Wan Wok We Ol Man Oli Harem Gud Tumas Long Hem
1. ?Wanem wok long saed blong spirit we ol man oli mekem long taem blong yumi?
1 Long ol fas handred yia, Jisas i mekem ol sikman oli gud bakegen, nao ol man we oli luk samting ya, oli harem gud tumas. (Luk 5:24-26) Long taem blong yumi, yumi glad blong joen long wok ya blong halpem ol man blong oli save Jehova. (Rev. 22:1, 2, 17) !Yumi harem gud taem yumi ridim ol stori blong ol man we Baebol mo tabu spirit i jenisim laef blong olgeta! Mo yumi harem gud moa blong joen long wok ya, taem yumi mekem Baebol stadi long wan man we i gohed gud.
2. ?Wanem samting we yumi save harem gud long hem, taem yumi tijim wan man long trutok?
2 ?Wanem nem blong God? ?From wanem hem i letem fasin safa i stap? ?Kingdom blong God bambae i mekem wanem blong givhan long ol man? Yumi glad blong ansa long ol kwestin olsem, be, yumi glad moa tu, blong luk we studen ya i kasem glad from trutok we hem i lanem. (Prov. 15:23; Luk 24:32) Taem studen ya i stap gohed gud, maet hem i save stat blong yusum nem blong Jehova, jenisim fasin blong putum klos mo mekem hea, lego ol nogud fasin, mo i stat blong prij long ol narafala. Sipos hem i givim laef blong hem mo tekem baptaes, bambae hem i kam wan brata blong yumi we i wok wetem yumi. Wanwan long ol jenis ya we hem i mekem, i save mekem hem i glad.—1 Tes. 2:19, 20.
3. ?Wanem ol rod we yumi save folem blong statem wan Baebol stadi?
3 ?Yu Save Joen Long Wok Ya? Sipos yu wantem joen long wok ya we i givim glad, i gud yu askem Jehova blong yu yu gat wan Baebol stadi, mo yu mas mekem sam samting tu, we oli laenap wetem samting we yu askem long prea. (1 Jon 5:14) Yu save prij long enitaem mo long eni ples we yu faenem man long hem. Yu mas tekem evri janis blong askem wan Baebol stadi. (Pri. 11:6) Taem yu faenem wan man we i soemaot intres, mo yu planem sid blong trutok, yu mas gobak bakegen blong putum wota long hem.—1 Kor. 3:6-9.
4. ?From wanem yumi mas mekem Baebol stadi wetem tingting ya se taem i sot?
4 I gat plante man yet we oli hanggri mo tosta from stret fasin. ?Hu bambae i mekem Baebol stadi wetem olgeta blong oli save kasem samting we oli nidim, hemia blong save Jehova? (Mat. 5:3, 6) I gud yumi glad blong givim taem mo paoa blong yumi blong finisim gud wok ya, mo pulum man i kam disaepol, bifo we wok blong karem kakae i finis.—Aes. 6:8.