Stori 13

Ebraham​—⁠Wan Fren Blong God

AFTA we Bigfala Wota i draonem wol, ol man oli go stap long ol defdefren ples. Wan long ol ples ya, hemia taon ya Uru. Uru i wan bigfala taon we i gat ol naes haos long hem. Be ol man long ples ya oli wosipim ol giaman god. Ol man blong taon ya Babel, olgeta tu oli mekem fasin ya. Ol man blong Uru mo Babel oli no olsem Noa mo pikinini blong hem Sem, we tufala i gohed blong mekem wok blong Jeova.

Samwe 350 yia afta we bigfala wota i ron, gudfala man ya Noa we i obei long God, hem i ded. Tu yia biaen long samting ya, man we yu luk long pija ya hem i bon. God i tingbaot man ya olsem wan nambawan man. Nem blong hem, Ebraham. Hem wetem famle blong hem oli stap long taon ya, Uru.

Wan dei, Jeova i talem long Ebraham se: ‘Yu mas aot long Uru mo long ol famle blong yu, mo yu mas go stap long wan narafala kantri we bambae mi soem long yu.’ ?Olsem wanem? ?Ebraham i obei long God, mo i lego olgeta gudfala samting blong Uru? Yes, hem i obei. Ebraham i obei oltaem long God, taswe ol man oli singaot hem se fren blong God.

Sam famle blong Ebraham oli folem hem taem hem i aot long Uru. Papa blong hem, Tera, i folem hem. Lot we hem i boe blong brata blong Ebraham, hem tu i aot wetem Ebraham. Mo, yumi save se Ebraham i mas tekem woman blong hem Sera i go wetem hem. Samtaem biaen, oli kasem ples ya Haran, mo Tera i ded long ples ya. Hemia i longwe long Uru.

Afta we taem i pas, Ebraham mo kampani blong hem oli lego Haran, mo oli wokbaot i go long Kenan. Long ples ya, Jeova i talem long Ebraham se: ‘Hemia nao graon we bambae mi givim long ol pikinini blong yu.’ Ale, Ebraham i stap long Kenan long wan haos tapolen.

God i givhan long Ebraham, i mekem se ol sipsip mo ol narafala anamol blong hem oli kam plante. I gat plante handred man we oli wok blong hem tu. Be Ebraham mo Sera i no gat pikinini.

Taem Ebraham i gat 99 yia, Jeova i mekem promes ya long hem se: ‘Bambae yu yu kam papa blong plante laen blong man.’ ?Be olsem wanem samting ya i save hapen? Ebraham mo Sera i no save gat pikinini, from we tufala i olfala finis.

Jenesis 11⁠:​27-32; 12⁠:​1-7; 17⁠:​1-8, 15-17; 18⁠:​9-19.

Stori 14

God i Traem Bilif Blong Ebraham

?EBRAHAM i stap mekem wanem long ples ya? Hem i holem wan naef, mo i luk olsem se bambae hem i kilim boe blong hem i ded. ?Be from wanem hem i mekem samting ya? Fastaem, bambae yumi luk olsem wanem Ebraham mo Sera tufala i kasem pikinini ya.

Tingbaot, God i bin promes long tufala se bambae tufala i gat wan pikinini boe. Be i luk olsem se samting ya i no save hapen from we Ebraham mo Sera i olfala tumas. Be Ebraham i bilif se God i naf blong mekem evri samting. ?Ale, wanem i hapen?

Wan ful yia i pas afta we God i mekem promes ya long hem. Nao, taem Ebraham i gat 100 yia, mo Sera i gat 90 yia, tufala i gat wan pikinini boe, nem blong hem, Aesak. !Yes, God i holem promes blong hem!

Be taem Aesak i kam bigwan, Jeova i traem bilif blong Ebraham. Hem i singaot hem i se: ‘!Ebraham!’ Mo Ebraham i ansa se: ‘!Yes!’ God i talem long hem se: ‘Yu mas tekem pikinini blong yu, Aesak, wan nomo we yu yu gat, mo yu mas go antap long wan hil we bambae mi soemaot long yu. Long ples ya, yu mas kilim hem i ded, mo bonem hem olsem wan sakrefaes we yu givim i kam long mi.’

Tok ya i mekem Ebraham i harem nogud tumas, from we hem i lavem pikinini blong hem. Mo tingbaot, God i promes finis se ol pikinini blong Ebraham bambae oli stap long kantri blong Kenan. ?Sipos Aesak i ded, olsem wanem samting ya i save kamtru? Ebraham i no save from wanem God i askem hem blong mekem samting ya. Nating se hem i no kasem save, be hem i obei.

Hem i wokbaot i go antap long hil ya, i wokem wan olta, mo i fasem Aesak long olta ya. Nao hem i tekem naef blong hem blong stikim pikinini blong hem i ded. Be taem hem i leftemap naef ya, enjel blong God i singaot hem bakegen i se: ‘!Ei! !Ebraham, Ebraham!’ Mo Ebraham i ansa se: ‘!Yes!’

God i talem se: ‘Yu no spolem boe ya. Yu no mekem wan samting long hem. Naoia mi save se yu yu bilif tru long mi, from we yu no holemtaet pikinini ya blong yu, wan nomo we yu yu gat, be yu rere nomo blong letem hem i ded.’

!Tru ya, Ebraham i gat bigfala bilif long God! Hem i bilif se Jeova i naf blong mekem eni samting, mo i save mekem pikinini blong hem i laef bakegen tu. Be God i no rili wantem we Ebraham i kilim Aesak i ded. Taswe, hem i mekem se wan sipsip i fas long wan smol tri, nao hem i talem long Ebraham blong kilim sipsip ya i ded olsem wan sakrefaes, blong tekem ples blong Aesak.

Jenesis 21⁠:​1-7; 22⁠:​1-18.