Haf 7: Givhan Long Ol Baebol Stadi Blong Oli Gohed Gud

Mekem Prea Long Taem Blong Stadi

1. (a) ?From wanem i stret blong statem mo finisim wan Baebol stadi wetem prea? (b) ?Olsem wanem yumi save stat blong mekem prea long wan Baebol stadi?

¹ I nidim blesing blong Jeova blong ol Baebol studen oli save gohed long saed blong spirit. (1 Kor. 3:6) Taswe, i stret nomo blong mekem wan prea long stat mo long en blong stadi. Taem yumi stat blong stadi wetem olgeta we oli laekem Baebol, plante taem long faswan stadi nomo yumi save mekem prea. Be wetem ol narafala, maet yumi nidim blong luksave stret taem we yumi save stat blong mekem prea. Maet yumi save yusum Ol Sam 25:​4, 5 mo 1 Jon 5:14 blong givhan long studen blong kasem save from wanem yumi mas prea. Yumi save yusum Jon 15:16 blong eksplenem se i impoten blong prea long Jeova tru long Jisas Kraes.

2. ?Sipos wan brata we i baptaes finis no wan man we i pablisa be i no baptaes yet, i joen wetem wan sista blong mekem Baebol stadi, hu bambae i mekem prea?

² ?Hu i mas mekem prea long taem blong Baebol stadi? Sipos wan brata we i baptaes finis i joen wetem wan sista blong mekem stadi, maet sista ya we i kavremap hed blong hem i lidim stadi, be brata i mas mekem prea. (1 Kor. 11:​5, 10) Defren olgeta, sipos wan man we i wan pablisa blong Kingdom be i no baptaes yet i joen wetem wan sista blong mekem stadi, bambae sista ya nao i mekem prea. Long taem olsem, sista i mas kavremap hed blong hem taem hem i prea mo taem hem i lidim stadi.

3. ?Taem yumi mekem prea long wan Baebol stadi, wanem samting i stret blong yumi tokbaot?

³ ?Yumi Tokbaot Wanem Long Prea?: Prea we yumi mekem long taem blong stadi, i no nid blong mekem i longfala, be hem i mas kliagud. Yumi save askem long God blong hem i blesem stadi ya mo yumi save talem tangkiu from ol trutok we yumi lanem. Be tu, i stret blong yumi presem Jeova we hem i Stamba blong ol tijing we yumi kasem. (Aes. 54:13) Mo tu, yumi save talem sam tok we oli soemaot se yumi rili intres long studen ya mo se yumi gat tangkiu long ogenaesesen we Jeova i yusum.(1 Tes. 1:​2, 3; 2:​7, 8) Taem yumi askem long Jeova blong i blesem ol traehad we studen ya i mekem blong folem ol samting we hem i lanem, hemia i save givhan long studen blong i kasem save se i impoten we hem i kam wan man blong “mekem ol samting we tok ya i talem.”​—Jem. 1:22.

4. ?Wanem ol gudfala samting we i save kamaot taem yumi statem mo finisim stadi wetem prea?

⁴ Taem yumi mekem prea long wan Baebol stadi, i gat plante gudfala samting i save kamaot from. Prea i mekem se God i givim blesing blong hem. (Luk 11:13) Prea i pulum man blong hem i tinghevi moa long stadi we hem i mekem long Tok blong God. Taem studen i lesin long ol prea blong yumi, hem i lanem olsem wanem blong prea. (Luk 6:40) Antap moa, prea we i kamaot long hat we i fulap long lav blong God mo fasin tangkiu from ol nambawan fasin blong hem, i save halpem studen blong i traem blong kam fren wetem Jeova.

?Yumi Tokbaot Wanem Long Ol Magasin?

Wajtaoa Maj 15

“Raon long wol, ol man oli talem ol tok blong leftemap tijing blong Jisas. [Ridim tok we i stap long pej 3, haf 1.] ?Be yu yu ting se ol tijing ya, olsem hemia we yumitu faenem long vas ya, oli save givhan long laef blong yumi tede? [Ridim Matiu 5:​21, 22a. Nao letem man i ansa.] Magasin ya i tokbaot wanem samting Jisas i tijim mo i soemaot olsem wanem oli save givhan long yumi.”

Wekap! Jen./Maj (Bislama)

“Ol pikinini oli wan blesing, be i no isi nating blong tijim olgeta. ?Wanem i save givhan long ol papa mama blong oli stretem ol pikinini blong olgeta long fasin we i karem gudfala frut? [Letem man i ansa. Nao ridim Efesas 6:4.] Wan haf long magasin ya i givim gudfala advaes long ol papa mama blong givhan long olgeta blong oli winim traem ya.”

Wajtaoa Epr. 1

“?Yu yu bin harem sam man oli talem se save blong ol saentis mo ol tijing blong Baebol oli no laenapgud? [Letem man i ansa.] Magasin ya i tokbaot ol raorao we i stap longtaem finis bitwin ol saentis mo ol man blong jos. Be hem i tokbaot tu ol pruf blong soemaot se trufala saens i laenap gud wetem Baebol.” Soem pej 6-7. Nao ridim Prija 1:7.

Wekap! Epr. 8 (Inglis/Franis)

“?Long tingting blong yu, olsem wanem ol papa mama oli save halpem ol pikinini blong olgeta we oli gat 13 kasem 19 yia, blong oli no kasem trabol long ol yia ya we oli strong long olgeta? [Letem man i ansa. Nao ridim Aesea 48:​17, 18.] Magasin ya i soemaot se sipos ol papa mama oli folem advaes blong Baebol, hemia i save halpem olgeta blong oli gat gudfala fasin blong storian wetem pikinini blong olgeta, mo blong oli putumap sam rul we oli no strong tumas.”