!Man We i Wokem Yumi i Kea Long Yumi!

¹ Ol man Isrel oli no wantem obei. Taswe, Jeova i traem mekem olgeta oli tingtinggud. Hem i se: ‘?Weswe? ?Yufala i no save? ?Yufala i no harem stori blong hem? Jeova ya, hem i God we i stap oltaem, mo bambae i stap gogo i no save finis. Hem nao i mekem olgeta samting long wol ya.’ (Aes. 40:28) Yumi savegud Man we i wokem yumi, mo yumi luk bigfala lav we hem i soemaot long yumi. Nating se i olsem, plante milyan man oli no bilif long hem no oli gat wan tingting long saed blong hem we i no laenap nating wetem Baebol. ?Olsem wanem yumi save halpem olgeta?

² Niufala buk ya Is There a Creator Who Cares About You? (long engglis mo franis), i save givhan bigwan long ol man olsem. Mo tu, buk ya i pulum ol man we oli wantem kasem moa save, blong oli tingting dip long ol samting we oli stap raonabaot long yumi. Ol nambawan poen mo pruf bambae oli pulum intres long olgeta we oli ridim buk ya.

³ Yusumgud Buk ya Creator: Faenem ol impoten poen we oli stap long olgeta haf blong buk. Japta 2 kasem 5 oli soem olsem wanem wol, laef, mo man oli kamtru mo from wanem oli stap. Japta 6 kasem 9 oli tokbaot Baebol mo Man we i stamba blong hem. Ol japta ya oli soemaot klia se yumi save trastem fulwan buk blong Jenesis. Japta 10 i givim wan klia ansa long wan impoten kwestin we sam man oli askem, hemia se: “Sipos God i kea long yumi, ?from wanem yumi safa?”

⁴ Traem Tingtinggud Wetem Man We i No Bilif: Pej 78-79 blong buk Creator, oli givim pruf blong halpem sam man oli gat stret tingting long saed blong God. Askem long man se: “?Olgeta samting long heven mo wol oli gat wan stat?” Plante bambae oli agri long samting ya. Nao askem se: “?Hem i kamaot hem wan nomo no i mas gat samting i statem?” Plante bambae oli talem se: “Yes, i mas gat samting i statem.” Nao yumi save askem laswan kwestin se: “Sipos olgeta samting long heven mo long wol oli bin gat wan stat, ?wan samting no wan Man i mekem stat ya i kamtru?” Ansa long kwestin ya bambae i halpem plante man blong kasem save se i mas gat wan Man i wokem yumi.

⁵ Buk ya Creator bambae i halpem plante man. Soem buk ya long famle blong yu, long wok blong yu, long tija blong skul, mo long ol narafala man bakegen. Karem buk ya wetem yu taem yu go prij, ating bambae yu gat jans blong serem hem long wan we i toktok engglis no franis, no long wan man we i no bilif se i gat wan Man we i wokem yumi. Moa yumi savegud buk ya, moa lav we yumi gat long Jeova bambae i kam strong. Buk ya bambae i halpem yumi tu blong gohed blong wokbaot folem ol hae rul blong Jeova.​—Efes. 5:1; Rev. 4:​11.

Kam Wan Niufala Man

¹ !Ol Kristin oli glad tumas blong save trutok! Trutok i soem klia wanem rod we yumi mas folem blong mekem laef blong yumi i stret nao yumi no folem fasin blong ol man blong wol. Wol ya i “stap longwe tumas long laef ya we God i givim,” taswe “tingting blong olgeta ya i stap long tudak nomo.” (Efes. 4:​18) Taem yumi finis long olfala laef blong yumi bifo mo yumi kam wan niufala man, yumi lego tingting blong wol.​—Efes. 4:​22-​24.

² Olfala fasin blong laef i lidim man blong gat ol tingting we oli fulap long nogud fasin, we hem i stap mekem ol man oli doti mo biaen oli ded. Taswe, yumi singaot strong long ol man we oli harem mesej blong Kingdom se oli mas sakemaot ol fasin blong stap kros, faerap, stap badfren, tok agens long narafala man, mo yusum ol doti tok. Ol man we oli wantem tumas se God i agri long olgeta, oli mas sakemaot kwiktaem olfala fasin blong laef, olsem we oli tekemaot wan doti klos.​—Kol. 3:​8, 9.

³ Wan Niufala Paoa i Stap Wok Long Tingting Blong Yumi: Kam niufala man i minim se yumi mekem laef mo tingting blong yumi i kam niuwan olgeta. (Efes. 4:​23) ?Olsem wanem wan man i save gat tingting ya we i pulum hem long rod we God i laekem? Hem i save mekem olsem sipos hem i stadi mo tingting dip long Baebol oltaem. Long rod ya, wan man i stap lanem wan niufala fasin blong tingting. Man ya i stat tingting olsem God mo Kraes. Laef blong man ya i jenis taem hem i gat ol fasin blong Kraes olsem fasin sore, fasin blong mekem i gud long narafala, tingting daon, kwaet fasin, longfala tingting, mo lav.​—Kol. 3:​10, 12-14.

⁴ Taem yumi kam niufala man, yumi seraot long wol ya. Fasin blong laef blong yumi i defren. Yumi no giaman, yumi yusum ol gudfala tok we oli save leftemap tingting blong narafala man. Yumi bos long fasin blong kros. Ol stret fasin blong God oli tekem ples blong fasin blong sakem tok i go antap, fasin blong tok nogud long narafala mo fasin blong stap badfren. Yumi fogivim mo yumi fogetem fulwan ol mastik blong narafala. Yumi mekem ol samting ya wetem fulhat blong yumi.​—Efes. 4:25-​32.

⁵ Yumi neva mas lego niufala laef ya. Sipos yumi no kam wan niufala man, Jeova i no save agri wosip blong yumi. Niufala fasin blong laef ya i pulum ol man oli kam long trutok, mo i givim ona long Jeova, Man ya we i wokem niufala laef blong yumi.​—Efes. 4:​24.