?I Stret Blong Askem Kwestin Long God?

SAMFALA oli talem se i rong blong askem kwestin long God. Oli ting se yumi no gat respek sipos yumi askem long God se: ‘?From wanem yu letem samting ya i hapen?’ ?Olsem wanem? ?Yu tu yu gat tingting ya?

Sipos yes, maet yu sapraes blong save se plante gudfala man oli bin askem kwestin long God. Hemia sam long olgeta:

Man ya Job, we i bilif strong long God, i askem se: “?From wanem yu tanem baksaed long mi? ?From wanem yu stap luk mi olsem wan enemi blong yu?”—Job 13:24.

Profet Habakuk, we i holemstrong long God, i askem se: “?From wanem yu stap lukluk nomo long [ol man nogud], we yu no panisim olgeta? ?Taem oli stap kilim ol man we fasin blong olgeta i stret lelebet, winim olgeta, be from wanem yu yu stap kwaet?”—Habakuk 1:13.

Jisas Kraes i askem se: “God blong mi, God blong mi. ?From wanem yu lego mi mi stap olsem ya?”—Matiu 27:46.

Sipos yu ridim ol tok raonabaot long ol vas ya, bambae yu luksave se Jehovaa God i no kros taem ol man ya oli askem kwestin long hem. Yumi save finis se Jehova i no save kros kwik. Yu traem tingbaot: Yumi stap askem long hem blong i givim ol samting we yumi nidim blong mekem bodi blong yumi i strong. Be hem i no kam kros. Hem i glad nomo blong givim ol samting ya long yumi. (Matiu 6:11, 33) Long sem fasin, hem i glad blong givim save long yumi blong mekem tingting blong yumi i stap strong, mo blong mekem yumi harem gud. (Filipae 4:6, 7) Taswe, Jisas i talem long ol disaepol blong hem se: “Sipos yufala i wantem samting, yufala i mas gohed blong askem, nao bambae yufala i save kasem.” (Matiu 7:7) Ol tok raonabaot long vas ya oli soemaot se Jisas i no stap tokbaot nomo ol samting we yumi wantem kasem. Be hem i stap tokbaot ansa blong ol impoten kwestin tu.

Sipos yu yu gat janis, ?weswan long ol kwestin ya we yu yu wantem askem long God?

● ?Mi mi laef blong mekem wanem?

● ?Wanem bambae i hapen taem mi mi ded?

● ?From wanem yu yu letem mi mi safa?

“Olgeta tok blong Baebol oli kamaot long God.” Taswe, bambae yu faenem ol ansa blong God long Baebol. (2 Timoti 3:16) I gud yu tingbaot samting we i pulum sam man blong oli askem ol kwestin ya, mo ansa we Baebol i givim.

[Futnot]