Halpem Ol Baebol Stadi Blong Oli Kam Man Blong Talemaot Gud Nius Blong Kingdom
1 Wok we Jisas i givim long ol disaepol blong hem, we i stap long Matiu 28:19, 20, i wan bigbigfala wok. Jisas i talem long ol disaepol blong hem se oli mas wok strong blong pulum moa man i kam disaepol, nao olgeta ya tu bambae oli save pulum ol narafala blong oli kam disaepol. Wok we i stat long taem ya i olsem fandesen blong laswan wok blong talemaot gud nius blong Kingdom blong God long olgeta ples long wol long taem blong en, hemia taem we yumi stap laef long hem naoia.—Mat. 24:14.
2 Maet ol Baebol stadi ya oli ol pikinini blong yumi no sam narafala we oli wantem blong stadi wetem yumi. Yumi wantem tumas blong givhan long ol man olsem, blong olgeta tu oli save halpem narafala blong kam disaepol blong Kraes.—Luk 6:40.
3 Rerem Ol Baebol Stadi From Wok Blong Prij: Givhan long olgeta we yumi stadi wetem olgeta blong oli tokbaot long ol narafala samting we oli lanem. Tokbaot ol stori blong wok blong prij we i save leftemap tingting blong olgeta. Trenem ol pikinini blong yufala taem oli smol yet mo folem save blong olgeta, blong oli save naf gud blong joen long wok blong prij. (Sam 148:12,13) Ol toktok mo fasin blong yumi oli mas soemaot se wok blong prij i impoten tumas long laef blong yumi.—1 Tim. 1:12.
4 Jeova i yusum olgeta ya nomo we oli agri mo obei long ol rul blong hem we oli stretgud olgeta. I tru, ol niufala pablisa oli no gat semfala save olsem ol pablisa we oli givim laef blong olgeta finis long God, we oli baptaes mo we oli stap longtaem finis long trutok. Be nating se olsem, ol niuwan ya oli mas bilif mo oli mas naf blong eksplenem ol stamba tijing blong Baebol. (Lukluk Organized buk p. 79-82.) Ol niufala pablisa ya oli mas ol man we oli aot finis long ‘Bigfala Babilon’ mo oli no moa joen long politik, mo oli mas kam oltaem long ol Kristin miting.—Rev. 18:2, 4; Jon 17:16; Hib. 10:24, 25.
5 Sipos yu luk se wan long ol Baebol stadi blong yu i naf blong kam pablisa we i no baptaes, yu mas talemaot long presiden elda. Bambae hem i mekem plan wetem tu elda mo yu, blong storian wetem Baebol stadi blong yu. Ale bambae oli luk sipos Baebol stadi blong yu i naf blong kam wan pablisa we i no baptaes, long kongregesen blong yufala. Biaen bambae yu save glad bigwan blong gohed blong trenem Baebol stadi blong yu taem yu prij wetem hem.