Blong Gat Strong Tingting Blong Prij, Yumi Mas Prea Mo Tingting Dip

1. ?Wanem i halpem Jisas blong putum tingting blong hem i stap strong long impoten wok ya?

¹ Long wan sapa, Jisas i spenem taem blong mekem ol sikman oli kam gud bakegen mo i ronemaot ol devel. Long nekis dei blong hem, ol disaepol oli kam luk hem, nao oli talem long hem se: “Olgeta man oli stap lukaot yu.” Ale, oli traem pulum Jisas blong hem i gohed blong mekem ol merikel. Be Jisas i no jenisim tingting blong hem long impoten wok ya we hem i mas mekem, hemia wok blong talemaot gud nius. Hem i ansa long olgeta se: “I gud yumi go long ol narafala vilej raonabaot long ples ya blong mi prij long olgeta, from we mi mi kam long ples ya blong mekem wok ya.” ?Wanem i halpem Jisas blong putum tingting blong hem i stap strong long wok ya? Hem i naf blong mekem olsem, from we hem i girap long eli moning blong prea mo tingting dip. (Mak 1:32-39) ?Olsem wanem fasin blong prea, mo tingting dip, oli save halpem yumi blong gat strong tingting blong prij?

2. ?Yumi mas tingting dip long wanem samting, blong yumi save gat strong tingting long wok blong prij?

² ?Yumi Tingting Dip Long Saed Blong Wanem? Jisas i luk we ol man ya “oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Mat. 9:36) Long sem fasin, yumi save tingbaot se i gat plante man yet, we oli nidim blong harem gud nius. Mo yumi save tingbaot tu se i no gat plante taem i stap. (1 Kor. 7:29) Yumi save tingting dip long ol wok mo ol fasin blong Jehova, mo tu, long blesing ya we yumi gat blong stap olsem ol Witnes blong Jehova. Yumi save tingting dip tu, long nambawan trutok ya we yumi lanem long Tok blong God Baebol, we plante man raonabaot long ples blong yumi oli no save long hem yet.—Sam. 77:11-13; Aes. 43:10-12; Mat. 13:52.

3. ?Wetaem maet yumi save tingting dip?

³ ?Wetaem Yumi Save Tingting Dip? Sam man oli mekem olsem Jisas, oli wekap long eli moning taem ples i kwaet. Sam narafala, oli luk se gudfala taem blong tingting dip, hemia long sapa bifo we oli go slip. (Jen. 24:63) Nating se yumi bisi, yumi save faenem taem blong tingting dip. Sam man oli tingting dip taem oli stap insaed long ol pablik transpot. Sam narafala, oli yusum smol taem long dina taem ples i kwaet, blong oli tingting dip. Plante man oli luk se fasin blong tingting dip bifo we oli go long wok blong prij, i gud tumas. Nating se oli tekem smol taem nomo, be hemia i halpem olgeta blong prij wetem strong tingting, mo blong oli no fraet tu.

4. ?From wanem yumi mas tingting dip?

⁴ Fasin blong prea mo tingting dip bambae i halpem yumi blong tingbaot se, samting we i impoten moa long laef blong yumi, hemia wosip we yumi mekem i go long Jehova. Mo i mekem tingting blong yumi i strong moa, blong yumi gohed blong prij. Fasin ya blong tingting dip i givhan bigwan long Jisas, we i Nambawan Man blong Wok blong God, mo bambae i givhan bigwan long yumi tu.