Talemaot Kingdom​—Wan Nambawan Blesing

¹ Evri dei, plante milian man long wol oli harem gud from ol gudfala samting we Jeova i givim blong oli stap laef. (Mat. 5:45) Be smol man nomo oli harem gud long janis blong soemaot tangkiu long God ya we i wokem olgeta, taem oli go talemaot gud nius blong Kingdom blong Hem. (Mat. 24:14) ?Olsem wanem? ?Yu yu tinghae long nambawan blesing ya?

² Wok blong talemaot Kingdom i givim ona long God mo i karem hop mo pis long ol man we oli harem nogud long ol trabol blong tede. (Hib. 13:15) Olgeta we oli lesin long gud nius ya, oli gat hop blong kasem laef we i no save finis. (Jon 17:3) ?Wanem narafala wok tede we i save givim gudfala samting olsem long ol man? Aposol Pol i gat tangkiu from wok blong prij, mo hem i soemaot tingting ya long wei we hem i mekem wok ya. Hem i lukluk wok blong prij olsem wan gudfala samting tumas.​—Wok 20:​20, 21, 24; 2 Kor. 4:​1, 7.

³ Soem Tangkiu From Nambawan Blesing Ya: Wan rod blong soemaot tangkiu from nambawan blesing ya blong prij, hemia blong mekem gud wok blong yumi. ?Yumi tekem taem blong rerem wan storian we i save tajem hat blong olgeta we oli lesin long yumi? ?Yumi save kam gud moa long fasin blong yusum Baebol mo blong pulum ol man blong oli tingting gud? ?Yumi wokem gud teritori blong yumi? ?Yumi save olsem wanem blong statem mo lidim wan Baebol stadi? Olsem ol trufala Kristin blong bifo mo tede, gudfala tingting we yumi gat long wok ya i pusum yumi blong prij, mo yumi tinghae long nambawan blesing ya.​—Mat. 25:​14-23.

⁴ Taem yumi stap mekem wok ya, maet long sem taem yumi gat ol trabol we oli joen wetem fasin blong kam olfala, no helt blong yumi i nogud, no yumi gat sam narafala hadtaem bakegen. Be yumi haremgud tumas blong save se wok blong prij we yumi mekem wetem strong tingting i sas tumas long tingting blong Jeova. Tok blong God i mekem yumi sua se Jeova i tinghae long ol traehad olsem, nating sipos sam narafala oli no tinghae tumas long olgeta.​—Luk 21:​1-4.

⁵ Wok blong talemaot Kingdom i stamba blong bigfala glad. Wan olfala sista we i gat 92 yia blong hem, i talem se: “Hem i wan bigfala ona blong lukluk bak long bitim 80 yia we mi mekem wok blong God​—!mi no sore nating! Sipos mi save statem laef blong mi bakegen, bambae mi mekem sem samting we mi bin mekem, from we, tru ya, ‘mi mi wantem moa lav blong God, i winim we mi wantem stap laef.’” (Sam 63:3) I gud we yumi tu yumi lukaotgud long nambawan blesing ya we God i givim long yumi​—wok blong talemaot Kingdom.

Haf 12—Givhan Long Ol Baebol Stadi Blong Oli Gohed Gud

Halpem Ol Studen Blong Oli Statem Mo Mekem Ol Baebol Stadi

¹ Taem ol Baebol studen blong yumi oli stat blong prij, maet oli fraet blong statem mo mekem Baebol stadi long narafala man. ?Olsem wanem yumi save givhan long olgeta blong oli gat wan gudfala tingting long impoten haf ya blong wok blong prij?​—Mat. 24:14; 28:​19, 20.

² Taem wan Baebol studen i naf blong kam wan pablisa we i no baptaes, ating hem i joen finis long Tiokratik Skul. Trening we hem i kasem taem hem i mekem rere mo givim ol tok, bambae i givhan long hem blong gat gudhan long wok blong tij. Hemia wan samting we hem i nidim blong i kam ‘wan man we i stap tijim ol man long trutok blong God long fasin we i stret gud.’​—2 Tim. 2:15.

³ Tijim Olgeta Tru Long Eksampol Blong Yu: Jisas i trenem ol disaepol blong hem taem hem i givim klia tijing long olgeta mo i soemaot gudfala eksampol. Hem i talem se: “Sipos [man] i tren gogo i finisim trening blong hem, bambae hem i kam sem mak wetem tija blong hem.” (Luk 6:40) Blong folem fasin blong Jisas, i impoten tumas blong soemaot gudfala eksampol long wok blong prij. Taem studen i wajem eksampol blong yu long wok blong prij, bambae hem i kasem save se risen from wanem yumi gobak blong luk ol man, hemia blong statem ol Baebol stadi.

⁴ Eksplenem long studen se taem yumi askem man blong stadi, i no nid blong eksplenem evri smosmol samting long saed blong stadi. Plante taem i moagud blong yusum wan no tu haf blong wan buk blong stadi, blong soemaot olsem wanem blong stadi. Yumi save faenem ol gudfala advaes olsem wanem blong mekem samting ya, long pej 8 blong Kingdom Wok ya, mo long pej 6 blong Kingdom Wok Blong Yumi blong Jenuware 2002.

⁵ Long taem we yu luk se i stret, askem long studen blong i joen long wan Baebol stadi wetem yu no wetem wan narafala pablisa we i gat gudhan blong mekem Baebol stadi. Maet hem tu i save tokbaot wan haf no wan stamba vas long stadi ya. Olsem nao, taem studen i wajem gud yu, bambae hem i lanem plante samting long saed blong fasin blong givhan long ol Baebol stadi blong oli gohed gud. (Prov. 27:17; 2 Tim. 2:2) Talem ol gudfala toktok from traehad blong hem, mo tokbaot olsem wanem hem i save kam gud moa.

⁶ Taem yumi trenem ol niufala pablisa blong oli kam ol man blong tijim narafala long Tok blong God, hemia bambae i mekem oli rere from “gudfala wok” blong statem mo lidim ol Baebol stadi blong olgeta. (2 Tim. 3:17) !I gud tumas blong wok wanples wetem olgeta ya, blong singaotem ol man wetem lav se: “Yufala we i wantem dring, yufala i kam tekem wota ya blong laef, we i olsem presen blong yufala”!​—Rev. 22:17.