Stori 23

Ol Drim Blong Fero

TU YIA biaen, Josef i stap yet long kalabus. Man blong lukaot long waen blong king i no moa tingbaot hem. Nao wan naet, Fero i luk tu drim we tufala i narakaen. Hem i no save mining blong tufala drim ya. ?Yu luk hem long pija ya? Hem i stap slip. Long nekis dei, Fero i singaot ol waes man blong hem. Hem i talemaot tufala drim blong hem long olgeta. Be olgeta ya oli no save talem mining blong tufala drim ya.

Nao wantaem nomo, man ya blong lukaot long waen blong king i tingbaot Josef. Ale, hem i talem long Fero se: ‘Taem mi stap long kalabus, i gat wan man we hem i save talemaot mining blong ol drim.’ Fero i no wet, wantaem nomo hem i singaot Josef i kam.

Fero i talemaot tufala drim blong hem long Josef, i se: ‘Mi mi luk seven buluk we oli fatfat gud mo skin blong olgeta i saen. Mo mi luk seven buluk we oli bunbun nogud. Nao olgeta ya oli girap oli kakae ol buluk we oli fatfat gud, gogo oli finisim olgeta.

‘Long narafala drim blong mi, mi luk wan stik blong wit, we i karem seven bandel kakae blong hem, mo ol kakae ya oli nambawan, oli rere finis blong tekem i kam. Nao mi luk wan narafala stik blong wit bakegen, we i karem seven bandel, be ol kakae blong olgeta ya oli drae tumas, oli smosmol nomo. Nao ol seven bandel ya we ol kakae blong olgeta oli smosmol nomo, oli girap, oli kakae ol narafala bandel ya, oli solemdaon olgeta.’

Josef i talem long Fero se: ‘Mining blong tufala drim ya i wan nomo. Ol seven gudfala buluk ya, hemia seven yia. Mo ol seven gudfala bandel kakae, hemia tu seven yia. Ol seven buluk ya we oli bunbun nogud, mo ol seven bandel kakae ya we oli smosmol nomo, olgeta tu oli seven yia. Bambae ol garen long Ijip oli karem fulap kakae blong seven yia. Biaen, bambae i gat hadtaem blong kasem kakae gogo seven yia i pas.’

Taswe Josef i talem long Fero se: ‘Yu mas jusumaot wan man we i waes gud, mo yu mas putumap hem blong i lukaot long ol kakae we ol man oli tekem i kam long ol seven yia we ol garen oli karem fulap kakae. Long fasin ya, bambae ol man oli no save ded long hanggri long ol seven yia we ol garen oli no givim kakae.’

Fero i glad long plan ya. Mo hem i jusum Josef blong i kam man blong hivimap ol kakae mo putum i stap gud. Josef i kam wan haeman, Fero nomo i hae moa long hem.

Eit yia biaen, Josef i luk sam man oli stap wokbaot i kam. Hemia long taem we kakae i sot. ?Yu save hu ya ol man ya? !Hemia ol 10 bigfala brata blong Josef! Papa blong olgeta, Jekob, i sanem olgeta oli kam long Ijip blong karem kakae. Long ples blong olgeta, Kenan, klosap i no moa gat kakae. Josef i luksave ol brata blong hem. Be olgeta oli no luksave Josef. ?Yu save from wanem i olsem? From we Josef i olfala moa naoia, mo tu, hem i werem klos we i defren.

Josef i tingbaot drim we hem i bin luk taem hem i smol nomo. Hem i luk we ol brata blong hem oli kam bodaon long hem. ?Yu tingbaot stori ya we yumi ridim finis? Taswe, Josef i kasem save se God nao i sanem hem i kamdaon long Ijip, blong mekem wan impoten wok. ?Yu ting se Josef i mekem wanem naoia? Bambae yumi luk.

Jenesis 41⁠:​1-57; 42⁠:​1-8; 50⁠:20.

Stori 24

Josef i Traem Ol Brata Blong Hem

JOSEF i wantem save sipos ol 10 bigfala brata blong hem oli gat nogud fasin yet. Taswe, hem i talem long olgeta se: ‘Yufala ol spae nomo. Yufala i kam blong luk sipos mifala i strong no nogat, blong yufala i save kam mekem faet long mifala.’

Ol brata blong Josef oli talem se: ‘No, i no olsem. Mifala i no stap giaman. Mifala evriwan ya i brata. Fastaem mifala i twelef, be wan brata blong mifala i lus, mo lasbon long mifala i stap wetem papa blong mifala.’

Josef i mekem olsem se i no bilivim olgeta. Hem i putum brata blong hem, Simeon, i go long kalabus, mo i letem ol narafala oli tekem kakae i gobak long ples blong olgeta. Be hem i talem long olgeta se: ‘Taem yufala i kambak, yufala i mas karem lasbon brata blong yufala i kam.’

Taem oli kasem Kenan, oli talem evri samting ya long papa blong olgeta, Jekob. Hem i harem nogud tumas. Hem i talem se: ‘Josef i lus finis, mo naoia, Simeon i lus. !Nogat! Benjamin, lasbon pikinini ya blong mi, bambae i no save go wetem yufala.’ Be taem i no moa gat kakae, Jekob i mas letem olgeta oli karem Benjamin i go long Ijip, blong oli save kasem kakae.

Josef i luk ol brata blong hem oli stap kam. Hem i glad tumas blong luk smol brata blong hem, Benjamin. Be i no gat wan long ol brata ya we i luksave se hae man ya, hem i Josef. Ale naoia, Josef i mekem wan samting blong traem ol 10 brata blong hem.

Hem i talem long wan man blong hem blong fulumap kakae long ol bag blong ol brata blong hem. Be, hem i talem long man ya blong putum prapa panikin blong hem we oli wokem long silva, i go long bag blong Benjamin. Ol brata blong hem oli no save long samting ya. Ale, oli aot, oli wokbaot i go longwe lelebet. Nao, Josef i sanem ol man blong hem oli go blokem olgeta long rod. Taem oli kasem ol brata blong Josef, oli talem se: ‘?Weswe yufala i stilim silva panikin blong masta blong mifala?’

Ol brata oli talem se: ‘Mifala i no stilim panikin ya. Yufala i traem lukaot. Sipos yufala i faenem we wan long mifala i holem samting ya, hem bambae i mas ded.’

Ale ol man blong Josef oli lukluk long evri bag, mo oli faenem panikin blong Josef long bag blong Benjamin, stret olsem pija ya i soem. Oli talem se: ‘Benjamin, yu kam wetem mifala. Ol narafala, yufala i save go.’ ?Bambae ol 10 brata blong hem oli mekem wanem naoia?

Olgeta evriwan oli gobak wetem Benjamin long haos blong Josef. Josef i talem long ol brata blong hem se: ‘Yufala i save gobak long ples blong yufala, be Benjamin i mas stap long ples ya blong kam man blong wok blong mi.’

Juda i toktok nao, i talem se: ‘Masta, sipos mi mi gobak long papa blong mifala we lasbon ya i no kam wetem mi, bambae hem i ded ya. Hem i laekem boe ya tumas. Mi mi rere blong tekem ples blong hem, blong kam slef blong yu. Be plis, yu letem hem i gobak wetem ol brata blong mi.’

Naoia, Josef i luksave se fasin blong ol brata blong hem i jenis. Oli no moa gat nogud fasin ya we oli no kaen nating. Bambae yumi luk wanem samting Josef i mekem naoia.

Jenesis 42⁠:​9-38; 43⁠:​1-34; 44⁠:​1-34.