Yumi Gat Sam Samting We Yumi Save Givim Long Jeova
1 ?Yu yu save se ol man oli naf blong givim sam samting i go long God? Ebel i givim sam long ol beswan anamol we hem i gat i go long Jeova. Noa mo Job tufala i givim beswan sakrefaes tu. (Jen. 4:4; 8:20; Job 1:5) I tru se ol presen ya oli no save mekem Man ya we i Wokem olgeta samting i rij moa, from we ol samting ya oli blong hem finis. Be ol samting we ol trufala man blong hem oli givim, i blong soemaot bigfala lav we oli gat long God. Tede yumi save yusum taem, paoa, mane, mo ol narafala sas samting blong yumi, blong givim presen i go long Jeova, olsem ‘sakrefaes blong leftemap nem blong hem.’—Hib. 13:15.
2 Taem: !I gud tumas taem yumi lego ol samting we oli no impoten mo “pemaot” taem blong mekem moa long wok blong prij! (Efes. 5:15, 16) Maet yumi nidim blong jenisim program blong yumi, blong yumi naf blong joen long wok blong haftaem paenia, long wan manis no plante manis long wan yia. Sipos yumi no save mekem haftaem paenia, maet yumi save spenem moa taem long wok blong prij. !Sipos yumi spenem 30 minit moa long wok blong prij evri wik, bambae yumi mekem klosap 2 aoa moa long wan manis!
3 Paoa: Blong yumi kasem naf paoa blong mekem wok blong prij, i nidim we yumi stap longwe long ol pleplei mo ol wok we oli save mekem yumi kam taed tumas, nao yumi no save mekem bes blong yumi long wok blong Jeova. Mo yumi no mas wari tumas from ol samting we oli save mekem tingting blong yumi i kam “hevi,” nao yumi no moa gat paoa we yumi nidim blong mekem wok blong God. (Prov. 12:25) !Nating we maet yumi stap tingting long wan samting we i stret nomo blong wari from, be i moa gud we yumi ‘putum ol trabol blong yumi long Hae God’!—Sam 55:22; Fil. 4:6, 7.
4 Mane Mo Ol Narafala Samting: Yumi save givim mane mo sam narafala samting blong yumi blong sapotem wok blong prij. Pol i leftemap tingting blong ol Kristin se, oltaem oli mas ‘putumgud sam mane [mo sam samting] blong olgeta i stap,’ blong oli save givim long olgeta we oli sot long sam samting. (1 Kor. 16:1, 2) Long sem fasin, yumi save putum sam mane i stap blong givim long kongregesen long ples blong yumi, blong pem sam samting we kongregesen i nidim, mo blong givhan long wok blong Kingdom long olgeta ples long wol. Jeova i glad taem yumi givim presen wetem fulhat blong yumi, nating we i smol nomo.—Luk 21:1-4.
5 Jeova i givim plante samting long yumi. (Jem. 1:17) Yumi talem tangkiu long hem taem yumi givim paoa, mane, taem, mo sam narafala samting blong yumi, blong mekem wok blong hem. Sipos yumi mekem olsem, bambae Jeova i glad long yumi, from we “God i lavem man we i save givim samting long gladhat blong hem.”—2 Kor. 9:7.