Wok Blong Prij i Givhan Long Yumi Blong Stanap Strong Longtaem

¹ Baebol i pulum yumi blong “mekem tingting blong yumi i strong, blong yumi resis long rod ya we i stap long fes blong yumi.” (Hib. 12⁠:⁠1) Wan man blong resis i nidim blong stanap strong longtaem blong hem i save winim resis blong hem, taswe yumi tu yumi nidim blong stanap strong longtaem sipos yumi wantem kasem praes ya blong laef we i no save finis. (Hib. 10⁠:36) ?Olsem wanem Kristin wok ya blong prij i save givhan long yumi blong stanap strong gogo kasem en?​—⁠Mat. 24⁠:⁠13.

² Kam Strong Long Saed Blong Spirit: Taem yumi stap talemaot nambawan promes blong Baebol long saed blong niufala wol, yumi stap mekem we prapa hop blong yumi long saed ya i stap klia long tingting blong yumi. (1 Tes. 5⁠:⁠8) Taem yumi joen oltaem long wok blong prij, yumi gat janis blong mekem ol man oli kasem save long ol trutok we yumi lanem finis long Baebol. Yumi gat janis blong tokbaot from wanem yumi bilif olsem, mo bilif ya i givhan long yumi blong stanap strong long saed blong spirit.

³ Sipos yumi wantem tijimgud ol narafala, fastaem yumi wan yumi mas kasem save gud long Baebol. Yumi mas lukaotem moa save, mo tingting dip long stadi we yumi stap mekem. Ol traehad blong yumi bambae oli mekem se save blong yumi i kam bigwan moa, bilif blong yumi i kam strong, mo i givim moa paoa long yumi long saed blong spirit. (Prov. 2⁠:​3-5) Taswe, taem yumi traehad blong givhan long ol narafala, yumi stap mekem yumi wan yumi kam strong tu.​—⁠1 Tim. 4⁠:​15, 16.

⁴ Taem yumi stap wok strong long wok blong prij, hemia i wan impoten haf blong ‘olgeta klos blong faet, we God i givim.’ Yumi nidim ol klos ya blong yumi save stanap strong agens long Setan mo ol rabis enjel blong hem. (Efes. 6⁠:​10-13, 15) Taem yumi stap bisi long wok blong prij, hemia i givhan long yumi blong putum tingting blong yumi i stap long ol samting we oli mekem yumi stap strong, mo blong blokem wol blong Setan blong i no spolem yumi. (Kol. 3⁠:⁠2) Taem yumi tijim ol narafala long ol rod blong Jeova, oltaem bambae yumi tingbaot blong holemtaet ol klin fasin.​—⁠1 Pita 2⁠:⁠12.

⁵ God i Givim Paoa: Mo tu, taem yumi joen long wok blong prij, wok ya i tijim yumi blong trastem Jeova. (2 Kor. 4⁠:​1, 7) !Hemia i wan blesing! Taem yumi wokem fasin tras ya, yumi kam strong moa blong prij, mo yumi naf blong fesem eni samting we i save hapen long laef blong yumi. (Fil. 4⁠:​11-13) Yes, taem yumi lanem blong trastem Jeova, hemia i wan impoten samting we i lidim yumi blong stanap strong longtaem. (Sam 55⁠:22) Wok blong prij i givhan long yumi long plante rod, blong yumi save stanap strong longtaem.

Haf 10—Givhan Long Ol Baebol Stadi Blong Oli Gohed Gud

Trenem Ol Studen Long Wok Blong Prij

¹ Taem ol elda oli talemaot se wan Baebol studen i naf blong kam wan pablisa we i no baptaes, studen ya i save stat blong joen wetem kongregesen blong prij. (Lukluk Organized to Do Jehovah’s Will, pej 79-81, long Franis Organisés pour faire la volonté de Jéhovah.) ?Olsem wanem yumi save givhan long ol studen blong oli kasem mak ya blong prij long ol haos wanwan?

² Tija Mo Studen Tufala i Mekem Rere Tugeta: I impoten blong reregud. Soem long studen weples hem i save faenem ol fastok blong prij long Kingdom Wok Blong Yumi mo long buklet ya Statem Ol Storian. Biaen, halpem hem blong jusum wan fastok we i isi mo i stret long ples blong yufala. Taem hem i jes stat blong prij, leftemap tingting blong hem blong yusum Baebol.​—⁠2 Tim. 4⁠:⁠2.

³ Sipos niufala pablisa i mekem pleplei long haos blong lanem olsem wanem blong prij, hemia bambae i givhan long hem. Taem hem i stap mekem pleplei ya, soem long hem olsem wanem hem i save ansa wetem kaen fasin long ol toktok we ol man ples oli stap talem oltaem blong blokem yumi. (Kol. 4⁠:⁠6) Mekem hem i kasem save se ol Kristin we oli stap prij, oli no nid blong save ansa blong evri kwestin we maet wan man i askem long wok blong prij. Plante taem i moagud we oli talem se bambae oli go stadi moa long kwestin ya mo kambak blong storian long saed ya.​—⁠Prov. 15⁠:⁠28.

⁴ Prij Tugeta: Faswan taem we studen i prij long ol haos wanwan, letem hem i wajem olsem wanem yu yu toktok folem pleplei we yutufala i bin rere long hem. Biaen, talem long hem blong hem tu i tokok. Samtaem, maet i moa gud sipos studen i jes toktok smol nomo, olsem ridim mo tokbaot wan vas. I gud blong tingbaot fasin blong hem mo samting we hem i naf blong mekem. (Fil. 4⁠:​5, NW ) Taem yu trenem hem sloslo long olgeta haf blong wok blong prij, oltaem yu mas talem ol gudfala toktok long hem from ol traehad blong hem.

⁵ I impoten blong givhan long niufala pablisa blong hem i stanemap wan program blong joen oltaem long wok blong prij, i gud we hem i no mestem wan wik. (Fil. 3⁠:16) Mekem wan stret plan blong yutufala i prij tugeta, mo leftemap tingting blong hem blong i prij wetem ol narafala pablisa tu we oli gat gat strong tingting long wok blong prij. Eksampol mo fasin fren blong olgeta bambae i givhan long hem blong kamgud moa blong prij long ol haos wanwan mo blong faenem glad long wok ya.