Haf 6: Givhan Long Ol Baebol Stadi Blong Oli Gohed Gud

?Yumi Mekem Wanem Taem Studen i Askem Wan Kwestin?

¹ Afta we yumi stadi plante taem wetem wan man, i moa gud blong tokbaot ol tijing blong Baebol folem wan stret oda, i bitim we yumi tokbaot wan poen ale yumi jam i go long narawan. Long fasin ya, bambae yumi halpem studen blong bildimap stret save blong hem long wan gudfala fandesen, mo blong i gohed long saed blong spirit. (Kol. 1:​9, 10) Be, plante taem, ol studen oli askem ol narnarafala kwestin taem stadi i stap gohed. ?Bambae yumi mekem wanem long taem olsem?

² Gat Fasin Luksave: Yumi save ansa wantaem nomo sipos kwestin ya i joen wetem poen we yumi stadi long hem. Sipos kwestin ya i joen wetem wan poen we bambae yumi tokbaot long wan narafala japta blong buk, maet i naf nomo blong talem samting ya long studen. Be, sipos wan kwestin i no laenap nating wetem stadi no i nidim blong yumi lukaotem ol save blong givim stret ansa, maet i moa gud sipos yumi tokbaot kwestin ya afta long stadi no long wan narafala taem. Sam pablisa oli faenem se taem oli raetem daon ol kwestin olsem, ol studen oli harem se tija blong olgeta i tinghevi long kwestin blong olgeta, mo long sem taem hemia i givhan long ol pablisa ya blong oli no gowe long ol poen blong stadi.

³ Ol buk we yumi yusum blong mekem stadi long ol man oli tokbaot smol samting nomo long saed blong ol tijing blong Baebol. ?Bambae yumi mekem wanem sipos wan studen i faenem i had blong agri wetem wan tijing, no i holemstrong long wan giaman bilif? Maet i gud blong tokbaot ol narafala save we i eksplenem ol samting we Baebol i talem long saed ya. Sipos studen ya i no agri yet, lego kwestin ya i stap fastaem mo gohed long stadi blong hem. (Jon 16:12) Taem bambae hem i kasem moa save blong Baebol mo i gohed long saed blong spirit, maet tijing ya blong Baebol i kam klia long tingting blong hem.

⁴ Yumi Mas Gat Tingting Daon: Sipos yu no savegud ansa blong wan kwestin, yu no mas talem prapa tingting blong yu. (2 Tim. 2:​15; 1 Pita 4:​11) Eksplenem long studen se bambae yu lukaotem sam save long saed ya mo bambae yu kambak blong talem ansa long hem. Maet yu tekem janis ya tu blong tijim studen ya blong hem wan i lukaotem ol save. Sloslo, soemaot long hem olsem wanem hem i save yusum ol defren tul we ogenaesesen blong Jeova i givim blong lukaot ol save. Long rod ya, bambae hem i kam naf blong faenem ansa blong prapa kwestin blong hem.​—Wok 17:11.

Givhan Long Olgeta Blong Oli Kasem Moa Save

¹ Taem yumi stap prij, plante taem yumi mitim ol man we oli no laef insaed long teritori blong yumi no we oli toktok wan narafala lanwis, olsem fasin ya we nambut i yusum blong toktok (saen lanwis). Maet sam narafala we yumi go luk olgeta oltaem blong storian long saed blong Baebol, oli muvaot mo oli go laef long defren ples. ?Olsem wanem yumi save mekem rod blong ol man olsem oli kasem moa save? Blong mekem olsem, yumi yusum pepa ya Please Follow Up (S-43).

² Ol man oli intres moa long gud nius sipos yumi toktok long prapa lanwis blong olgeta. (Wok 22:​1, 2) Taswe, sipos yumi mitim wan man we i toktok narafala lanwis, yumi mas fulumap pepa ya nating sipos man ya i no soem intres long gud nius blong Kingdom. Be, i no nid blong yumi fulumap pepa ya sipos i gat plante man long teritori blong yumi we oli toktok lanwis ya, mo i gat samfala we oli prij oltaem long olgeta long prapa lanwis blong olgeta. Sipos i olsem, yumi nidim blong fulumap pepa ya nomo taem wan long olgeta i soemaot intres.

³ Fulumap Pepa: Wetem kaen fasin, traem blong save nem blong man ya, adres blong hem, mo telefon namba blong hem. Makemdaon sipos hem i intres bigwan no smol nomo, wanem taem yumi save faenem hem, buk we hem i karem no i askem, mo lanwis we hem i toktok gud long hem. Afta we yumi fulumap pepa ya, yumi mas givim kwiktaem long sekretari blong kongregesen, nao hem bambae i sanem i go long kongregesen no grup we i save givhan long man ya.

⁴ Sanem Pepa i Go: Sipos sekretari i no save weswan kongregesen no grup we i mas kasem pepa ya, no hem i no save adres blong olgeta, hem i save ring i go long Teritori Des long branj ofis blong kasem stret save ya. Taem hem i sanem pepa ya, i no nid blong hem i luk elda we i lukaot long olgeta kongregesen long wan taon.

⁵ Sipos wan kongregesen no wan grup i kasem pepa ya Please Follow Up we wan pablisa i fulumap finis, oli mas mekem plan kwiktaem blong go luk man ya. Taem yumi traehad blong mekemgud wok blong yumi, yumi save trastem se bambae Jeova i openem hat blong olgeta ya we i stret “blong oli kasem laef ya we i no save finis.”​—Wok 13:48.