Haf 8—Givhan Long Ol Baebol Stadi Blong Oli Gohed Gud

Lidim Ol Studen i Go Long Ogenaesesen

1. ?From wanem i gud blong tokbaot wan poen evri wik long saed blong ogenaesesen blong Jeova?

¹ Taem yumi mekem Baebol stadi, mak blong yumi i no jes blong tijim ol studen long ol stamba tijing blong Baebol nomo, be i blong givhan long olgeta tu blong oli joen long Kristin kongregesen. (Sek. 8⁠:23) Blong mekem olsem, buklet ya Ol Wetnes Blong Jeova Oli Joengud Blong Mekem Wok Blong God Long Olgeta Ples Blong Wol, i save givhan long yumi. Givimaot wan kopi blong buklet ya long ol niufala Baebol studen, mo leftemap tingting blong olgeta blong oli ridim. Mo evri wik long taem blong stadi, tekem sam minit blong tokbaot wan poen long saed blong ogenaesesen blong Jeova.

2. ?Olsem wanem yu yu save leftemap tingting blong ol Baebol studen blong oli joen long ol miting blong kongregesen?

² Ol Miting Blong Kongregesen: Bigfala samting we i save givhan long ol studen blong oli laekem ogenaesesen blong God, hemia se oli mas joen wetem yumi long ol miting. (1 Kor. 14⁠:​24, 25) Taswe, blong mekem olgeta oli save long ol miting ya, yu save tokbaot wan long ol miting long taem blong stadi, mo nekis taem yu tokbaot wan narafala miting bakegen, gogo yu tokbaot ol faef miting blong wik. Talemaot nem blong nekis pablik tok. Soemaot Wajtaoa we bambae kongregesen i stadi long hem long Wajtaoa Stadi, mo japta blong buk we bambae yumi stadi long hem long Buk Stadi long wik ya. Eksplenem Tiokratik Skul mo Miting Blong Kingdom Wok long olgeta. Sipos yu mas mekem wan tok long Tiokratik Skul, maet yu save traem tok ya wetem olgeta. Tokbaot ol bigfala poen we oli bin kamaot long ol miting. Yusum ol pija we oli stap long ol buk blong yumi, blong givhan long olgeta blong oli luk wanem i stap hapen long ol miting. Long faswan stadi nomo, yu save invaetem olgeta blong oli kam long miting.

3. ?Wanem ol samting long saed blong ogenaesesen we maet yumi save tokbaot?

³ Taem Memoriol, asembli, mo spesel wik, oli stap kam klosap, tekem taem blong eksplenem gud ol miting ya long fasin we bambae studen i glad blong stap long ol spesel taem ya. Sloslo, ansa long ol kwestin olsem: ?From wanem yumi karem nem ya ol Witnes blong Jeova? ?From wanem yumi singaotem haos miting blong yumi se Haos Kingdom? ?Wanem wok blong ol elda mo ol man blong givhan? ?Yumi folem wanem plan long saed blong wok blong prij mo ol teritori? ?Olsem wanem yumi wokem ol buk mo magasin? ?Ogenaesesen blong yumi i kasem mane long weples? ?Branj ofis mo Hed Kampani oli mekem wanem wok blong lukaot long evri ples?

4, 5. ?Olsem wanem ol vidio kaset blong yumi oli save pulum ol studen blong oli wokem fasin tangkiu from ogenaesesen?

⁴ Kasem Tijing From Ol Vidio Kaset: Wan narafala rod we i save givhan long ol Baebol studen blong oli luk nambawan ogenaesesen blong Jeova, hemia tru long ol vidio kaset blong yumi. Vidio kaset ya To the Ends of the Earth, i soemaot wok blong prij we i stap gohed raon long wol. Narafala we i karem nem ya Our Whole Association of Brothers, i soemaot famle blong ol brata we oli stap long olgeta ples blong wol, mo United by Divine Teaching i soemaot fasin joengud blong ol Witnes blong Jeova. Wan woman i karem ol buk mo magasin blong yumi blong faef yia, nao hem i jes lukluk vidio kaset ya Jehovah’s Witnesses​—⁠The Organization Behind the Name. Samting we hem i luk i tajem hat blong hem mo wota i kam fulap long ae blong hem. Hem i trastem finis ol Witnes we oli stap kam luk hem, be afta we hem i lukluk kaset ya, hem i harem se hem i save trastem ogenaesesen tu. Hem i stat stadi long Baebol, mo wan wik afta, hem i joen long miting long Haos Kingdom.

⁵ Sipos yumi spenem sam minit nomo evri wik blong tokbaot ogenaesesen wetem ol Baebol studen blong yumi mo yumi yusumgud ol tul we yumi gat, sloslo yumi save lidim olgeta oli kam long ogenaesesen we Jeova i stap yusum tede.

?Yumi Tokbaot Wanem Long Ol Magasin?

Wajtaoa Epr. 15

“Tede i gat plante defdefren save we ol man oli save kasem. ?I tru? [Letem man i ansa.] Be i no gat wan long olgeta we i gud moa i bitim hemia we i stap long vas ya. [Ridim Jon 17⁠:⁠3.] Magasin ya i tokbaot mining blong tok ya ‘laef we i no save finis,’ mo i tokbaot olsem wanem blong kasem save ya we i lidim yumi i go long laef ya.”

Wekap! Epr./Jun (Bislama)

“Nating we ol man oli save moa long Jisas Kraes i bitim olgeta narafala man, be plante oli stap asaskem se hem i rili hu. ?Yu yu save se ol aposol blong Jisas tu oli stap tingbaot kwestin ya? [Letem man i ansa. Biaen ridim Mak 4⁠:41.] Magasin ya i tokbaot samting we Baebol i talem long saed blong Jisas se hem i rili hu.”

Wajtaoa Mei 1

“Taem wan man we yumi laekem hem tumas i ded, i stret nomo we yumi wantem luk hem bakegen. ?Yu yu agri? [Letem man i ansa.] Plante man oli haremgud long promes blong Baebol long saed blong laef bakegen. [Ridim Jon 5⁠:​28, 29.] Magasin ya i tokbaot wetaem bambae ol dedman oli laef bakegen mo hu olgeta we bambae oli kasem blesing from.”

Wekap! Mei 8 (Inglis/Franis)

“Bighaf blong ol papa mama oli jusumgud ol film we ol pikinini blong olgeta oli save lukluk. ?Yu yu luk se i hadwok blong faenem ol gudfala film we famle blong yu i save lukluk? [Letem man i ansa. Biaen ridim Efesas 4⁠:17.] Magasin ya i tokbaot olsem wanem ol papa mama oli save givhan long ol pikinini blong olgeta blong oli jusum ol film we oli klin.”