangfala​—!Ridim Tok Blong God!

¹ Yangtaem i fulap long traem mo ol bigfala disisen. Yufala ol yangfala Kristin, evri dei plante long yufala i kasem traem we i save pulum yufala blong brekem loa blong God. Bifo we yufala i tekem ol prapa disisen blong yufala long saed blong edukesen, wok, mo mared, yufala i mas putum ol mak long saed blong spirit we bambae yufala i traehad blong kasem. Long rod ya nomo, yufala i save tekem ol disisen we oli karem gudfala frut long ol yia we oli kam. Ol klia mak long saed blong spirit bambae oli givhan long yufala blong waes mo blong win long laef blong yufala. Sipos yufala i ridim Tok blong God oltaem mo tingting dip long hem, bambae yufala i harem se yufala i wantem folem ol advaes ya blong God long laef blong yufala, bambae yufala i traehad long ol gudfala wok mo bambae yufala i karem gudfala frut.​—Jos. 1:8; Sam 1:​2, 3.

² ?Bambae i Halpem Yufala Olsem Wanem? Wol blong Setan i fulap long ol samting blong pulum yu blong mekem nogud. (1 Jon 2:​15, 16) Maet samfala long klas blong yu no sam narafala yangfala oli kasem bigfala trabol from we oli bin letem ol fren blong olgeta oli pulum olgeta. Be sipos yu folem ol advaes blong Baebol, bambae yu strong gud long saed blong spirit mo fasin, nao bambae yu naf blong no folem ol fren we oli mekem rabis fasin. Mo tu, advaes blong Baebol i save halpem yu blong ronwe long ol trap blong Setan we oli haed. (2 Kor. 2:11; Hib. 5:14) Bambae yu glad fulwan sipos yu folem ol rod blong God, bambae yu haremgud long laef blong yu.​—Sam 119:​1, 9, 11.

³ Ol rul blong Baebol we oli no save jenis, oli gud moa i winim waes blong man. (Sam 119:​98-100) I gud yu stadi long ol rul blong Baebol, tingting dip long ol stamba plan blong Jeova, mo prea wetem fulhat blong yu. Samting ya bambae i halpem yu blong frengud wetem Man ya we i Raetem Baebol mo we i gat olgeta waes, hemia Jeova God. Hem i promes se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.”​—Sam 32:8.

⁴ Makemaot Taem Blong Ridim Baebol: Wan Kristin gel i putum mak se bambae hem i ridim Baebol fulwan, ale hem i finisim wok ya long wan yia. ?Olsem wanem? ?Samting ya i givhan long hem? Gel ya i talem se: “Mi lanem fulap samting long saed blong Jeova. Ol samting ya oli pulum mi mi kam klosap long hem, mo oli mekem se mi wantem ona long hem long olgeta yia blong laef blong mi.” (Jem. 4:8) ?Yu yu ridim finis fulwan Baebol? Sipos no, i gud yu putum mak blong mekem olsem. Jeova bambae i blesem hadwok blong yu, mo bambae yu kasem gudfala frut from.