Japta 11

?Nem Blong Yu i Stap Long Buk Blong Laef?

SADIS

1. ?Olsem wanem long kongregesen blong Sadis long saed blong speret? ?Wanem fastok blong mesej we Jisas i sanem long olgeta?

FOTE eit kilomita saot long taon ya we tede oli kolem Akisar (Tuatira), i gat wan kongregesen, Sadis. Jisas i sanem nekiswan mesej i go long hem. Biaen long 600 B.K.T., taon ya i bigfala taon blong olfala nesen ya Lidia. Mo hem i taon blong king ya we i rij tumas, King Croesus. Long taem blong Jon, taon ya i kasem hadtaem. Mo ol naes mo rij samting we hem i gat aninit long rul blong Croesus i finis. Sem mak long Kristin kongregesen long ples ya. Olgeta tu oli kam puaman long saed blong speret. Jisas i no statem mesej ya wetem sam gudfala toktok blong leftemap tingting blong olgeta. Hemia fastaem we Jisas i mekem olsem. Hem i tok long olgeta, i se: “Yu mas raetemdaon tok ya blong mi i go long enjel blong [kongregesen] long Sadis, se ‘Hemia tok blong mi ya we mi gat ol seven speret blong God, wetem ol seven sta tu. Mi mi save finis fasin blong [yu] long Sadis. Mi save we ol man oli stap talem se [yu yu] laef, be [yu yu] ded.’ ”—Revelesen 3:1.

2. (a) ?From we Jisas i gat “ol seven speret,” samting ya i minim wanem long ol Kristin long Sadis? (b) ?Ol man oli stap talem se kongregesen blong Sadis i olsem wanem? ?Samting ya i rili tru, no no gat?

² ?From wanem Jisas i talem se hem nao “i gat ol seven speret”? From we ol speret ya oli minim tabu speret blong Jeova, we hem i kafsaedem fulwan. Biaen, Jon i talem se ol speret ya oli olsem “seven ae.” Samting ya i minim se tabu speret i mekem we Jisas i save lukluk evri samting i klia nomo. (Revelesen 5:6) Taswe, hem i save mekem enikaen trabol i kam long klia ples mo stretem. (Matyu 10:26; 1 Korin 4:5) Ol man oli stap talem se kongregesen blong Sadis i laef, i stap wok strong. Be Jisas i luksave se hem i ded long saed blong speret. I klia se bighaf blong ol memba blong hem oli no moa kea, oli karem bakegen tingting ya we oli holem fastaem, bifo we oli kam Kristin man.—Skelem wetem Efesas 2:1-3; Hibrus 5:11-14.

3. (a) ?From wanem “enjel blong [kongregesen] long Sadis” i mas makemgud we Jisas i holem “seven sta” ya? (b) ?Jisas i givim wanem strong advaes long kongregesen blong Sadis?

³ Jisas i talem bakegen long “enjel blong [kongregesen] long Sadis” se Jisas nao i holem “ol seven sta.” Hem i holem ol elda ya blong kongregesen long raethan blong hem, olsem we hem i gat raet mo paoa blong lidim olgeta long wok blong olgeta blong lukaot long ol sipsip. Olgeta oli mas traehad long hat blong olgeta blong ‘save gud ol sipsip blong God.’ (Proveb 27:23) Taswe oli mas lesingud long nekis tok blong Jisas, se: “[Yu] mas wekap bakegen. [Yu] mas mekem smol laef ya we i stap long [yu] yet i kam strong bakegen, from we kolosap [yu yu] ded olgeta. Mi mi no faenem wan gudfala wok yet blong [yu] we [yu yu] finisim, we i stret gud long fes blong God blong mi. Oraet, [yu] mas stap tingbaot toktok we olgeta oli tijim [yu] long hem bifo, we [yu yu] harem finis. [Yu yu] mas holemgud toktok ya, nao [yu] mas tanem tingting blong [yu] from ol sin blong [yu]. Sipos [yu] no wekap bakegen, bambae mi mi kam long [yu] olsem we man blong stil i kam, we bambae [yu] no save long wanem taem bambae mi kamtru long [yu].”—Revelesen 3:2, 3.

4. ?Olsem wanem ol tok blong Pita i save givhan long kongregesen blong Sadis blong ‘mekem smol laef ya we i stap long olgeta yet i kam strong bakegen’?

⁴ Ol elda long Sadis oli mas tingbaot olsem wanem oli glad taem oli kasem trutok fastaem, mo ol blesing we oli bin kasem long taem ya. Be naoia oli ded long saed blong speret. Olgeta long kongregesen, kolosap laet blong olgeta i ded, from we oli no mekem ol wok we i mas joen wetem bilif blong olgeta. Plante yia bifo, aposol Pita i raetem leta i go long ol kongregesen long Esia (ating i go long Sadis tu). Hem i traehad blong bildimap fasin tangkyu long hat blong ol Kristin ya from gud nyus we oli akseptem finis. Olgeta we oli talemaot gud nyus ya long ol Kristin ya fastaem, oli mekem “long paoa blong tabu speret ya we God i sanemaot long heven i kam.” Ol seven speret long vison blong Jon oli saen blong paoa ya. Mo tu Pita i talem bakegen long ol Kristin long Esia se olgeta oli ‘man blong wan ples nomo, we olgeta i tabu man blong God. Olgeta i olsem ol man we God i tekemaot olgeta i blong hem nomo. God i mekem olsem long olgeta, blong bambae olgeta i save talemaot ol gudfala wok blong hem. Hem i singaot olgeta finis blong olgeta i aot long tudak, olgeta i kam long gudfala laet blong hem.’ (1 Pita 1:12, 25; 2:9) Sipos olgeta long kongregesen blong Sadis oli tingtinggud long ol trutok olsem long saed blong speret, samting ya bambae i givhan long olgeta blong tanem tingting blong olgeta from sin blong olgeta, mo blong ‘mekem smol laef we i stap long olgeta yet i kam strong bakegen.’—Skelem wetem 2 Pita 3:9.

5. (a) ?Wanem i hapen long fasin tangkyu blong ol Kristin blong Sadis? (b) ?Sipos ol Kristin blong Sadis oli no harem advaes blong Jisas, bambae wanem i hapen long olgeta?

⁵ Long taem ya, fasin tangkyu mo lav blong trutok we i stap long hat blong olgeta i olsem wan faea we kolosap i ded. Smosmol laet blong faea nomo i stap. Jisas i pulum olgeta blong mekem faea ya i kam bigwan, blong wekemap tingting blong olgeta, blong tanem tingting blong olgeta from ol sin we slak fasin i lidim olgeta blong mekem. Hem i wantem se oli kam wan kongregesen we i laef bakegen long saed blong speret. (Skelem wetem 2 Timote 1:6, 7.) Sipos no, taem Jisas bambae i kamtru olsem wan “man blong stil” blong jajem ol man, kongregesen ya long Sadis bambae oli sek long hem, bambae oli no rere.—Matyu 24:43, 44.

Bambae Hem i Kam Olsem “Man Blong Stil”

6. ?Long 1918, olsem wanem Jisas i kam olsem “man blong stil”? ?Mo hem i faenemaot se ol man we oli stap talem se oli man blong hem, oli talem tru, no no gat?

⁶ Woning blong Jisas se bambae hem i kam olsem “man blong stil,” i stret long yumi tede tu. Hem i gat wan spesel mining long ol Kristin we oli laef i stap taem dei blong Masta i stat. I no longtaem biaen long 1914, profet tok blong Malakae i kamtru, we i se: “ ‘Wantaem nomo, tru Masta we yufala i stap lukaotem hem, Hem bambae i kam long haos blong Hem. Mo man blong karem tok blong kontrak, we yufala i harem gud tumas long hem, hem tu bambae i kamtru. Tru ya, bambae hem i kamtru.’ Jeova blong ol ami i tok olsem.” (Malakae 3:1; Revelesen 1:10) Jisas, we hem i “man blong karem tok blong kontrak,” hem i kam blong jekemap mo jajem olgeta we oli stap talem se oli man blong hem. (1 Pita 4:17) Long taem ya we hem i kamtru, hemia long 1918, ol skul blong Krisendom oli stap mekem fulap blad i ron long Faswan Bigfala Faet Blong Wol. Ol skul ya oli ded olgeta long saed blong speret. Bifo long faet ya, ol trufala Kristin oli wok strong blong prij. Be afta, olgeta tu oli slip long saed blong speret. Sam elda we oli hae, ol man oli sakem olgeta oli go long kalabus. Mo wok blong prij, kolosap i stop olgeta. Long nekis yia blong hem, taem tabu speret blong Jeova i wekemap ol Kristin ya, i no olgeta evriwan we oli rere. Samfala oli olsem ol yang gel long parabol blong Jisas, olgeta oli no waes. Oli no rere long saed blong speret blong mekem wok blong Jeova. Be i gud we fulap long olgeta oli olsem ol waes yang gel long parabol ya. Olgeta oli harem woning blong Jisas se: “Oraet, yufala i mas lukaot gud, from we yufala i no save dei blong samting ya mo haoa blong hem.”—Matyu 25:1-13.

7. ?From wanem ol Kristin tede oli mas wekapgud?

⁷ I no long stat blong dei blong Masta nomo we ol Kristin oli mas wekapgud mo stap rere. Long bigfala profet tok we hem i givim long saed blong “saen we bambae i soemaot we i stret taem blong ol samting ya,” Jisas i givim strong woning ya, se: “Be dei blong samting ya, mo taem blong hem, i no gat man naoia we i save. . . . Yufala i mas lukaot gud, oltaem yufala i mas rere, from we yufala i no save taem ya we olgeta samting ya bambae oli kam. Be tok ya we mi talem long yufala, mi stap talem long olgeta man, se ‘Yufala i mas lukaot gud.’ ” (Mak 13:4, 32, 33, 37) Yes, kam kasem naoia, yumi evriwan, nating we yumi blong smol kampani no bigfala kampani, be oltaem yumi mas rere, yumi mas wekapgud blong yumi no slak long saed blong speret gogo yumi slip olgeta. Taem dei blong Jeova i kamtru “olsem wan man blong stil, we i kamtru long naet,” yumi mas stap wekapgud blong yumi save kasem pei blong yumi.—1 Tesalonaeka 5:2, 3; Luk 21:34-36; Revelesen 7:9.

8. ?Tede olsem wanem grup we i olsem Jon bifo oli wekemap ol man blong God blong oli stap strong long saed blong speret?

⁸ Tede, grup we i olsem Jon bifo oli wekapgud. Oli luksave nid blong wekemap ol man blong God blong oli stap strong long saed blong speret. Blong mekem olsemia, evri yia oli ogenaesem ol spesel asembli long olgeta ples long wol. I no longtaem, long wan yia nomo, long 1,297 distrik asembli, i gat 7,020,459 man i kam. Mo 136,103 man oli tekem baptaes. Bitim wan handred yia we i pas, grup ya we i olsem Jon bifo oli yusum Wajtaoa magasin blong talemaot nem blong Jeova mo plan blong hem. Long tu bigfala faet blong wol, ol Wetnes blong Jeova oli kasem bigfala trabol. Be Wajtaoa i wekemap tingting blong olgeta blong wok strong bakegen. Sam magasin oli karem store olsem: “Olgeta We Oli No Fraet Bambae Oli Kasem Blesing” (1919), “Mifala i Singaot Yufala Blong Girap Mo Wok Strong” (1925), mo “Winim Ol Trabol” (1942).

9. (a) ?Olgeta Kristin oli mas tingbaot wanem kwestin? (b) ?Olsem wanem Wajtaoa i leftemap tingting blong yumi?

⁹ Sem mak long Sadis, i impoten we ol Kristin long ol kongregesen tede tu oli stap skelem fasin blong olgeta. Oltaem yumi wanwan i mas tingbaot sam kwestin olsem: ?Mi mi ‘finisim ol gudfala wok we i stretgud long fes blong God’? ?Mi stap jajem narafala, no mi wan mi rere blong livim sam samting we mi mi wantem mo traehad blong mekem wok blong God long olgeta laef blong mi? Long saed ya, Wajtaoa magasin i karem sam gudfala store blong pulum yumi, olsem: “?Yu Yu Stap Mekem Ol Samting We Yu Nomo Yu Wantem, No Yu Yu Rere Blong Livim Sam Samting Olsem?” mo “Yufala i Mas Faet Strong.”a Yumi save yusum ol advaes ya we i kamaot long Baebol blong skelem ol dip tingting blong yumi. Semtaem, yumi mas prea mo holem tingting daon blong fasgud oltaem long Jeova.—Ol Sam 26:1-3; 139:23, 24.

“Sam Man Long Yufala”

10. ?Long kongregesen blong Sadis, Jisas i talemaot wanem gudfala poen blong leftemap tingting blong olgeta? ?Samting ya i mas mekem se yumi tingting olsem wanem?

¹⁰ Nekis tok we Jisas i talem long kongregesen blong Sadis i blong leftemap tingting blong olgeta. Hem i se: “Be [yu gat sam nem, “NW”] long Sadis we oli no mekem rabis fasin, olsem we klos blong olgeta i no doti. Olgeta ya bambae oli putum waet klos blong olgeta, oli wokbaot wetem mi, mo i stret nomo blong oli mekem olsem, from we oli mekem gudfala wok. Olgeta man we bambae oli win long faet blong olgeta, bambae oli putum waet klos olsem olgeta ya. Nao nem blong olgeta, bambae mi no save tekemaot long buk ya we nem blong ol man we oli gat laef i stap long hem. Mo long fes blong Papa blong mi, mo long fes blong ol enjel blong hem, bambae mi talemaot i klia we olgeta ya oli man blong mi.” (Revelesen 3:4, 5) ?Olsem wanem? ?Ol tok ya oli wekemap yumi mo oli mekem tingting blong yumi i strong blong holemtaet bilif blong yumi? Sipos ol elda long wan kongregesen oli slak, oli save mekem se ful kongregesen i slip long saed blong speret. Be maet sam insaed long kongregesen ya oli no fraet blong gohed, blong holem Kristin nem blong olgeta i stap klin mo tabu. From samting ya, wanwan oli save holem gudnem blong olgeta long fes blong Jeova.—Proveb 22:1.

11, 12. (a) ?Long taem blong bigfala apostasi, olsem wanem samfala oli olsem “sam man” long Sadis we oli holemtaet bilif blong olgeta? (b) ?Long dei blong Masta, wanem samting i mekem ol Kristin we oli olsem ‘wit’ oli haremgud?

¹¹ “Klos blong olgeta” i minim stret fasin we i makem olgeta se oli Kristin man. (Skelem Revelesen 16:15; 19:8.) Ating Jisas i glad we “sam man,” long Sadis, sam Kristin we tabu speret i makemaot olgeta, oli stap holem klin mo stret fasin we i makem ol Kristin man, nating we bighaf long kongregesen oli no moa kea. Sem mak long ol handred yia blong bigfala apostasi. Long taem ya, bighaf blong ol man we oli talem se oli Kristin oli joen long ol fasin blong Bigfala Babilon, hemia ol gyaman skul blong wol. Be oltaem i gat sam man we oli traehad blong gohed long wok blong Jeova, nating we namba blong olgeta i smol nomo. Ol man ya oli haed long medel blong ol defren kaen rabis skul, olsem ‘wit’ we i haed long medel blong ol ‘rabis gras.’—Revelesen 17:3-6; Matyu 13:24-29.

¹² Jisas i promes se bambae hem i stap wetem ol Kristin we oli olsem ‘wit’ “gogo wol ya i finis.” Hem i save hu ya ol gudfala Kristin ya, mo gudnem we oli bin mekem long fes blong Jeova. (Matyu 28:20; Eklesiastis 7:1) !Tingbaot glad blong ‘smol namba’ blong ol gudfala man we oli laef i stap taem dei blong Masta i stat! Long taem ya nao, oli kamaot long Krisendom we hem i ded long saed blong speret, mo oli hivap long wan stret kongregesen we i samting olsem kongregesen blong Smana.—Matyu 13:40-43.

13. ?Ol Kristin we tabu speret i makemaot olgeta, “we klos blong olgeta i no doti,” bambae oli kasem wanem blesing?

¹³ Olgeta long Sadis we oli holem bilif go kasem en, we oli no letem gudfala Kristin nem blong olgeta i kam doti, oli save kasem nambawan blesing we oli bin wet long hem. Taem Jisas i stanemap finis Kingdom blong hem long heven long 1914, hem i mekem olgeta oli laef bakegen long speret bodi. Ol man ya we oli win long faet blong olgeta, hem i flasem olgeta wetem waet klos we i soemaot se oli stret man, oli no gat doti long olgeta no enikaen narafala samting blong spolem fasin blong ol. Oli wokbaot finis long smol rod ya we i go kasem laef, nao oli save haremgud blong olwe long presen we oli kasem.—Matyu 7:14; lukluk long Revelesen 6:9-11.

!Long Buk Blong Laef Blong Olwe!

14. ?Wanem ya “buk blong laef”? ?Hu ol man we nem blong olgeta i stap insaed long buk ya?

¹⁴ ?Wanem ya “buk blong laef”? ?Hu ya olgeta we nem blong olgeta i stap insaed long hem? Buk blong laef i minim lis blong ol man blong Jeova we oli naf blong kasem presen ya, laef we i no save finis. (Malakae 3:16) Revelesen i tokbaot nem blong ol Kristin we tabu speret i makemaot olgeta. Be nem blong olgeta we oli naf blong kasem laef blong olwe long wol tu oli stap insaed long buk ya. Mo tu, God i save ‘tekemaot’ nem blong man long buk ya. (Eksodas 32:32, 33) Olgeta blong grup ya we oli olsem Jon bifo, we nem blong olgeta i stap long buk blong laef gogo oli ded, bambae oli kasem laef long heven, we oli no moa save ded samtaem. (Revelesen 2:10) Hemia nem blong ol man we Jisas bambae i talemaot i klia se oli man blong hem long fes blong Papa blong hem mo long fes blong ol enjel blong hem. !Presen ya i nambawan tumas!

15. ?Olsem wanem ol memba blong bigfala kampani oli save mekem se nem blong olgeta i stap long buk blong laef blong olwe?

¹⁵ Bigfala kampani, we nem blong olgeta i stap long buk blong laef tu, bambae oli laef tru long taem blong bigfala trabol. Sipos oli soemaot bilif gogo Wan Taosen Yia Rul blong Jisas mo laswan traem long en blong wan taosen yia ya i pas, bambae oli kasem presen ya, laef blong olwe long Paradaes long wol. (Daniel 12:1; Revelesen 7:9, 14; 20:15; 21:4) Long taem ya, nem blong olgeta bambae i stap long buk blong laef blong olwe. ?Taem yu kasem save long ol samting ya we tabu speret i soemaot, yu yu glad blong mekem wanem? Jisas i talem bakegen se: “Man we i gat sora blong hem i mas lesingud long tok we Tabu Speret i stap talem long ol [kongregesen].” (Revelesen 3:6) ?Yu yu glad blong mekem olsem?

[Futnot]

[Tok Blong Pija Long Pej 57]

Nem blong yu i save stap long buk blong laef