Stori 21

Ol Brata Blong Josef Oli No Laekem Hem

YU LUK boe ya we i harem nogud tumas. Hemia Josef ya. Ol brata blong hem oli salem hem i go long ol man ya we oli stap wokbaot i go long Ijip. Bambae Josef i kam wan slef long Ijip. ?From wanem ol brata blong hem oli mekem nogud samting ya? From we oli jalus long Josef.

Papa blong olgeta, Jekob, i lavem Josef tumas. Jekob i givim wan kot long Josef blong soem se hem i laekem hem. Kot ya i longfala mo i flas we i flas. Ol 10 bigfala brata blong Josef, oli luk we Jekob i lavem Josef, nao oli jalus mo oli agensem Josef from. Be i gat wan narafala risen tu we i mekem se oli no laekem hem.

Josef i luk tu drim. Long tufala drim ya, ol brata blong Josef oli bodaon long hem. Taem Josef i talemaot tufala drim ya long ol brata blong hem, oli agensem hem moa.

Wan dei, ol bigfala brata blong Josef oli stap lukaot long ol sipsip blong papa blong olgeta. Nao Jekob i talem long Josef blong go luk olgeta blong faenemaot sipos oli oraet. Taem ol brata blong Josef oli luk hem i stap kam, sam long olgeta oli talem se: ‘!I gud yumi kilim hem i ded!’ Be Ruben we i fasbon, i talem se: ‘!No, i nogud yumi mekem samting ya!’ Ale, oli holem Josef, oli sakem hem i go long wan wel we i drae finis. Nao oli sidaon blong tokbaot wanem we bambae oli mekem long hem.

I no longtaem, oli luk sam man long laen blong Ismael oli wokbaot i kam. Juda i talem long ol brata blong hem se: ‘I gud yumi salem Josef i go long ol man ya long laen blong Ismael.’ Ale, oli mekem samting ya. Oli salem Josef i go long ol man ya we praes blong hem ten taosen vatu. !Hemia i nogud tumas, oli no kaen nating long Josef!

?Ol brata ya oli talem wanem long papa blong olgeta? Oli kilim wan nani i ded mo oli draonem naesfala kot blong Josef long blad blong nani ya. Ale oli karem kot ya i kam long Jekob, papa blong olgeta, mo oli talem se: ‘Papa. Mifala i faenem kot ya. Yu traem luk. ?Hem i blong Josef?’

Jekob i luksave kot ya. Hem i krae, se: ‘Pikinini blong mi ya, wan anamol i kilim hem. Wan samting i kakae hem finis.’ Hemia nao samting we ol brata blong Josef oli wantem se papa blong olgeta i bilivim. Jekob i harem nogud tumas. Hem i krae blong plante dei. Be Josef i no ded. Bambae yumi luk wanem i hapen long hem taem ol man oli karem hem i go wetem olgeta.

Jenesis 37⁠:​1-35.

Stori 22

Oli Putum Josef Long Kalabus

JOSEF i gat 17 yia nomo taem ol man blong salem ol slef oli karem hem i kam long Ijip. Long ples ya, oli salem hem i go long Potifa. Potifa i wan man blong wok blong Fero, king blong Ijip.

Josef i wok had long haos blong masta blong hem, Potifa. Taswe, afta we sam taem i pas, Potifa i putumap hem olsem bos blong haos mo olting blong hem. ?Sipos i olsem, from wanem Josef i stap kalabus? Hemia from waef blong Potifa.

Josef i gruap i kam wan man we bodi blong hem i naes. Nao woman blong Potifa i wantem we Josef i slip wetem hem. Be Josef i save se samting ya i no stret, mo i no wantem mekem. Ale, woman blong Potifa i kam kros tumas. Taswe, taem Potifa i kambak long haos, woman ya i giaman se: ‘!Josef ya i rabis! !Hem i wantem fosem mi blong i slip wetem mi!’ Potifa i bilivim woman blong hem, nao hem i kros tumas. Ale, hem i sakem Josef i go long kalabus.

Kwiktaem nomo, bos blong kalabus i luk we Josef i wan gudfala man. Taswe, hem i putumap Josef blong i lukaot long ol narafala man long kalabus. Samtaem biaen, Fero i kros long man blong lukaot long waen blong hem, mo long man blong mekem bred blong hem. Ale, hem i sakem tufala man ya long kalabus. Wan naet, tufala ya i drim, be tufala i no save mining blong tufala drim ya. Long nekis dei, Josef i talem se: ‘Traem talemaot tufala drim ya long mi.’ Ale, tufala i mekem olsem. Nao, God i givhan long Josef blong talemaot mining blong tufala drim ya.

Josef i talem long man blong lukaot long waen blong king se: ‘Long tri dei, bambae Fero i tekemaot yu long kalabus, i putumap yu bakegen long wok blong yu.’ Taswe Josef i talem long hem se: ‘Taem yu yu fri, plis, yu mas tingbaot mi. Yu mas tokbaot mi long Fero, blong givhan long mi blong mi tu mi save aot long kalabus ya.’ Be, Josef i talem defren toktok long man blong mekem bred blong king. Hem i talem se: ‘Long tri dei, bambae Fero i katemaot hed blong yu.’

Afta we tri dei i pas, olgeta samting we Josef i talemaot oli kamtru. Fero i givim oda blong katemaot hed blong man blong mekem bred blong hem. Be man blong lukaot long waen blong hem i aot long kalabus mo i holem wok blong hem bakegen. !Be man ya i fogetem gud Josef! Hem i no tokbaot Josef long Fero. Josef i stap nomo long kalabus.

Jenesis 39⁠:​1-23; 40⁠:​1-23.