Yu No Mas Lusum Lav We Yu Gat Fastaem
1 Long faswan handred yia, taem Jisas i gobak long heven finis, hem i givim advaes long kongregesen blong Efesas se: “I gat wan fasin we yufala i mekem we i no stret long fes blong mi. Yufala i no moa lavem mi olsem we yufala i lavem mi fastaem.” (Rev. 2:4) I luk olsem se plante Kristin oli no moa lavem Jeova olsem we oli lavem hem fastaem. Taem yumi lanem trutok, yumi stat blong lavem Jeova mo ol man raonabaot long yumi, mo yumi mekem lav ya i kam strong moa. Hemia i mekem se yumi gat strong tingting blong talemaot ol gudfala promes blong fiuja we yumi jes kasem save long olgeta. ?Wanem samting bambae i givhan long yumi blong no lusum lav ya mo blong yumi no kam slak long wok blong prij?
2 Stadi Wanwan Mo Joen Long Ol Miting: ?Taem yumi jes lanem trutok, wanem samting i mekem se yumi lavem God mo ol man? Hemia olgeta save we yumi lanem long saed blong Jeova taem yumi stap stadi Baebol. (1 Jon 4:16, 19) Taswe, blong mekem se ‘yumi stap lavlavem yumi moa,’ yumi mas gohed blong kasem stret save, yumi mas lukluk i go dip long “ol tingting blong God.”—Fil. 1:9-11; 1 Kor. 2:10.
3 Long ol las dei ya, plante samting i save pulum tingting blong yumi no i mekem yumi wari. Taswe, i no isi blong gohed folem wan program oltaem blong stadi yumi wan. (2 Tim. 3:1) Yumi mas makemaot wan stret taem blong kasem ol kakae long saed blong spirit. I impoten tu blong joen oltaem long ol miting blong kongregesen, antap moa taem yumi “save se Dei ya we Masta blong yumi bambae i jajem olgeta man long hem, hem i kam klosap finis.”—Hib. 10:24, 25.
4 Wok Blong Prij: Sipos yumi wok strong long wok blong prij, hemia tu bambae i givhan long yumi blong holemtaet lav ya we yumi gat long God. Taem yumi stap talemaot gud nius, yumi mekem yumi wan i tingtingbak long ol promes we Jeova i givim wetem lav. Hemia i givhan long yumi blong mekem olgeta oli stap klia long tingting blong yumi mo blong mekem se lav blong yumi i no lus. Blong yumi tijim narafala long ol trutok blong Baebol, yumi wan yumi mas kasem save klia long ol trutok ya. Blong mekem olsem, yumi mas lukaotem save long ol buk mo magasin, mo hemia bambae i mekem bilif blong yumi i kam strong.—1 Tim. 4:15, 16.
5 I stret nomo we Jeova i kasem evri samting, wetem lav blong yumi tu. (Rev. 4:11) Yu no mas letem lav blong yu i godaon. Blong holemtaet lav ya we yu yu gat fastaem, yu mas gohed strong blong stadi yu wan, joen oltaem long ol miting, mo wok strong blong talemaot long ol narafala samting we yu yu laekem moa i bitim ol narafala samting.—Rom 10:10.