Statem Stadi Long Buk Ya ?Wanem Samting We Baebol i Rili Tijim?

Plante long yumi oli harem se sipos oli save statem wan Baebol stadi, bambae oli glad blong gohed evri wik blong mekem stadi ya. Niufala buk ya, ?Wanem Samting We Baebol i Rili Tijim? i save givhan long yumi. Fastok blong buk ya long pej 3-7 i blong statem wan storian long saed blong Baebol wetem ol man, mo blong yusum buk ya long storian blong yumi. Olgeta we oli jes stat blong prij, olgeta tu bambae oli faenem i isi blong statem ol stadi long buk ya.

◼ Yu save yusum pej 3 mo traem rod ya:

Afta we yu tokbaot wan nius no wan trabol we i mekem ol man long ples blong yu oli wari, pulum tingting blong man blong haos i go long ol kwestin we oli stap long blak leta long pej 3, mo askem tingting blong hem. Biaen, go long pej 4-5.

◼ Sipos no, maet blong stat, yu laekem moa blong tokbaot ol poen long pej 4-5:

Yu save talem se: “Bambae i gud tumas sipos ol samting i save jenis tede, mo kam olsem ol pija ya oli soem. ?I tru?” Sipos no, yu save askem se: “?Bambae yu yu laekem blong luk weswan long ol promes ya i kamtru?” Lesin gud long ansa blong man blong haos.

Sipos man i intres moa long wan pija, soemaot long hem wanem samting we Baebol i tijim long saed ya. Blong mekem olsem, yutufala i save lukluk ol haf long buk we oli tokbaot vas ya. (Lukluk bokis long pej ya.) Tokbaot ol haf ya long sem fasin we yu stap folem taem yu mekem wan Baebol stadi. Yu save mekem olsem long faef no ten minit nomo, long faswan taem we yu prij long man long doa blong hem.

◼ Wan narafala rod i blong yusum pej 6 blong pulum ol man blong talemaot tingting blong olgeta:

Pulum tingting blong man i go long ol kwestin we oli stap long en blong pej ya, mo askem se: “?Yu bin tingbaot wan long ol kwestin ya?” Sipos hem i intres long wan long olgeta, tanem pej i go long ol haf long buk we oli ansa long kwestin ya. (Lukluk bokis long pej ya.) Taem yu tokbaot ol haf ya wetem hem, yu stap lidim wan Baebol stadi.

◼ Yu save yusum pej 7 blong soem long man blong haos olsem wanem blong mekem wan Baebol stadi:

Ridim ol faswan toktok long pej ya, mo biaen, go long japta 3 mo yusum haf 1-3 blong soemaot olsem wanem blong stadi. Mekem plan blong gobak mo tokbaot ansa blong tufala kwestin long haf 3.

◼ Mekem plan blong gobak: Long en blong faswan stadi, mekem plan blong gohed long storian ya. Maet yu save talem se: “Long sam minit nomo yumitu bin lanem samting we Baebol i talem long saed blong wan impoten poen. Nekis taem, bambae yumitu save tokbaot [putumap wan kwestin we yutufala i save tokbaot]. ?Olsem wanem? ?Long nekis wik mi save kambak long sem taem olsem?”

Taem yumi stap kam klosap moa long stret taem we Jeova i makemaot blong finisim rabis wol ya, hem i stap gohed blong givim evri samting we yumi nidim blong mekem wok ya we hem i putum long han blong yumi. (Mat. 28:​19, 20; 2 Tim. 3:17) I gud we yumi yusumgud niufala tul ya we i nambawan blong statem ol Baebol stadi.

Olsem Wanem Blong Seremaot Buk Ya, ?Wanem Samting We Baebol i Rili Tijim?

Long pepa ya, i gat ol defren fastok blong seremaot buk ya Baebol i Tijim. Blong ol fastok ya oli wokgud, yu save talem olgeta long prapa tok blong yu, mekem oli laenap wetem ol man long ples blong yu, mo yu mas save ol impoten poen long buk ya we yu save yusum blong storian wetem ol man. Yu save yusum sam narafala fastok tu we oli wokgud long ples blong yufala.​—Lukluk Kingdom Wok Blong Yumi blong Jenuware 2005, pej 8.

Amagedon

◼ “Taem ol man oli harem tok ya ‘Amagedon,’ plante oli tingbaot wan bigfala trabol we bambae i mekem olgeta man long wol oli lus. ?Olsem wanem? ?Bambae yu yu sapraes sipos yu kasem save se Amagedon i wan samting we bambae yumi glad blong luk i kamtru? [Letem man i ansa. Biaen, ridim Revelesen 16:​14, 16.] Makemgud haf ya we i tokbaot se laef bambae i olsem wanem afta long Amagedon.” Openem buk i go long pej 82-84, mo ridim haf 21.

Baebol

◼ “Plante taem ol man oli tokbaot Baebol se hem i Tok blong God. ?Samtaem yu yu stap tingbaot se, olsem wanem yumi save talem se wan buk we ol man nomo oli raetem hem i Tok blong God? [Letem man i ansa. Biaen, ridim 2 Pita 1:21 mo haf 5 long pej 19-20.] Buk ya i talem ansa we Baebol i givim long saed blong ol kwestin ya.” Soem ol kwestin long pej 6.

◼ “Long taem blong yumi, ol man oli save kasem plante moa save i bitim bifo. ?Be yu yu ting se weples nao yumi save faenem gudfala advaes we i save givhan long yumi blong gat wan laef we i hapi mo i gud? [Letem man i ansa. Biaen ridim 2 Timoti 3:​16, 17 mo haf 12 long pej 23.] Buk ya i eksplenem olsem wanem yumi save laef long fasin we God i glad long hem mo we i givhan long yumi.” Soem bokis mo pija long pej 122-123.

Ded/Laef Bakegen

◼ “Plante man oli wantem save, wanem i hapen taem man i ded. ?Yu ting se yumi save kasem save long samting ya? [Letem man i ansa. Biaen, ridim Prija 9:5 mo haf 5-6 long pej 58-59.] Mo tu, buk ya i eksplenem promes we Baebol i talem long saed blong laef bakegen blong olgeta we oli ded.” Soem pija long pej 75.

◼ “Taem wan man we yumi laekem hem tumas i ded, i stret nomo we yumi wantem luk hem bakegen. ?Yu yu agri? [Letem man i ansa.] Plante man oli haremgud long promes blong Baebol long saed blong laef bakegen. [Ridim Jon 5:​28, 29 mo haf 16-17 long pej 71-72.] Japta ya i givim ansa tu long ol kwestin ya.” Soem ol faswan kwestin long pej 66.

Laef Blong Olwe

◼ “Bighaf blong ol man oli wantem gat gudfala helt mo longfala laef. ?Be olsem wanem? ?Yu yu glad sipos yu save laef olwe? [Letem man i ansa. Biaen, ridim Revelesen 21:​3, 4 mo haf 17 long pej 54.] Buk ya i tokbaot olsem wanem yumi save kasem laef we i no save finis, mo se laef bambae i olsem wanem taem promes ya i kamtru.”

Famle

◼ “Yumi evriwan i wantem gat wan hapi famle. ?Yu yu agri? [Letem man i ansa.] Baebol i talem wan samting we evriwan long famle oli save mekem blong famle i save hapi​—hemia se, oli save folem fasin blong God blong soem lav.” Ridim Efesas 5:​1, 2 mo haf 4 long pej 135.

Haos

◼ “Long plante ples, i hadwok naoia blong faenem wan haos we i no sas tumas. ?Yu ting se wan dei bambae i gat naf gudfala haos blong olgeta man? [Letem man i ansa. Biaen, ridim Aesea 65:​21, 22 mo haf 20 long pej 34.] Buk ya i eksplenem olsem wanem promes ya blong God bambae i kamtru.”

Jeova God

◼ “Plante man we oli bilif long God, bambae oli laekem sipos oli save harem se oli stap klosap long hem. ?Yu yu save se Baebol i askem long yumi blong yumi kam klosap long hem? [Letem man i ansa. Biaen ridim Jemes 4:8a mo haf 20 long pej 16.] Oli wokem buk ya blong givhan long ol man blong yusum prapa Baebol blong olgeta, blong kasem save moa long God.” Soem ol faswan kwestin long pej 8.

◼ “Plante man oli prea blong nem blong God i kam tabu. ?Samtaem yu stap tingbaot se wanem nem ya blong God? [Letem man i ansa. Biaen ridim Ol Sam 83:18 mo haf 2-3 long pej 195.] Buk ya i eksplenem samting we Baebol i tijim long saed blong Jeova God mo stamba tingting blong hem long saed blong ol man.”

Jisas Kraes

◼ “Olgeta man long wol oli save long saed blong Jisas Kraes. Samfala oli talem se hem i wan impoten man nomo. Sam narafala oli wosipim hem olsem we hem i God ya we i Hae Olgeta. ?Yu ting se i impoten we bilif blong yumi i stret, long saed blong Jisas Kraes?” Letem man i ansa. Biaen, ridim Jon 17:3 mo haf 3 long pej 37-38. Pulum tingting i go long ol kwestin aninit long nem blong japta.

Prea

◼ “?Samtaem yu stap tingbaot olsem wanem God i stap ansa long prea blong ol man? [Letem man i ansa. Biaen ridim 1 Jon 5:​14, 15 mo haf 16-18 long pej 170-172.] Japta ya i eksplenem tu from wanem yumi mas prea long God, mo wanem samting yumi mas mekem blong hem i lesin long ol prea blong yumi.”

Ol Jos

◼ “Plante man oli stat blong luk ol jos olsem stamba blong problem blong ol man, be i no olsem rod blong stretem ol trabol. ?Yu ting se ol jos oli stap lidim ol man i go long stret rod? [Letem man i ansa. Biaen, ridim Matiu 7:​13, 14 mo haf 5 long pej 145-146.] Japta ya i tokbaot sikis mak we oli save givhan long yumi blong luksave wosip ya we God i agri long hem.” Soem lis we i stap long pej 147.

Trabol/Safa

◼ “Taem wan man i ded no i gat wan disasta no aksiden, plante man oli stap askem sipos God i rili kea long ol man mo sipos hem i stap luk ol trabol we oli mekem man i safa. ?Samtaem yu yu stap tingbaot samting ya? [Letem man i ansa. Biaen, ridim 1 Pita 5:7 mo haf 11 long pej 11.] Buk ya i eksplenem olsem wanem God bambae i tekemaot olgeta trabol we oli stap mekem ol man oli safa.” Soem ol faswan kwestin long pej 106.

Faet/Pis

◼ “Ol man long evri ples oli wantem tumas blong stap long pis. ?Yu yu ting se hop ya blong pis long wol i jes wan drim? [Letem man i ansa. Biaen, ridim Ol Sam 46:​8, 9.] Buk ya i tokbaot olsem wanem God bambae i mekem stamba tingting blong hem i kamtru mo i putum pis long fulwol.” Soem pija long pej 35, mo tokbaot haf 17-21 long pej 33-34.

[Bokis blong pija long pej 5]

Rod Blong Tokbaot Presen Mane

“Sipos yu yu glad blong givim smol presen mane tede blong sapotem wok blong mifala long fulwol, bambae mi glad blong akseptem.”

“Nating se ol buk blong mifala oli no gat praes long olgeta, mifala i akseptem smol presen mane blong sapotem wok blong mifala long olgeta ples long wol.”

“Maet yu stap askem se, olsem wanem mifala i kasem mane blong sapotem wok ya. Wok blong mifala i gohed long fulwol from ol presen mane nomo we ol man oli givim. Sipos yu wantem givim wan smol presen mane tede, bambae mi glad blong akseptem.”

(1) Askem Kwestin, (2) Ridim Vas, Mo (3) Soem Japta

Wan isi rod blong seremaot buk ya, ?Wanem Samting We Baebol i Rili Tijim? hemia blong (1) askem wan kwestin blong kasem save tingting blong man, (2) ridim wan vas we i laenap wetem kwestin ya, (3) pulum tingting blong man i go long wan japta long buk ya mo ridim ol kwestin we oli stap aninit long nem blong japta. Sipos man blong haos i intres, yu save yusum ol faswan haf blong japta ya blong soemaot long hem olsem wanem blong stadi Baebol. Yumi save folem rod ya blong statem stadi long faswan taem we yumi prij long wan man, no taem yumi gobak blong mekem visit.

◼ “?Yu yu ting se ol man oli naf blong kasem save long God ya we i gat olgeta paoa mo i wokem olgeta samting, olsem Baebol i talem long ples ya?” Ridim Ol Wok 17:​26, 27, mo letem man i ansa. Biaen, tokbaot japta 1.

◼ “?Wetem ol problem we yumi fesem tede, yu ting se yumi save haremgud mo faenem hop olsem vas ya i tokbaot?” Ridim Rom 15:​4, mo letem man i ansa. Biaen, tokbaot japta 2.

◼ “?Sipos yu yu gat bigfala paoa, bambae yu mekem ol jenis ya oli kamtru?” Ridim Revelesen 21:​4, mo letem man i ansa. Biaen, tokbaot japta 3.

◼ “?Yu yu ting se wan dei ol pikinini blong yumi bambae oli haremgud long laef, olsem wan man blong bifo i tokbaot long singsing blong hem?” Ridim Ol Sam 37:​10, 11, mo letem man i ansa. Biaen, tokbaot japta 3.

◼ “?Yu yu ting se wan dei ol tok ya oli save kamtru?” Ridim Aesea 33:​24, mo letem man i ansa. Biaen, tokbaot japta 3.

◼ “?Samtaem yu stap tingbaot sipos ol dedman oli save ol samting we yumi stap mekem?” Letem man i ansa. Biaen, ridim Prija 9:​5, mo tokbaot japta 6.

◼ “?Yu yu ting se wan dei bambae yumi luk bakegen ol famle mo fren blong yumi we oli ded finis, olsem we Jisas i talem long ol vas ya?” Ridim Jon 5:​28, 29, mo letem man i ansa. Biaen, tokbaot japta 7.

◼ “?Long tingting blong yu, olsem wanem wil blong God bambae i kamaot long wol ya olsem we i kamaot finis long heven, folem ol tok long Lodsprea ya?” Ridim Matiu 6:​9, 10, mo letem man i ansa. Biaen, tokbaot japta 8.

◼ “?Yu yu ting se profet tok ya i stap kamtru long taem blong yumi?” Ridim 2 Timoti 3:​1-4, mo letem man i ansa. Biaen, tokbaot japta 9.

◼ “Plante man oli stap asaskem se from wanem ol trabol tede oli stap kam moa nogud. ?Samtaem yu stap tingbaot ansa we vas ya i givim?” Ridim Revelesen 12:​9, mo letem man i ansa. Biaen, tokbaot japta 10.

◼ “?Samtaem yu yu wantem kasem save long ansa blong kwestin ya?” Ridim Job 21:​7, mo letem man i ansa. Biaen, tokbaot japta 11.

◼ “?Yu yu ting se advaes ya blong Baebol i save givhan long ol man blong oli gat wan hapi famle?” Ridim Efesas 5:​33, mo letem man i ansa. Biaen, tokbaot japta 14.

Sipos yumi soem long wan man olsem wanem blong stadi, mo afta long samting ya yumi mekem stadi tu taem wetem hem, mo sipos i luk olsem se man ya bambae i gohed blong mekem stadi, ale, yumi save raetem Baebol stadi ya long ripot blong yumi.