23. ?Wanem mining blong “fulap ae” blong ol fo anamol ya? ?Ol sikis wing blong ol jerubim (3 + 3) oli makem wanem poen?

²³ Jon i storeyan moa long ol samting we hem i luk, i se: “Ol fo anamol ya evriwan oli gat sikis wing blong olgeta, mo oli gat fulap ae blong olgeta, we i kavremap bodi blong olgeta long insaed blong hem mo long afsaed blong hem tu. Nao long dei mo long naet, oli no spel nating, oli stap singsing, se ‘Hae God ya [Jeova, “NW”] we i God blong yumi, we i gat olgeta paoa, hem i tabu we tabu we tabu. Hem i stap fastaem, bifo olgeta, hem i stap naoia, mo hem bambae i kam.’ ” (Revelesen 4:8) Oli gat fulap ae blong olgeta. Samting ya i minim se oli save lukluk klia mo lukluk i go longwe. Ol fo anamol ya oli mekem samting ya oltaem nomo, from we oli no nidim blong slip. Oli folem fasin blong Jeova, from we Baebol i talem se: “Long saed blong Jeova, ae blong hem i lukluk i go long olgeta ples long wol, blong soemaot paoa blong hem taem hem i givhan long olgeta we hat blong olgeta i fulwan long hem.” (2 Kronikel 16:9) Ol jerubim oli gat fulap ae. Taswe oli save lukluk i go long evri ples. Oli luk evri samting we i hapen. Taswe oli nafgud blong givhan long God long jajmen wok blong hem. Long saed blong Jeova, Baebol i talem se: “Ae blong Jeova i stap lukluk i go long evri ples. Hem i stap lukluk ol nogud man mo ol gud man tu.” (Proveb 15:3) Mo ol fo anamol ya, evriwan oli gat sikis wing blong olgeta. Namba ya sikis hem i olsem 3 + 3. Mo Baebol i yusum namba ya tri blong makemgud wan poen. Taswe ol wing ya oli minim se ol jerubim oli save spid olsem laetning, blong talemaot ol jajmen blong Jeova mo blong mekem olgeta oli kamtru.

24. ?Olsem wanem ol jerubim oli presem Jeova? ?Wanem mining blong singsing ya?

²⁴ !Yu lesin! Ol jerubim oli stap singsing long wan sing we i gud tumas, i save tajem hat blong yumi. Oli presem Jeova olsem: “Hae God ya [Jeova, NW] we i God blong yumi, we i gat olgeta paoa, hem i tabu we tabu we tabu. Hem i stap fastaem, bifo olgeta, hem i stap naoia, mo hem bambae i kam.” Bakegen, oli talemaot tabu fasin blong Jeova tri taem, blong makem poen ya. Ol jerubim ya oli talemaot strong tabu fasin blong Jeova God. Jeova i Stampa blong tabu fasin. Mo i no gat narafala man we i save kasem mak blong tabu fasin blong Jeova. Mo tu, hem i “King blong olwe.” Oltaem hem i “Alfa mo Omega, faswan mo laswan, stat mo en.” (1 Timote 1:17, NW; Revelesen 22:13, NW) Ol jerubim oli no spel nating, oli gohed nomo blong talemaot ol nambawan fasin blong Jeova long olgeta man.

25. ?Olsem wanem ol anamol ya mo ol 24 elda oli joen blong ona long Jeova?

²⁵ !Nao heven we i antap we i antap i fulap long singsing blong presem Jeova! Jon i eksplenem vison blong hem moa, i se: “Nao ol anamol ya oli stap sing blong leftemap nem blong God ya we i laef, mo i no save ded samtaem, we i stap sidaon long bigfala jea blong hem. Mo oli stap ona long hem, oli stap talem tangkyu long hem. Mo evritaem oli mekem olsem, ol twantefo elda ya tu oli foldaon long fes blong hem, oli mekem wosip long hem. Oli tekemaot hat blong olgeta we oli olsem hat blong king, oli sakemdaon long fran blong bigfala jea blong hem. Mo oli talem se ‘ [ Jeova, “NW” ] yu yu Masta blong mifala, yu yu God blong mifala. Yu yu mekem olgeta samting blong wol fastaem, mo from we yu yu wantem olsem, yu holem olgeta samting ya oli stap, mo yu givim laef long olgeta. From samting ya, i stret nomo blong ol man oli leftemap nem blong yu, mo blong oli foldaon, oli ona long yu, mo blong oli stap aninit long paoa blong yu oltaem.’ ” (Revelesen 4:9-11) !I no gat plante haf long Baebol we i givim bigfala ona long God mo Hae Masta blong yumi, Jeova, olsem haf ya i givim!

26. ?From wanem ol 24 elda oli sakemdaon hat blong king blong olgeta long fored blong bigfala jea blong Jeova?

²⁶ Ol 24 elda oli gat sem tingting olsem Jisas. Mo oli tekemaot hat blong olgeta we oli olsem hat blong king, oli sakemdaon long fran blong bigfala jea blong Jeova. Oli no traem leftemap olgeta nating long fored blong God. Oli gat tingting daon, oli luksave se risen from wanem olgeta oli king, i blong ona long Jeova mo leftemap nem blong hem nomo, olsem Jisas i mekem oltaem. (Filipae 2:5, 6, 9-11) Oli gat fasin obei, oli luksave se oli smol nomo. Mo oli talemaot se rul blong olgeta i dipen long hae rul blong Jeova nomo. Long hat blong olgeta, oli glad blong joen wetem ol jerubim mo ol narafala samting we God i wokem, blong presem mo blong leftemap God ya we i wokem olgeta samting.—Ol Sam 150:1-6.

27, 28. (a) ?Ol samting we Jon i eksplenem long vison ya i mas pulum yumi blong mekem wanem? (b) ?Wanem ol kwestin we oli stanap long saed blong nekiswan samting we Jon i luk mo i harem?

²⁷ !Vison ya blong Jon i mas tajem hat blong yumi evriwan! !Hem i nambawan mo i gat bigfala paoa! Be hemia i wan vison nomo. Traem tingbaot olsem wanem ol trufala samting we Jon i luk long vison ya oli mas saengud. Olgeta man we oli gat tangkyu long Jeova, taem oli tingbaot haenem blong hem, oli wantem joen wetem ol fo anamol ya mo ol 24 elda blong presem God. Blong mekem olsem, oli prea, mo oli talemaot nem blong Hem long fes blong olgeta man. Hemia nao God ya we ol Kristin tede oli save wetnes long hem se hem i tru. !Hemia i wan bigfala blesing ya! (Aesea 43:10) Yumi no mas fogetem se vison blong Jon i stret long dei blong Masta, hemia taem blong yumi naoia. “Ol seven speret blong God” oli stap olwe blong lidim mo givim paoa long yumi. (Galesia 5:16-18) Tede yumi gat Tok blong God, Baebol, blong givhan long yumi blong stap tabu long wosip blong tabu God ya. (1 Pita 1:14-16) Tru ya, yumi hapi blong ridim profet tok ya long bigfala voes. (Revelesen 1:3, NW) !Hem i pulum yumi blong stap tru long Jeova, mo blong blokem ol samting blong wol we oli save pulum yumi blong no moa presem hem!—1 Jon 2:15-17.

²⁸ Jon i eksplenem finis wanem we hem i luk taem wan voes i singaot hem blong pastru long doa we i open, blong kam insaed long heven. Bigfala samting we hem i bin tokbaot: Hem i luk Jeova, we i sidaon long bigfala jea blong hem, we haenem mo paoa blong hem oli naes tumas. Raonabaot long hem, i gat wan ogenaesesen we i bigwan moa i bitim ol narafala ogenaesesen. Oli saenaot olsem wan bigfala laet, mo oli obei mo stap tru long God. Kot blong God i rere nao. (Daniel 7:9, 10, 18) Hem i rere blong wan bigfala samting i hapen. ?Wanem ya? ?Olsem wanem samting ya i gat paoa long yumi tede? !Yumi wet long nekiswan samting we Jon i lukluk!

1. ?Wanem nekiswan samting we Jon i luk long vison blong hem?

!NAMBAWAN! !Hem i mekem man i seksek! Hemia nao vison blong bigfala jea blong Jeova long medel blong ol faea we oli laet, ol jerubim, ol 24 elda, mo solwora we i saen olsem glas. Nao yumi wantem askem se: ‘E, Jon, ?biaen yu yu luk wanem narafala samting?’ Jon i tokbaot samting we i stap long medel blong ol samting ya long heven, i se: “Nao mi luk wan buk we i stap long raethan blong God ya we i stap sidaon long bigfala jea blong hem. Oli raet long hem finis, [long fored mo long baksaed blong hem, “NW”] nao oli satem, mo oli lokem long seven lok. Nao mi luk wan enjel we i gat bigfala paoa i stanap, i singaot bigfala, i se ‘?Hu man we i stret gud, we i naf blong brekemaot ol lok ya, mo blong openem buk ya?’ Be i no gat wan man i stap long heven, no long wol, no long ples blong ol dedman, we i save openem buk ya, i save lukluk insaed long hem. Nao mi harem nogud tumas, mi krae, from we i no gat wan man i stap we i stret gud, we i naf blong openem buk ya, mo blong lukluk insaed long hem.”—Revelesen 5:1-4.

2, 3. (a) ?From wanem Jon i wantem tumas we wan man i naf blong openem buk ya? ?Be i luk olsem we wanem bambae i hapen? (b) ?Tede, ol man blong God we hem i makemaot olgeta wetem tabu speret oli bin wet long wanem?

² Jeova hem wan, we hem i Hae Rula mo Masta blong olgeta samting, hem nao i holem buk ya. I klia se buk ya i gat fulap save long hem, from we raeting i stap long fored blong hem mo long baksaed blong hem tu. Nao yumi wantem save: “?Wanem i stap insaed long buk ya?” Yumi tingbaot we Jeova i bin singaot Jon, i se: “Yu kam antap long ples ya, nao bambae mi soemaot long yu ol samting we bambae oli kamtru.” (Revelesen 4:1) Taswe yumi wantem tumas blong save long ol samting ya, we oli stap long buk ya. !Be sore tumas, oli satem buk ya finis, mo oli lokem long seven lok!

³ ?Enjel we i gat bigfala paoa, bambae hem i faenem wan man we i naf blong openem buk ya? Kingdom Interlinear Baebol i talem se buk ya i stap “antap long raethan” blong Jeova. Taswe i luk olsem we han blong Jeova i open, nao buk i stap antap long hem. Be i luk olsem we i no gat man long heven no long wol we hem i naf blong tekem buk ya mo blong openem. Ol gudfala man blong God we oli stap long ples blong ol dedman finis, olgeta tu oli no naf blong kasem bigfala ona ya. !Nao yumi save from wanem Jon i harem nogud tumas! Maet hem i ting se i no moa gat jans blong kasem save long “ol samting we bambae oli kamtru.” Tede tu, ol man blong God we tabu speret i makemaot olgeta, oli bin wet long Jeova blong i sanem laet mo trutok long saed blong Revelesen i kam long olgeta. Sloslou hem i mekem olsem, long stret taem we profet tok ya i mas kamtru, blong lidim ol man blong hem long rod we bambae ‘hem i sevem olgeta.’—Ol Sam 43:3, 5.

Man We Hem i Naf

4. (a) ?Hu ya i naf blong openem buk mo blong brekem ol lok blong hem? (b) ?Grup ya tede we i olsem Jon bifo, wetem ol fren blong olgeta, oli kasem wanem presen mo blesing?

⁴ !Yes, i gat wan man we hem i naf blong openem buk ya! Jon i talem se: “Nao wan long ol elda ya i talem long mi, i se ‘Yu no krae. Yu luk. I gat wan man we hem i nambawan long olgeta ya long laen blong Juda, [hem i rus blong Deved, “NW”], mo i win long faet blong hem finis. Hem nao i stret blong brekemaot ol seven lok ya mo blong openem buk ya.’ ” (Revelesen 5:5) !Oraet, Jon i save ravemaot wora long ae blong hem nao! Grup ya tede we i olsem Jon wetem ol fren blong olgeta, oli bin wet wetem longfala tingting blong kasem moa laet long ol profet tok ya. Semtaem, oli stanap strong plante yia finis long ol bigfala traem we oli kasem. Taswe yumi glad we naoia yumi save kasem moa save long vison ya. Hemia i olsem wan presen. !Mo yumi glad we yumi save talemaot mesej blong profet tok ya long ol man! !Long rod ya, i olsem we yumi save givhan blong mekem profet tok ya i kamtru!

5. (a) ?Wanem profet tok ya long saed blong Juda? ?Ol man long laen blong Juda oli rul wea? (b) ?Hu ya Silo?

⁵ !A, “Laeon blong Juda”! Jon i savegud long profet tok we bubu blong ol man Isrel, Jekob, i talemaot long namba fo pikinini blong hem, Juda, i se: “Yu yu olsem wan laeon, we i go kilim anamol, i kakae finis, i kambak long hol blong hem, nao i ledaon, i stretem bodi blong hem, mo olgeta man oli fraet long hem, i no gat man i save go wekemap hem. Wan long olgeta we bambae i kamaot biaen long yu bambae i kam king, i holem wokingstik blong hem, mo olgeta we bambae oli kamaot biaen long hem oltaem bambae oli holem paoa blong rul, olgeta ya nomo bambae oli stap kam king, gogo [Silo, NW] i kam, nao olgeta man bambae oli obei long hem.” (Jenesis 49:9, 10) Ol man blong God we oli rul olsem king oli kamaot long laen blong Juda. Olgeta king we oli rul long Jerusalem, i stat long Deved i go kasem taem we ol man Babilon oli spolem taon ya, oli kamaot long laen blong Juda. Be i no gat wan long olgeta we hem i Silo we Jekob i talemaot long profet tok blong hem. Silo i minim se “hem we i gat raet.” Profet tok ya i makem Jisas, we naoia Kingdom blong Deved i stap long han blong hem blong olwe.—Esikel 21:25-27; Luk 1:32, 33; Revelesen 19:16.

6. ?Olsem wanem Jisas i “wan smol branj” blong Jese? ?Mo olsem wanem hem i “rus blong Deved”?

⁶ Kwiktaem nomo Jon i haremsave tok ya “rus blong Deved.” Sam narafala profet tok oli talem se Mesaea i olsem “wan smol branj we i kamaot long stampa ya Jese [papa blong King Deved],” olsem “wan gru” mo “rus blong Jese [we] bambae i stanap olsem wan saen long olgeta man.” (Aesea 11:1, 10) Jisas i olsem smol branj ya blong Jese, from we hem i kamaot long laen blong ol king, hemia laen blong Deved, we hem i pikinini blong Jese. Mo tu, hem i olsem rus blong Jese, from we hem nomo i mekem laen blong Deved i gru bakegen. I olsem we hem i putum laef long laen ya mo i mekem i stap laef blong olwe.—2 Samuel 7:16.

7. ?From wanem Jisas nomo hem i naf blong tekem buk ya long han blong Hem we i stap sidaon long bigfala jea?

⁷ Jisas i winim ol narafala man, from we taem hem i kam long wol olsem wan stret man, hem i holemtaet bilif blong hem long Jeova, nating we i kasem bigbigfala traem. Hem i ansa fulwan long kwestin we Setan i stanemap. (Proveb 27:11) Taswe long naet bifo we hem i ded, hem i save talem se: “Mi mi winim ol samting blong wol ya finis.” (Jon 16:33) From samting ya, Jeova i mekem Jisas i laef bakegen long ded, mo i givim “olgeta paoa . . . long heven mo long wol” long hem. Long olgeta man blong God, hem nomo i naf blong tekem buk ya, mo talemaot impoten mesej we i stap long hem.—Matyu 28:18.

8. (a) ?Long saed blong Kingdom, wanem i soemaot se Jisas hem i naf? (b) ?From wanem i stret we wan long ol 24 elda i talemaot long Jon man ya we hem i naf blong openem buk ya?

⁸ Yes, i stret nomo we Jisas i openem buk ya. Long 1914, hem i kam King long Kingdom blong Mesaea blong God. Mo buk ya i talemaot plante samting we Kingdom ya bambae i mekem. Taem Jisas i stap long wol, hem i wok strong blong talemaot Kingdom trutok ya. (Jon 18:36, 37) Hem i tijim ol man blong hem blong prea se Kingdom blong God bambae i kam. (Matyu 6:9, 10) Long stat blong Kristin taem, hem i statem wok blong talemaot gud nyus blong Kingdom. Mo hem i talemaot profet tok ya se long taem blong en, bambae wok blong prij i mas kasem bigfala mak blong hem. (Matyu 4:23; Mak 13:10) Mo i stret we wan long ol 24 elda i talemaot long Jon se Jisas bambae i openem buk ya. ?From wanem? From we ol elda ya oli rul wetem Kraes long Kingdom blong hem, oli sidaon long jea blong king mo oli putum hat blong king tu.—Rom 8:17; Revelesen 4:4.