Stori 25

Famle i Go Stap Long Ijip

JOSEF i no moa save holemtaet filing blong hem. Hem i talem long ol slef blong hem blong oli go afsaed. Taem hem nomo i stap wetem ol brata blong hem, hem i stat krae. Yumi save se ol brata blong hem oli mas sapraes tumas. Oli no save from wanem hem i stap krae. Nao hem i talem se: ‘Mi mi Josef ya. ?I tru we papa blong yumi i stap yet?’

Ol brata blong hem oli sek, oli no moa save toktok. Mo oli fraet tu. Be Josef i talem long olgeta se: ‘Plis, yufala i kam klosap.’ Nao hem i talem se: ‘Mi mi brata blong yufala, Josef, we yufala i bin salem mi blong mi kam slef long Ijip.’

Josef i gohed blong toktok long kaen fasin, i talem se: ‘Be i nogud we yufala i stap jajem yufala from samting ya we yufala i mekem long mi. God nao i sanem mi mi kam long Ijip blong sevem laef blong ol man. Fero i putumap mi mi kam rula blong ful kantri ya. Taswe naoia, i gud yufala i hareap, yufala i gobak long papa blong yumi, yufala i talemaot tok ya blong mi long hem. Mo yufala i mas tekem hem i kam stap long ples ya.’

Ale Josef i holem ol brata blong hem wanwan, i putum han blong hem i goraon long nek blong olgeta, mo i kis long olgeta. Taem Fero i harem we ol brata blong Josef oli kam, hem i talem se: ‘I gud olgeta oli tekem sam kat mo oli go tekem papa blong olgeta wetem ol pikinini blong olgeta oli kambak long ples ya bakegen. Bambae mi mi givim ol nambawan graon long kantri ya i go long olgeta.’

Oli mekem olsem we Fero i talem. Long pija ya, Josef i jes luk papa blong hem bakegen, taem ol brata blong hem oli karem hem wetem ful famle blong hem i kam long Ijip.

Famle blong Jekob i bigwan. Olgeta we oli kam long Ijip, oli 70 evriwan. I gat Jekob, ol pikinini blong hem, wetem ol smol bubu blong hem. Mo tu, i gat ol woman blong olgeta, mo plante slef. Olgeta ya oli kam stap long Ijip. Ol man oli singaot olgeta se ol man Isrel, from we God i jenisim nem blong Jekob i kam Isrel. Biaen, bambae yumi luk we God i jusumaot ol man Isrel oli kam wan nesen we i blong hem nomo.

Jenesis 45⁠:​1-28; 46⁠:​1-27.

Stori 26

Job i Gat Strong Bilif Long God

?YU YU sore long sikman ya? Nem blong hem, Job, mo woman ya i woman blong hem. ?Yu save wanem we woman ya i stap talem long Job? Hem i stap talem se: ‘I moa gud yu tok nogud long God, blong yu yu ded.’ I gud yumi luk from wanem hem i talem samting ya, mo from wanem Job i safa olsemia.

Job i wan man we i bilif strong long Jeova, mo i obei gud long hem. Hem i stap long kantri blong Uj, i no longwe long Kenan. Jeova i lavem Job, be i gat wan man we i no laekem hem nating. ?Yu save hu ya man ya?

Hemia Setan. Rimemba se Setan hem i nogud enjel ya we i agensem Jeova. Hem i pulum Adam mo Iv blong tufala i no moa obei long Jeova. Mo hem i ting se hem i save pulum olgeta man blong oli no obei long God. ?Yu ting se hem i naf blong mekem samting ya? Nogat. Traem tingbaot ol stori we yumi ridim finis. Plante long ol man mo woman ya oli gat strong bilif. ?Yu save talem nem blong sam long olgeta?

Afta we Jekob mo Josef i ded long Ijip, Job nao i nekiswan man we bilif blong hem long Jeova i strong moa, i winim ol narafala man long wol. Jeova i wantem soem long Setan se hem i no naf blong pulum evri man oli kam nogud. Taswe hem i talem se: ‘?Yu luk fasin blong man ya Job? Hem i wan gudfala man we tingting blong hem i stap strong long mi oltaem.’

Setan i ansa long God, i se: ‘No, be hem i stap mekem wosip long yu from we yu givim plante blesing long hem, mo naoia hem i gat plante gudfala samting. Be sipos yu tekemaot ol samting ya, bambae hem i tok nogud long yu stret long fes blong yu.’

Jeova i talem se: ‘Oraet, yu save karemaot evri samting we hem i gat. Yu save mekem enikaen nogud samting long hem. Be wan samting nomo, yu no mas kilim hem i ded. Bambae yumi luk sipos hem i tok nogud long mi.’

Fastaem, Setan i pulum sam man blong oli stilim ol buluk mo kamel blong Job, mo ol sipsip blong hem tu oli ded. Afta, Setan i kilim i ded ol 10 pikinini boe mo gel blong Job long wan hariken. Biaen bakegen, hem i kilim Job wetem wan sik we i nogud tumas. Job i harem nogud bitim mak. Hemia from wanem woman blong hem i talem se: ‘I moa gud yu tok nogud long God, blong yu yu ded.’ Be Job i no save mekem samting ya. Antap bakegen, tri giaman fren blong Job oli kam, mo trifala i talem long hem se hem i bin mekem plante nogud samting long laef blong hem. Nating se ol trabol ya i kasem Job, be hem i holemtaet bilif blong hem long Jeova.

Jeova i glad tumas long Job. Afta we ol trabol ya i finis, hem i givim plante blesing long Job, olsem yu luk long pija ya. Hem i tekemaot sik blong hem. Job i gat 10 pikinini bakegen we oli naes tumas. Mo ol buluk, ol sipsip, mo ol kamel blong hem oli kam plante we plante, oli tu taem antap long namba we hem i gat fastaem.

?Bambae yu yu bilif strong long Jeova oltaem, olsem Job? Sipos yu mekem olsem, God bambae i givim blesing long yu tu. Bambae yu gat janis blong laef gogo i no save finis, taem wol ya i kam wan naes ples bakegen, olsem garen blong Iden fastaem.

Job 1⁠:​1-22; 2⁠:​1-13; 42⁠:​10-17.