Stori 19

Jekob i Gat Wan Bigfala Famle

TRAEM lukluk bigfala famle ya. Hemia ol 12 boe blong Jekob. Mo hem i gat sam gel tu. ?Yu save nem blong ol pikinini blong hem? Ale, yumi lanem sam blong olgeta.

Lea i mama blong Ruben, Simeon, Livae mo Juda. Taem Rejel i luk we hem i no save karem pikinini, hem i harem nogud tumas. Ale hem i givim woman slef blong hem Bilhaha i go long Jekob, mo Bilhaha i gat tu pikinini boe, nem blong tufala, Dan mo Naftali. Nao Lea tu i givim woman slef blong hem Silpa i go long Jekob, mo Silpa i karem Gad mo Asere. Biaen, Lea i gat tu narafala boe, Isakara mo Sebulun.

Nao Rejel i gat bel mo i karem wan pikinini boe. Hem i putum nem blong hem se Josef. Bambae yumi storian plante long saed blong Josef, from we hem i kam wan man we i impoten tumas. Hemia nao 11 pikinini boe we Jekob i gat taem hem i stap long ples blong Laban, papa blong Rejel.

Jekob i gat sam pikinini gel tu, be Baebol i talem nem blong wan nomo, hemia Daena.

Wan dei, Jekob i tekem disisen blong livim Laban mo gobak long Kenan. Ale, hem i tekem bigfala famle blong hem oli kam wanples wetem ol sipsip mo buluk blong hem we oli plante tumas, mo oli statem longfala trip ya.

Oli kam kasem Kenan, nao smoltaem biaen, Rejel i bonem wan narafala pikinini boe. Samting ya i kamaot taem oli stap mekem wan trip. Rejel i gat hadtaem blong bonem pikinini ya, ale hem i ded from. Be smol boe ya i oraet nomo. Jekob i putum nem blong hem se Benjamin.

I gud yumi traem rimemba nem blong ol 12 pikinini boe blong Jekob from we ol laen blong Isrel oli kamaot long olgeta ya. Yes, ol 12 laen blong Isrel oli karem nem blong 10 pikinini blong Jekob mo tu pikinini blong Josef. Aesak i laef plante yia afta we ol pikinini ya oli bon, mo i sua se hem i glad tumas blong gat plante smol bubu blong hem. Be i gud yumi luk naoia wanem i hapen long smol bubu gel blong hem, Daena.

Jenesis 29⁠:​32-35; 30⁠:​1-26; 35⁠:​16-19; 37⁠:35.

Stori 20

Daena i Kasem Trabol

?YU YU save hu ya olgeta ya we Daena i kam luk olgeta? Hemia sam gel Kenan. ?Be olsem wanem? ?Jekob, papa blong Daena, hem i glad long samting ya? Blong faenem ansa blong kwestin ya, traem rimemba wanem tingting we Ebraham mo Aesak i bin gat long ol woman Kenan.

?Ebraham i bin wantem se pikinini blong hem Aesak i tekem wan woman Kenan, no nogat? Hem i no wantem. ?Aesak mo Rebeka tufala i wantem se pikinini blong tufala Jekob i tekem wan woman Kenan, no nogat? Tufala i no wantem. ?Yu save from wanem?

Ol man Kenan oli stap wosip long ol giaman god. I nogud we wan man blong Jeova i tekem wan man no woman Kenan, no i frengud wetem ol man Kenan. Taswe yumi sua se sipos Jekob i save we gel blong hem i stap fren wetem ol gel Kenan, bambae hem i no glad nating.

I no longtaem, Daena i kasem trabol. ?Yu yu luk wan man Kenan long pija ya? Hem i stap lukluk Daena. Nem blong man ya, Sekem. Wan dei, Daena i kam luk ol fren blong hem, ale Sekem i holem Daena, mo i fosem hem blong slip wetem hem. Samting ya i nogud. Ol man mo woman we oli mared, olgeta nomo oli gat raet blong slip tugeta. Nogud samting ya we Sekem i mekem long Daena i karem bigfala trabol i kam long plante man.

Taem ol brata blong Daena oli harem nius blong samting ya, oli kros tumas. Tufala brata blong hem, Simeon mo Livae, tufala i kros bitim mak. Tufala i tekem naef blong faet blong tufala, nao tufala i gotru long taon ya we Sekem i stap long hem. Ol man oli sek long olgeta. Ale, tufala, mo ol brata blong tufala, oli kilim Sekem mo sam narafala man oli ded. Jekob i kros taem hem i harem nius blong trabol ya we ol pikinini blong hem oli mekem.

?Olsem wanem ol trabol ya i stat? I stat taem Daena i fren wetem sam gel we oli no obei long ol loa blong God. ?Yu ting se i gud we yumi gat ol fren olsem? !Nogat!

Jenesis 34⁠:​1-31.