‘Ol Tok Ya Oli Olsem Gudfala Kakae Blong Yu’

¹ Blong mekem ol fasin we God i glad long olgeta, oltaem yumi mas traehad bigwan. (1 Tim. 4:​7-​10) Sipos yumi dipen long prapa paoa blong yumi nomo, bambae i no longtaem yumi save kam taed mo yumi foldaon. (Aes. 40:​29-​31) Yumi save kasem paoa we i kam long Jeova sipos yumi tekem ‘ol tok [blong hem] olsem we oli gudfala kakae blong yumi.’​—1 Tim. 4:6.

² Ol Gudfala Kakae Long Saed Blong Spirit: Jeova i yusum Tok blong hem mo “slef ya we i stret mo waes,” blong givim ol gudfala kakae long saed blong spirit. (Mat. 24:​45, NW) ?Be olsem wanem long yu? ?Yu yu stap mekem wok we yu mas mekem blong kasem paoa from kakae ya? ?Yu yu stap ridim Baebol evri dei? ?Yu yu makemaot wan stret taem blong stadi yu wan mo tingting dip? (Sam 1:​2, 3) Sipos yumi tekem ol gudfala kakae ya long saed blong spirit, bambae yumi kam strong, mo bambae oli protektem yumi long wol ya blong Setan we i save mekem yumi kam slak. (1 Jon 5:​19) Sipos yumi fulumap tingting blong yumi wetem ol gudfala save mo mekem i wok long laef blong yumi, bambae Jeova i stap wetem yumi.​—Fil. 4:​8, 9.

³ Jeova i yusum ol miting blong kongregesen tu blong givim paoa long yumi. (Hib. 10:​24, 25) Ol tijing long saed blong spirit we yumi kasem long taem ya, mo gudfala fasin joen blong yumi wetem ol brata sista, oli save givim paoa long yumi blong stanap strong taem yumi fesem ol traem. (1 Pita 5:​9, 10) Wan yangfala Kristin i talem se: “Mi mi skul ful dei, mo samting ya i karemaot paoa long mi. Be ol miting oli olsem wan ples blong kasem wota long drae ples, oli mekem mi mi kasem paoa blong gohed wetem ol traem we mi mi stap fesem long skul nekis dei.” !Yes, yumi rili kasem blesing taem yumi traehad blong go long ol miting!

⁴ Talemaot Trutok: Long lukluk blong Jisas, wok blong prij i olsem kakae blong hem. Wok ya i givim paoa long hem. (Jon 4:​32-​34) Long sem fasin, taem yumi tokbaot ol nambawan promes blong God long ol narafala, yumi harem se yumi kasem niufala paoa. Sipos oltaem yumi bisi long wok blong prij, bambae hat mo tingting blong yumi i stap oltaem long Kingdom mo long ol blesing we bambae oli kamtru i no longtaem. Hemia i rili givim paoa long yumi.​—Mat. 11:​28-​30.

⁵ !Hemia i wan blesing taem yumi stap haremgud long ol kakae long saed blong spirit we Jeova i stap givim long ol man blong hem tede! I gud we yumi hapi, yumi gohed blong singsing blong presem hem.​—Aes. 65:​13, 14.

Haf 5—Givhan Long Ol Baebol Stadi Blong Oli Gohed Gud

Jusumaot Hamas Haf Blong Stadi Long Hem

¹ Taem Jisas i stap tij, hem i tingbaot ol disaepol blong hem se oli naf blong kasem hamas save, nao hem i tijim olgeta “stret long mak we olgeta oli save haremsave.” (Mak 4:​33; Jon 16:12) Long sem fasin, wan man we i tijim narafala long Tok blong God tede, i mas skelem se bambae tufala i mekem hamas haf long wan Baebol stadi. Hemia i dipen long tija mo studen tugeta, hamas save we tufala i gat, fasin blong tufala, mo ol wok we tufala i gat blong mekem long laef blong tufala.

² Bildimap Strong Bilif: Sam studen oli kwik blong kasem save ol poen long wan stadi, be sam narafala oli nidim blong slo moa, maet tu no tri stadi blong kasem save ol semfala poen. I moa impoten we yumi givhan long studen blong kasem save gud ol poen we hem i stap lanem, i bitim we yumi hareap blong kavremap plante paragraf long wan stadi. Olgeta studen oli nidim wan strong fandesen blong niufala bilif ya we oli gat long Tok blong God.​—Prov. 4:7; Rom 12:2.

³ Evri wik yu mas spenem naf taem wetem studen blong hem i kasem save mo akseptem ol samting we hem i lanem long Tok blong God. Yu no mas hareap tumas long ol poen. Sipos yu hareap, hem i no gat taem blong tinghevi long ol sas trutok ya we hem i stap lanem. Tekem taem blong pulum tingting blong hem i go long ol bigfala poen mo blong lukluk ol stamba vas we oli sapotem ol tijing we hem i stap lanem.​—2 Tim. 3:​16, 17.

⁴ No Slo Tumas Long Stadi: I tru, yumi no mas hareap tumas, be yumi no mas slo tumas tu, we yumi tokbaot plante narafala poen we oli no laenapgud wetem stadi ya. Sipos wan studen i laekem blong storian long ol samting long laef blong hem, yumi save tokbaot ol samting ya afta we stadi i finis.​—Pri. 3:1.

⁵ Mo tu, from we yumi glad tumas blong save trutok, maet i hadwok long yumi blong no toktok bitim mak long taem blong stadi. (Sam 145:​6, 7) Sipos wanwan taem yumi tokbaot wan poen afsaed long stadi no wan ekspiriens, samting ya i save mekem se stadi i moagud. Be yumi no mas bitim mak long saed ya nao bambae studen ya i slo tumas blong kasem stret save long ol tijing blong Baebol.

⁶ Sipos evri wik yumi stadi long hamas haf we yumi luk se oli stret long ol wanwan Baebol studen, yumi stap givhan long olgeta blong oli “wokbaot long delaet ya we [Jeova] i stap givim.”​—Aes. 2:5.