LONG ol lanwis we ol man oli raetem Baebol long hem fastaem, oli putum Hibru tok ya sheʼohlʹ mo Grik tok ya haiʹdes bitim 70 taem long Baebol. Tufala tok ya oli long saed blong ded. Sam Baebol oli tanem Hibru mo Grik tok ya i kam “gref,” “hel,” no “hol.” Be long plante lanwis, i no gat tok we i laenap stret wetem mining blong tufala tok ya long lanwis Hibru mo Grik. From samting ya nao, Baebol ya New World Translation i livim tufala tok ya nomo i stap se “Seol” mo “Hades.” ?Wanem mining blong tufala tok ya? I gud yumi luk olsem wanem Baebol i yusum tufala tok ya long sam vas.

Prija 9:10 i talem se: “Olgeta samting we han blong yu i save mekem, i gud yu mekem wetem paoa blong yu. From we i no gat wok no plan no save no waes long Seol, ples ya we bambae yu yu go long hem.”a ?Olsem wanem? ?Seol i minim stret gref no hol ya we yumi berem wan fren no famle blong yumi long hem? Nogat. Taem Baebol i tokbaot wan hol we oli berem dedman long hem, hem i yusum wan narafala tok long Hibru mo Grik lanwis, be i no yusum tufala tok ya sheʼohlʹ mo haiʹdes. (Jenesis 23:​7-9; Matiu 28:1) Mo tu, Baebol i no yusum tok ya “Seol” blong minim wan hol we oli berem plante man long hem, olsem wan gref we oli putum ol memba blong wan famle long hem, no wan hol we oli berem plante man wantaem long hem. Nogat.​—Jenesis 49:​30, 31.

?Ale “Seol” i minim wanem samting? Tok blong God i soem se “Seol” mo “Hades” i minim wan samting we i bigwan moa i bitim gref we oli berem wan dedman no plante dedman long hem. Tingbaot tok blong Aesea 5:14 long Baebol long Bislama. Vas ya i talem se Seol hem i “hanggri tumas, we maot blong hem i stap open bigwan.” Nating se Seol i “solemdaon” plante dedman finis, be hem i hanggri yet, i olsem we hem i neva fulap. (Ol Proveb 30:​15, 16) Wan gref i save holem smol man nomo. Be Baebol i talem se Seol i wan ples we “oltaem i gat rum blong man i go long hem.” (Ol Proveb 27:​20, Baebol long Bislama) Yes, Seol i neva fulap. Hem i no gat mak blong hem. Taswe, Seol mo Hades i no wan prapa ples. Be hem i minim nomo, ples we olgeta dedman oli slip long hem, hemia beregraon.

Tijing blong Baebol long saed blong laef bakegen i givhan long yumi blong kasem moa save long tufala tok ya “Seol” mo “Hades.” Tok blong God i yusum Seol mo Hades blong minim ded we man bambae i save aot long hem.b (Job 14:13; Ol Wok 2:31; Revelesen 20:13) Mo tu, Tok blong God i soem se olgeta dedman we oli stap long Seol, no Hades, hemia ol man blong Jeova wetem plante man tu we oli no man blong hem. (Jenesis 37:35; Ol Sam 55:15) Taswe, Baebol i tijim se “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.”​—Ol Wok 24:​15, Baebol long Bislama.

?LONG tingting blong yu, Jajmen Dei bambae i olsem wanem? Plante man oli ting se long dei ya olgeta bilian man wanwan bambae oli kam stanap long fored blong bigfala jea blong God. Ale God bambae i givim jajmen we i stret long olgeta wanwan. Samfala bambae oli kasem gudfala laef long heven, mo samfala bambae oli go panis long helfaea. Be Baebol i soemaot se taem ya hem i defren long wanem we i stap long tingting blong plante man. Tok blong God i soemaot se hem i wan taem we ol samting bambae oli jenis mo oli kam gud bakegen. Hem i no wan taem blong mekem man i fraet.

Long Revelesen 20:​11, 12 (NW ) yumi save ridim tok blong aposol Jon long saed blong Jajmen Dei: “Mi luk wan bigfala waet jea, we i olsem jea blong king, mo i gat wan man i stap sidaon long hem. Wol mo heven, tufala i ronwe long fes blong man ya, mo i no moa gat ples blong tufala. Nao mi luk olgeta dedman, olgeta we oli haeman mo olgeta we oli no gat nem, oli stanap fored long bigfala jea blong King. Nao i gat sam buk oli open. Mo wan narafala buk tu i open, hemia buk blong laef. Nao oli jajem ol dedman long ol samting we i stap long ol buk ya, stret long ol wok blong olgeta.” ?Hu ya Man ya we i jajem ol dedman?

Jeova God nomo i Haefala Jaj blong olgeta man. Be hem i putum wok ya blong jajem ol man long han blong wan narafala man. Long Ol Wok 17:​31, aposol Pol i talem se ‘God i putum dei finis we bambae hem i save jajem olgeta man long wol long fasin we i stret nomo, mo hem i jusumaot finis man ya we bambae hem i yusum blong jajem olgeta man.’ Man ya we God i jusum, hemia Jisas Kraes we i laef bakegen finis long ded. (Jon 5:22) ?Be Jajmen Dei i stat wetaem? ?Bambae hem i longwan olsem wanem?

Buk blong Revelesen i soem se Jajmen Dei i stat afta long faet ya Amagedon. Faet ya nao we bambae i finisim wol ya blong Setan.a (Revelesen 16:​14, 16; 19:​19–20:3) Afta long Amagedon, Setan mo ol rabis enjel blong hem bambae oli go kalabus long bigfala hol ya we i godaon we i godaon. Bambae oli stap kalabus gogo wan taosen yia i pas. Long taem ya, ol 144,000 man we God i pemaot olgeta long wol ya blong go long heven, bambae oli mekem wok blong jaj mo oli “joen wetem Kraes, we hem i King, nao oli rul wetem hem, gogo wan taosen yia i pas.” (Revelesen 14:​1-3; 20:​1-4; Rom 8:17) I klia se Jajmen Dei i no wan sotfala taem olsem 24 aoa nomo. Hem i wan taem we bambae i gohed blong wan taosen yia.

Long wan taosen yia ya, Jisas Kraes bambae i ‘jajem olgeta man, olgeta we oli laef, wetem olgeta we oli ded.’ (2 Timoti 4:1) “Olgeta we oli laef,” hemia “bigfala kampani” blong ol man we oli pastru long Amagedon from we God i sevem olgeta. (Revelesen 7:​9-17, NW ) Mo tu, aposol Jon i luk ‘olgeta dedman, . . . oli stanap fored long bigfala jea blong King’ blong kasem jajmen. Yes, Jisas i mekem promes ya finis se “ol dedman bambae oli harem voes blong [hem], nao bambae oli aot long beregraon blong olgeta.” (Jon 5:​28, 29; Ol Wok 24:15) ?Be bambae hem i jajem ol man ya folem wanem samting?

Long vison we aposol Jon i luk, “i gat sam buk oli open,” mo “oli jajem ol dedman long ol samting we i stap long ol buk ya, stret long ol wok blong olgeta.” ?Ol samting we oli stap long ol buk ya i minim ol wok we ol man ya oli mekem bifo? Nogat. Jajmen ya bambae i no stanap long ol samting we ol man ya oli mekem bifo we oli ded. ?Olsem wanem yumi save samting ya? Hemia from we Baebol i talem se: “Taem wan man i ded, hem i fri long olgeta sin [blong hem].” (Rom 6:​7, NW ) Yes, taem wan dedman i laef bakegen, i olsem we hem i klin long fes blong God. Taswe, ating samting we oli raetem long ol buk ya hemia ol niufala loa blong God. Blong kasem laef we i no save finis, ol man we oli pastru long Amagedon mo ol man we oli laef bakegen long ded, bambae oli mas obei long ol loa blong God, wetem ol niufala loa tu we maet Jeova i putumap long wan taosen yia ya. Kraes bambae i jajem ol man ya folem wanem we bambae oli mekem long taem blong Jajmen Dei.

Long Jajmen Dei, plante bilian man we oli no bin save Jeova bambae oli gat janis blong save hem. Bambae oli lanem wanem samting we God i wantem blong oli mekem, nao bambae oli save mekem ol samting ya i wok long laef blong olgeta. Hemia i min se bambae i gat wan bigfala wok i gohed, hemia wok blong tijim ol man. Yes, “bambae ol man oli lanem mining blong stret fasin.” (Aesea 26:9) Be, i no olgeta man ya evriwan we bambae oli wantem mekem laef blong olgeta i laenap wetem wanem we God i wantem. Aesea 26:10 i talem se: “Nating we yu yu stap mekem i gud long ol man nogud, be neva olgeta oli lan, neva olgeta oli stap mekem ol stret fasin. Mo nating we olgeta oli stap long medel blong ol stret man, be oli stap gohed blong mekem ol fasin nogud, mo oli no save luksave we yu yu King we yu hae we yu hae.” Ol man olsemia bambae oli ded blong olwe, nating se Dei blong Jajmen i no finis yet.​—Aesea 65:20.

Olgeta man we oli stap gogo kasem we Jajmen Dei i finis, bambae i olsem we oli “laef bakegen” fulwan from we bambae oli stretgud olgeta. (Revelesen 20:5) Yes, Jajmen Dei ya bambae i mekem ol man oli kam stretgud olgeta olsem faswan man mo woman we God i wokem. (1 Korin 15:​24-28) Ale nao, laswan traem bambae i kamaot. Bambae oli letem Setan i aot long kalabus blong hem i traem olgeta man laswan. (Revelesen 20:​3, 7-10) Olgeta man we bambae oli winim traem ya, bambae oli luk promes ya blong Baebol i kamtru fulwan long olgeta, se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) !Yes, Jajmen Dei bambae i wan blesing long olgeta man we oli stap tru long God!