Stori 29

?From Wanem Moses i Ronwe?

LONG pija ya, Moses i stap ronwe. ?Yu luk ol man we oli ronem hem? ?Yu save from wanem oli wantem kilim Moses i ded? Bambae yumi faenemaot.

Moses i gruap long haos blong Fero, king blong Ijip. Moses i kam wan man we i waes tumas, wan bigfala man. Hem i save se hem i no rili wan man Ijip. Stret papa mo mama blong hem tufala i man Isrel, we oli slef.

Taem Moses i gat 40 yia, hem i wokbaot i go luk ol man Isrel, we hem i wan long olgeta. Hem i luk se ol man Ijip oli stap fosem olgeta blong mekem ol strongfala wok. Hem i luk wan man Ijip i stap kilim wan slef blong Isrel. Moses i luklukraon, mo i luk se i no gat man i save luk hem. Ale, hem i girap i kilim man Ijip ya i ded, mo i berem hem long sanbij.

Long nekis dei, Moses i go luk ol brata blong hem bakegen. Hem i ting se i save givhan long olgeta blong oli no moa wok slef. Hem i luk tu man Isrel we tufala i stap faet, nao hem i talem long man we i statem trabol ya se: ‘?From wanem yu stap kilim brata blong yu?’

Man ya i talem se: ‘!Ei! ?Hu i putumap yu blong yu kam bos long mifala, yu stap jajem mifala? ?Olsem wanem? ?Yu wantem kilim mi olsem we yu kilim man Ijip ya yestede?’

Nao Moses i fraet, i save we ol man oli faenemaot samting we hem i bin mekem. Fero tu i harem nius ya, mo hem i sanem sam man blong hem oli go blong kilim Moses i ded. Hemia nao from wanem Moses i mas ronwe.

Taem Moses i aot long Ijip, hem i wokbaot i go longwe, go kasem kantri ya Midian. Long ples ya, hem i mitim Jetro mo famle blong hem. Hem i mared long wan gel blong Jetro, nem blong hem, Jipora. Moses i kam man blong lukaot long ol sipsip blong Jetro. Hem i stap 40 yia long kantri blong Midian. Taem hem i gat 80 yia mo i stap lukaot long ol sipsip blong Jetro, wan narakaen samting i hapen we i jenisim laef blong hem fulwan. Traem tanem pej ya, mo bambae yumi luk wanem i hapen.

Eksodas 2⁠:​11-25; Ol Wok 7⁠:​22-29.

Stori 30

Smol Tri We Faea i Laet Long Hem

MOSES i wokbaot i go long hil ya Horeb blong faenem gras blong ol sipsip blong hem. Long ples ya, hem i luk wan faea i laet long wan smol tri. !Be faea ya i no stap kakae ol lif blong tri ya!

Moses i tingting se: ‘?Wanem samting ya? Mi mas go klosap blong lukluk gud long hem.’ Taem hem i go klosap, hem i harem wan voes i kamaot long medel blong tri ya, i se: ‘Yu no mas kam klosap tumas, yu tekemaot sandel blong yu. Graon ya we yu stap stanap long hem i tabu’ Hemia God we i toktok ya. Hem i yusum wan enjel blong talemaot tok blong hem. Nao Moses i fraet, i kavremap fes blong hem.

Ale, God i talem long hem se: ‘Mi mi luk finis ol rabis fasin we ol man Ijip oli stap mekem long ol man blong mi. From samting ya, bambae mi mi mekem olgeta oli kam fri. Mi wantem blong yu go tekemaot ol man blong mi long Ijip.’ Bambae Jeova i lidim ol man blong hem oli go long nambawan kantri ya Kenan.

Be Moses i talem se: ‘No, be mi mi olsem nating nomo. Mi mi no naf blong mekem wok ya. ?Sipos mi go, mo oli askem long mi se: “?Hu i sanem yu i kam?” bambae mi talem wanem long olgeta?’

God i ansa se: ‘Bambae yu mas talem long olgeta se: “God we i sanem mi mi kam, nem blong hem JEOVA. Hem i God blong Ebraham, Aesak, mo Jekob bifo.” ’ Mo tu, Jeova i talem se: ‘Nem ya blong mi bambae i stap we i stap, we bambae i no save lus samtaem.’

Moses i ansa bakegen, i se: ‘Be sipos oli no bilif long tok blong mi. Sipos oli talem se mi mi stap giaman, mo se yu yu no sanem mi.’

God i askem se: ‘?Wanem samting ya yu stap holem long han blong yu?’

Moses i se: ‘Wokingstik ya.’

God i talem se: ‘Ale, yu traem sakem i godaon long graon.’ Nao taem Moses i sakem wokingstik ya i go long graon, wantaem nomo, stik ya i kam snek. Nao Jeova i mekem wan narafala merikel bakegen blong Moses i luk. Hem i se: ‘Yu pusum han blong yu i go insaed long klos blong yu.’ !Nao Moses i mekem olsem, mo taem hem i tekemaot han blong hem bakegen, han blong hem i waet olsem sno! I luk olsem se nogud sik ya leprosi i kasem han blong hem. Nao, Jeova i givim paoa long Moses blong i mekem wan merikel bakegen, hemia namba tri merikel. Biaen, hem i talem olsem: ‘Taem yu mekem ol merikel ya, ol man Isrel bambae oli bilif se mi mi sanem yu.’

Afta long samting ya, Moses i gobak long haos mo i talem long Jetro se: ‘Plis, yu letem mi mi gobak blong luk ol famle blong mi long Ijip.’ Ale, Jetro i talem tata long Moses, mo Moses i aot, i gobak long Ijip.

Eksodas 3⁠:​1-22; 4⁠:​1-20.