Dei Blong Jeova i Klosap

¹ Ol Kristin oli wantem tumas we Dei blong Jeova i kam blong finisim rabis fasin blong wol ya, mo blong mekem wan niufala wol we stret fasin nomo bambae i stap long hem. (2 Pita 3⁠:​12, 13) From we yumi no save stret, wetaem dei ya bambae i kam, yumi mas gohed blong lukaotgud mo givhan long ol narafala blong oli mekem sem mak. (Esik. 33⁠:​7-9; Mat. 24⁠:​42-44) Sipos yumi tingting dip long ol profet tok blong God, bambae bilif blong yumi i kam strong moa se “Bigfala Dei ya blong Hae God i kam klosap finis.”​—⁠Sef. 1⁠:⁠14.

² Ol Defdefren Kantri We Oli Rulum Wol: Long Revelesen 17⁠:​9-11, aposol Jon i tokbaot ol “seven king” we oli saen blong ol seven kantri we oli rulum wol, wan afta long narawan. Mo tu, Jon i tokbaot “namba eit king,” we tede hem i pija blong Yunaeted Nesen. ?Olsem wanem? ?Yumi mas wet blong wan narafala kantri i tekova mo i rulum wol ya? Nogat. Profet tok i talem se namba eit king ya “bambae i go blong lus olgeta,” mo biaen i no tokbaot se wan narafala king bambae i kamaot long wol ya. Profet tok ya i givhan long yumi blong luksave se yumi stap laef long taem we i klosap long Dei blong Jeova.

³ Daniel 2⁠:​31-45 i givhan long yumi blong kasem save long Dei ya blong Jeova we i stap kam. Long profet tok ya, bigfala aedol we Nebukadnesa i luk long drim blong hem, i saen blong ol kantri we, wan afta long narawan, oli rulum wol ya. Wanwan long ol kantri ya oli rul finis. ?Weswan long ol kantri ya i stap rul tede? Hemia kantri we leg blong bigfala aedol ya i saen blong hem. Profet tok i tokbaot klia ol samting we bambae oli kamaot long fiuja. Rul blong ol man bambae i finis olgeta, mo “wan king we rul blong hem i no save finis samtaem” bambae i tekem ples blong olgeta. ?Yu yu luksave olsem wanem ol samting ya oli soemaot se Dei blong Jeova i klosap tumas?

⁴ Ol Narafala Pruf: Yumi luk long prapa ae blong yumi, sam narafala pruf we oli soemaot se Dei blong Jeova i klosap. Yumi luk ol fasin ya we aposol Pol i talem se ol man long ‘ol las dei’ bambae oli soemaot. (2 Tim. 3⁠:​1-5) Mo yumi joen long wok ya we i stap goraon long fulwol, hemia blong talemaot gud nius bifo we en i kam. (Mat. 24⁠:14) I gud we wok blong prij we yumi mekem, i gohed blong soemaot tingting ya se taem i sot, olsem tok blong enjel ya i soemaot, i se: “Yufala i mas ona gud long God, mo yufala i mas leftemap nem blong hem, from we taem i kam finis blong hem i jajem olgeta man.”​—⁠Rev. 14:6, 7.

Haf 9—Givhan Long Ol Baebol Stadi Blong Oli Gohed Gud

Mekem Ol Studen Oli Rere Blong Tekem Janis Blong Prij

¹ Taem Andru mo Filip tufala i kasem save se Jisas nao i Mesaea ya we ol profet oli talemaot se bambae i kam, tufala i no save holemtaet gudfala nius ya, tufala i talemaot long ol narafala. (Jon 1⁠:​40-45) Sem mak tede, taem ol Baebol studen oli stat blong bilivim ol samting we oli stap lanem, bambae oli wantem talemaot ol save ya. (2 Kor. 4⁠:13) ?Olsem wanem yumi save leftemap tingting blong olgeta blong oli tekem janis blong prij mo blong yumi givhan long olgeta blong oli rere blong mekem olsem?

² Maet yu jes askem long studen sipos hem i bin tokbaot ol samting we hem i lanem long Baebol wetem ol narafala. Ating i gat sam fren mo famle we hem i save askem olgeta blong oli joen long stadi. Askem long hem sipos sam fren blong hem long wok, long skul, no sam narafala bakegen, oli bin soemaot se oli intres long gud nius. Tru long rod ya, hem i save stat blong prij. Halpem hem blong i kasem save se i nidim fasin luksave, respek, mo kaen fasin, taem hem i tokbaot Jeova mo stamba tingting blong hem long ol narafala.​—⁠Kol. 4⁠:6; 2 Tim. 2⁠:​24, 25.

³ Toktok Long Saed Blong Bilif Blong Olgeta: I impoten tumas blong trenem ol Baebol studen blong oli yusum Tok blong God taem oli toktok long saed blong bilif blong olgeta. Wanwan taem long stadi, yu save askem long studen se: “?Olsem wanem bambae yu yusum Baebol blong eksplenem tijing ya long famle blong yu?” Sipos no, “?Wanem vas blong Baebol yu save yusum blong pruvum samting ya long wan fren blong yu?” Makemgud olsem wanem hem i ansa, mo soem long hem olsem wanem hem i save yusum Baebol blong tijim ol narafala. (2 Tim. 2⁠:15) Sipos yu mekem olsem, bambae yu mekem studen ya i rere blong tekem janis blong prij mo, taem we bambae hem i naf, hem i save prij tu wetem kongregesen.

⁴ I waes blong mekem ol studen oli rere blong fesem fasin agens. (Mat. 10⁠:36; Luk 8⁠:13; 2 Tim. 3⁠:12) Taem ol narafala oli askem kwestin no oli talem sam samting long saed blong ol Witnes blong Jeova, maet hemia i openem rod long ol studen blong oli prij long olgeta. Buklet ya Ol Witnes Blong Jeova​—⁠Oli Joengud Blong Mekem Wok Blong God Long Olgeta Ples Long Wol, i save givhan long olgeta blong oli “rere blong givim ansa.” (1 Pita 3⁠:15) Buklet ya i givimaot ol trufala save we ol niuwan oli save yusum, blong givhan long ol fren mo famle blong olgeta blong oli kasem save long bilif mo wok blong yumi we i stanap long Baebol.