Olkaen Man Bambae Oli Sef
1. ?Gudnem long fored blong God i dipen long wanem samting?
1 Long gladhat blong God, hem i mekem rod blong yumi save kasem laef. Jeova i wantem se “olkaen man bambae oli sef, mo we oli kasem stret save long trutok.” (1 Tim. 2:3, 4, NW ) Blong yumi gat gud nem long fored blong God, hemia i no dipen long kala blong skin, haenem, save, no eni samting long saed blong yumi we man i save luk, be i dipen long bilif blong yumi long ransom sakrefaes blong Jisas. (Jon 3:16, 36) Yumi olsem ol man blong wok blong God, taswe yumi mas sakemaot enikaen fasin blong laekem moa sam man i bitim ol narafala. Sipos yumi no sakemaot fasin ya, hem i save pulum yumi blong yumi no wantem givhan long sam man we Jeova i rere blong agri long olgeta.
2, 3. ?Wanem i save givhan long yumi blong yumi no jajem ol man from klos mo hea blong olgeta?
2 No Jajem Narafala: Jeova i lukluk samting we i stap long hat blong ol man, hem i no gat fasin blong wantem spolem ol man, mo hem i no mekem i moa gud long samfala i bitim ol narafala. (1 Saml. 16:7) Mo tu, hem i luk olsem wanem man i save jenis mo kam wan gudfala man. Taswe, hem i luk olgeta we oli wantem mekem hem i glad olsem we oli ol gudgudfala samting. (Hag. 2:7) ?Olsem wanem? ?Yumi stap lukluk ol narafala olsem we God i stap lukluk olgeta?
3 Maet yumi sek taem yumi luk klos mo hea blong sam man we yumi mitim olgeta long wok blong prij. Maet klos blong olgeta i brobrok, i soemaot bodi blong olgeta, maet oli gat bigfala mustas we i doti, no oli gat ring long nus no long maot blong olgeta. Maet samfala oli no gat ples blong slip. Sam narafala maet oli tok strong long yumi. Yumi no mas jajem ol man olsem mo talem se neva bambae oli kam ol man blong wosipim Jeova. Yumi mas gat gudfala tingting long saed blong olgeta, “from we bifo, yumi tu yumi stap mekem krangke fasin. Yumi no save obei, mo yumi lusum stret rod olgeta.” (Taet. 3:3) Sipos yumi kasem save long samting ya, bambae yumi glad moa blong prij long evri man, mo long olgeta ya tu we maet klos mo hea blong olgeta i mekem yumi ting se oli no stret blong harem gud nius.
4, 5. ?Wanem samting we yumi lanem long eksampol blong Jisas mo Pol?
4 Ol Eksampol Long Faswan Handred Yia: Jisas Kraes i tektaem blong givhan long olgeta ya we maet ol narafala oli talem se oli neva save kam man blong Jeova. (Luk 8:26-39) Jisas i no agri long ol rabis fasin, be hem i save se sloslo man i save folem ol fasin blong laef we oli nogud. (Luk 7:37, 38, 44-48) Taswe, hem i soemaot se hem i kasem save, “hem i sore tumas long olgeta, from we oli olsem ol sipsip we i no gat man blong lukaot long olgeta.” (Mak 6:34) ?Olsem wanem? ?Yumi tu yumi save folem moa eksampol ya blong Jisas?
5 Ol man oli stonem aposol Pol, oli kilim hem, mo oli putum hem long kalabus. (Wok 14:19; 16:22, 23) ?Ol trabol ya oli mekem se Pol i kam kros nao i ting se hem i stap westem taem blong hem nomo blong go prij long sam kantri mo sam laen blong man? Nogat. Hem i save se hem i save faenem sam man long ol defdefren laen we hat blong olgeta i stret, mo hem i gat strong tingting blong faenem ol man olsem. ?Yumi gat semfala tingting long saed blong ol man long ples blong yumi we oli kamaot long ol defdefren ples mo fasin blong laef?
6. ?Olsem wanem fasin blong yumi i save gat paoa long ol niuwan we oli kam long ol miting blong kongregesen?
6 Mekem Welkam Long Ol Narafala Tede: Plante long ol man blong God oli glad we ol brata sista oli no bin jajem olgeta from klos mo hea blong olgeta, be oli bin welkamem olgeta long kongregesen. Long Jemani, wan man we i gat bigfala mustas, longfala hea, mo ol klos blong hem oli doti, i kam long Haos Kingdom. Ol man oli save se fasin blong man ya i nogud. Nating se i olsem, be evriwan oli mekem welkam long hem long miting. Samting ya i tajem hem bigwan, mekem se wan wik biaen hem i kam long miting bakegen. Smol taem afta, hem i katemgud hea mo mustas blong hem, i stop blong smok, mo i stretem mared blong hem wetem gelfren blong hem. I no longtaem afta, tufala wetem tufala pikinini blong tufala oli joengud olsem wan famle blong wosip long Jeova.
7. ?Olsem wanem yumi save folem fasin blong God we i stap mekem i sem mak long olgeta man?
7 I gud yumi folem fasin blong God we i stap mekem i sem mak long evri man, nao yumi singaotem evri man blong oli kasem blesing from gladhat blong God.
[Tok blong makem poen long pej 3]
“God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”—Wok 10:34, 35.