blong hem. Mo hem nomo i putum Tabu Spirit ya long laef blong yumi, blong soemaotgud we ol promes blong hem bambae oli kamtru long yumi.” (2 Korin 1:​21, 22) Taswe, Jeova i makemaot ol Kristin ya wetem tabu spirit blong soemaot we hem i jusumaot olgeta, oli blong hem.

Be, i gat tu haf insaed long wok ya blong putum mak long ol man we God i jusumaot. Faswan wok blong putum mak i defren long laswan wok blong putum mak from we (1) risen blong hem i defren mo (2) taem blong hem i defren. Faswan mak i blong jusumaot wan niufala memba we bambae i joen long ol tabu Kristin. Mak ya we i olsem laswan mak i blong makem stret se man ya we God i jusum finis mo we i gat mak i stap long hem, i soemaot klia we hem i stap tru long God kasem en. Long laswan wok blong putum mak nomo, bambae mak i stap blong olwe ‘long fored’ blong man ya we God i jusumaot, blong makem se hem i prapa man no ‘slef blong God’ we i bin kasem traem mo i stap tru long God. Revelesen japta 7 i stap tokbaot laswan haf blong wok ya blong putum mak.​—Revelesen 7:3.

Long saed blong taem blong faswan wok blong putum mak, aposol Pol i raet long ol tabu Kristin i se: “Yufala tu we i no laen blong Isrel, Kraes i joen wetem God, nao God i makemaot yufala tu blong yufala i man blong hem. Yufala i harem trutok finis. Hemia gud nius ya we God i yusum blong sevem yufala, mo taem yufala i harem, yufala i bilif long Kraes. Nao God i putum mak blong hem long yufala, se yufala i man blong hem, from we hem i givim Tabu Spirit long yufala, olsem we hem i promes finis.” (Efesas 1:​13, 14) Plante taem, ol stori long Baebol oli soemaot se ol Kristin long faswan handred yia oli kasem mak smoltaem afta we oli harem gud nius mo oli kam ol man we oli bilif long Jisas. (Ol Wok 8:​15-17; 10:44) Mak ya i blong soemaot we God i agri long olgeta be i no agri fulwan yet. ?From wanem?

Pol i talem se ol tabu Kristin oli gat “mak finis we i soemaot se i gat wan dei we bambae yufala i fri tru long ransom.” (Efesas 4:​30, NW) Hemia i soemaot we plante yia i mas pas afta long faswan wok blong putum mak. Ol tabu Kristin oli mas gohed blong stap tru long God stat long dei we tabu spirit blong God i makem olgeta gogo kasem ‘dei ya we oli fri’ long bodi blong olgeta long wol ya, hemia taem oli ded. (Rom 8:23; Filipae 1:23; 2 Pita 1:10) Yes, olsem Pol, klosap taem we hem i ded, hem i save talem se: “Mi mi stap resis strong long wan resis, mo naoia mi mi kamtru finis long en blong hem, mo mi mi stap holemstrong yet fasin blong bilif. Mo naoia, praes blong man we i win, i stap rere finis blong Masta blong yumi i givim long mi blong ona long mi.” (2 Timoti 4:​6-8) Mo tu, Jisas i talem long kongregesen blong ol tabu Kristin se: “Yufala i mas stanap strong gogo yufala i ded, nao bambae mi givim niufala laef long yufala, blong ona long yufala, olsem praes we oli givim long man we i win long resis.”​—Revelesen 2:10; 17:14.

Tok ya “praes” i wan narafala pruf we i soemaot se i gat sam taem i pas stat long faswan wok blong putum mak i go kasem laswan. ?From wanem? Long ol taem bifo, i wan kastom blong givim wan hat olsem praes long man we i winim wan resis. Blong kasem praes ya, man ya i mas mekem moa samting i bitim we hem i joen long resis nomo. Hem i mas resis gogo kasem we hem i finisimgud resis blong hem. Long sem fasin, sipos ol tabu Kristin oli stanap strong gogo kasem en blong resis blong olgeta​—stat long taem we oli kasem faswan mak long olgeta i go kasem laswan mak—​ale bambae oli save kasem praes blong olgeta, hemia laef ya long heven we bambae oli no moa save ded samtaem.​—Matiu 10:22; Jemes 1:12.

?Wetaem ol laswan memba blong tabu Kristin we oli bin kasem faswan mak blong olgeta bambae oli kasem laswan mak blong olgeta? Olgeta we oli stap laef yet long wol bambae oli kasem mak ‘long fored’ blong olgeta bifo long bigfala trabol. Taem ol enjel oli lego ol fo win blong bigfala trabol, ful namba blong Isrel long saed blong spirit bambae oli kasem laswan mak blong olgeta, nating se sam long olgeta ya oli gat bodi yet olsem man mo oli mas finisim laef blong olgeta long wol ya.

?Yu Yu Wantem Wan Man Blong Kam Luk Yu?

Nating we yumi stap long wol ya we i trabol, yu save hapi from stret save blong Baebol long saed blong God, Kingdom blong Hem mo stamba tingting we hem i gat long saed blong fiuja blong ol man. Sipos yu wantem kasem moa save no yu wantem wan man i kam luk yu blong mekem Baebol stadi wetem yu we yu no pem, plis raet long Les Témoins de Jéhovah, B.P. 1741, 98874 Mont Dore, Nouvelle-Calédonie, no long wan long ol adres we i stap long pej 2.