Stori 17

Tufala Twin We Fasin Blong Tufala i Defdefren

TUFALA boe long pija ya tufala i no sem mak. ?Yu yu save nem blong tufala ya? Boe we i holem bonara, hemia Esao, mo boe we i stap lukaot long ol sipsip, hemia Jekob.

Tufala twin ya, Esao mo Jekob, oli pikinini blong Aesak mo Rebeka. Papa blong tufala, Aesak, i lavem Esao, from we hem i gat gudhan blong kasem ol anamol mo i stap karem mit i kam long famle. Be Rebeka i laekem moa Jekob, from we Jekob i wan boe we i gat kwaet fasin, i no stronghed.

Abu blong tufala, Ebraham, i laef i stap yet. Yumi save se Jekob i mas laekem tumas blong lesin long ol storian blong hem long saed blong Jeova. Biaen, Ebraham i ded. Hem i gat 175 yia long taem ya, mo tufala twin oli gat 15 yia.

Taem Esao i kasem 40 yia, hem i tekem tu woman Kenan. Samting ya i mekem Aesak mo Rebeka i harem nogud tumas. Tufala woman ya oli no wosipim Jeova.

Wan dei, wan samting i hapen we i mekem Esao i kros tumas long brata blong hem, Jekob. Bifo we Aesak i ded, hem i mas talem ol tok blong blesem fasbon boe blong hem. Esao i ting se hem nao i mas kasem blesing ya from we hem i bon fastaem long Jekob. Be, bifo long taem ya, Esao i bin salem raet blong hem blong kasem blesing olsem fasbon, i go long Jekob. Mo tu, taem tufala i bon, God i bin talem se bambae Jekob nao i kasem blesing ya. Mo hemia nao samting we i kamaot. Aesak i givim blesing long pikinini blong hem Jekob.

Taem Esao i faenemaot samting ya, hem i kros long Jekob. Hem i kam kros bitim mak, nao hem i talem se bambae i kilim Jekob i ded. Taem Rebeka i harem samting ya, hem i wari tumas. Ale, hem i talem long man blong hem Aesak se: ‘Bambae i nogud tumas sipos Jekob tu i tekem wan woman Kenan.’

Taswe Aesak i singaot pikinini blong hem Jekob, mo i talem long hem se: ‘Yu no mas mared wetem wan woman Kenan. I moagud yu go long ples blong bubu blong yu Betuel, long Haran, mo yu tekem wan gel blong Laban.’

Jekob i lesin long papa blong hem, ale, hem i mekem longfala trip ya i go long famle blong hem, long Haran.

Jenesis 25⁠:​5-11, 20-34; 26⁠:​34, 35; 27⁠:​1-46; 28⁠:​1-5; Hibrus 12⁠:​16, 17.

Stori 18

Jekob i Wokbaot i Go Long Haran

?YU YU save hu ol man ya we oli stap toktok wetem Jekob? Afta we Jekob i wokbaot plante dei, hem i luk ol man ya klosap long wan wel. Oli stap lukaot long ol sipsip blong olgeta. Jekob i askem long olgeta se: ‘?Yufala i man wea?’

Oli talem se: ‘Mifala i man Haran ya.’

Jekob i askem se: ‘?Yufala i save man ya Laban?’

Oli ansa se: ‘Yes. Yu luk, hemia gel blong hem, Rejel, we i stap wokbaot i kam wetem ol sipsip blong hem.’ ?Yu yu save faenem Rejel long pija ya?

Taem Jekob i luk Rejel we i gel blong angkel blong hem, Laban, wetem ol sipsip blong hem, hem i go long wel, i rolemaot ston ya we i blokem maot blong wel, i givim wota long ol sipsip ya. Nao Jekob i kis long Rejel mo i talemaot hem se hem i hu. Rejel i glad tumas, hem i resis i gobak long haos blong talem nius ya long papa blong hem, Laban.

Laban i glad tumas we Jekob i stap wetem olgeta. Mo taem Jekob i askem sipos hem i save tekem Rejel olsem woman blong hem, Laban i glad. Be hem i talem long Jekob se hem i mas wok seven yia, blong hem i save mared long Rejel. Jekob i glad, from we hem i lavem Rejel tumas. ?Be, taem tufala i mared, yu save wanem samting i hapen?

Laban i no givim Rejel long Jekob, be i givim faswan gel blong hem long ples blong Rejel. Afta we Jekob i wok blong seven moa yia, Laban i jes givim Rejel long hem. Long taem ya, God i letem ol man blong oli save gat bitim wan woman blong olgeta. Be tede, olsem Baebol i talem, man i mas gat wan woman blong hem nomo.

Jenesis 29⁠:​1-30.