Fasin Blong Stanap Strong i Gat Pei Blong Hem

¹ “Bambae yufala i save sevem laef blong yufala, from we yufala i stap stanap strong.” (Luk 21:19) Tok ya i haf blong profet tok we Jisas i givim long saed blong taem ya we klosap “wol ya i finis.” Tok ya i soem klia se blong holemstrong long Jeova, yumi mas rere blong kasem plante traem. Nating se i olsem, long paoa blong Jeova, yumi wanwan i save “stanap strong gogo olgeta samting ya i finis,” nao ‘God bambae i sevem yumi.’​—Mat. 24:​3, 13; Fil. 4:13.

² Trabol we yumi kasem from bilif blong yumi, sik, trabol long saed blong mane, mo trabol we i spolem filing blong yumi, olgeta samting ya i save mekem we evri dei yumi fesem traem. Yumi no mas fogetem se Setan i stap traehad blong pulum yumi blong lego Jeova. Be, taem ol dei oli pas mo yumi gohed blong stap tru long Papa blong yumi long heven, yumi stap ansa bakegen mo bakegen long tok we Setan i talem long saed blong yumi blong jikim Jeova. !I gud tumas blong save se Jeova i no fogetem ‘olgeta taem ya we yumi stap krae’ from ol traem we yumi fesem! !Hem i makemgud ol taem ya, mo hem i glad tumas taem yumi holemstrong long hem!​—Sam 56:8; Prov. 27:11.

³ Ol Traem Oli Mekem Yumi Kamgud Moa: Fasin we yumi mekem taem wan trabol i kasem yumi, maet i soemaot se yumi sot long bilif, no maet i soemaot wan slak fasin blong yumi, olsem flas tingting no sot maen. I nogud yumi brekem ol tok blong Baebol blong traem ronwe long wan traem no blong traem finisim wan traem hareap. I moagud we yumi folem advaes blong Baebol blong “stanap strong olwe gogo kasem en blong rod.” ?From wanem? From we taem yumi stanap strong mo yumi winim ol traem, samting ya i givhan long yumi blong ‘kam stret gud, yumi no sot long wan samting long Kristin laef blong yumi.’ (Jem. 1:​2-4) Taem yumi stanap strong, yumi lanem ol nambawan fasin, olsem, ating yumi no moa strong tumas long narafala, ating yumi kasem save moa long filing blong narafala, mo maet yumi lanem blong sore long narafala.​—Rom 12:15.

⁴ Bilif We i Winim Traem: Taem yumi kasem traem mo yumi stanap strong, yumi soemaot se bilif blong yumi i tru, mo samting ya i gud tumas long fes blong God. (1 Pita 1:​6, 7) Bilif olsem bambae i mekem se yumi naf blong stanap strong taem wan narafala traem i kasem yumi bakegen. Mo tu, yumi haremsave se God i glad long yumi, mo from samting ya, yumi putum tingting blong yumi i stap strong moa long hem nao ol blesing we hem i promes blong givim oli kam sua moa long tingting blong yumi.​—Rom 5:​3-5.

⁵ Jemes 1:12 i tokbaot nambawan pei blong man we i stanap strong, i se: “Taem ol samting oli kam blong traem bilif blong man, be hem i stap stanap strong, hem i save harem gud, from we . . . God bambae i flasem hem olsem we oli flasem man we i win long faet. Mo praes we God bambae i givim long hem, hemia laef ya we hem i promes finis blong givim.” Taswe, yumi mas strong blong gohed blong ona long Jeova, wetem tingting we i suagud se bambae hem i givim bigfala pei long “olgeta we oli lavem hem.”

Haf 2—Givhan Long Ol Baebol Stadi Blong Oli Gohed Gud

Reregud Bifo We Yu Mekem Stadi

¹ Blong tijim gud wan man long Baebol, i no naf blong tokbaot ol save long buk nomo mo jekem ol vas. Nogat. Yumi mas givimaot ol save ya long fasin we i kasem hat blong studen. Blong mekem olsemia, yumi mas reregud mo tingbaot wanem bambae i givhan long man ya we yumi mekem stadi long hem.​—Prov. 15:28.

² ?Olsem Wanem Blong Reregud?: Fastaem, yu mas prea long Jeova long saed blong studen blong yu mo wanem samting we hem i nidim blong i save gohed gud. Askem long Jeova blong givhan long yu blong mekem trutok i kasem hat blong studen. (Kol. 1:​9, 10) Blong kasem save long bigfala tingting insaed long stadi, tekem smoltaem blong tingbaot nem blong japta, ol smol stamba tok, mo ol pija. Nao ansa long kwestin ya: ‘?Save ya i blong tijim studen long wanem samting?’ Hemia bambae i givhan long yu blong mekem ol bigfala poen oli kamaot klia.

³ Nao sloslo, ridim ol wanwan paragraf long stadi. Faenem ansa blong olgeta kwestin we oli stap, mo putum laen aninit long ol impoten wod nomo we oli soemaot ansa. Tingting long ol vas mo olsem wanem oli joen wetem bigfala poen long paragraf, nao jusum sam vas we bambae yufala i save ridim long stadi. Maet yu faenem se i gud blong raetem ol smosmol not long saed blong pej long buk blong yu. Studen i mas luksave klia se samting we hem i stap lanem i stanap long Tok blong God.​—1 Tes. 2:13.

⁴ Mekem Save i Laenap Wetem Studen: Biaen, tingbaot olsem wanem yu save mekem ol save long japta i laenap wetem studen blong yu. Traem tingbaot ol kwestin we maet bambae hem i askem, mo ol poen we maet hem i faenem i had blong kasem save long olgeta no bilif long olgeta. Tingting long kwestin ya: ‘?Studen ya i mas kasem save long wanem samting mo kamgud moa long wanem samting, blong hem i save gohed gud long saed blong spirit? ?Olsem wanem mi save kasem hat blong hem?’ Nao jenisim fasin blong yu blong tij blong mekem i laenap wetem samting we studen i nidim. Blong givhan long studen blong kasem mining blong sam poen no vas, maet i gud we yu rerem wan pijatok, no sam tok blong eksplenem, no sam kwestin. (Neh. 8:8) Be yu no mas ademap ol save bakegen we i no givhan blong mekem bigfala tingting i kam klia. Long en blong stadi, i gud blong tingtingbak blong smoltaem. Samting ya bambae i halpem studen blong rimemba ol bigfala poen long stadi.

⁵ !Yumi glad tumas taem yumi luk we ol niuwan oli stretem laef blong olgeta! !Samting ya i leftemap nem blong Jeova! (Fil. 1:11) Blong givhan long olgeta blong kasem mak ya, yu mas reregud from evri Baebol stadi we yu mekem.