Stori 31

Moses Mo Eron i Go Luk Fero

TAEM Moses i gobak long Ijip, hem i tokbaot ol merikel ya long brata blong hem Eron. Mo taem Moses mo Eron tufala i soem ol merikel ya long ol man Isrel, ol man ya oli bilif we Jeova i stap wetem tufala.

Ale Moses mo Eron tufala i go luk Fero. Tufala i talem long hem se: ‘Jeova we i God blong ol man Isrel i talem se, “Yu mas letem ol man blong mi oli wokbaot tri dei, blong oli save go mekem wosip long mi long drae ples.” ’ Be Fero i ansa se: ‘Mi mi no bilif long Jeova ya. Mo bambae mi no letem ol man Isrel oli go.’

Fero i kros, from we ol man Isrel oli wantem spel smol blong go mekem wosip long Jeova. Ale, hem i fosem olgeta blong wok strong moa. Ol man Isrel oli talem se Moses nao i mekem we Fero i strong moa long olgeta. Samting ya i mekem Moses i harem nogud. Be Jeova i talem long hem blong no wari, i se: ‘Bambae mi mekem we Fero i letem ol man blong mi oli go.’

Moses mo Eron tufala i go luk Fero bakegen. Long taem ya, tufala i mekem wan merikel. Eron i sakem wokingstik blong hem i godaon long graon, mo wokingstik ya i jenis i kam wan bigfala snek. Be ol waes man blong Fero tu oli sakem wokingstik blong olgeta i godaon mo ol stik ya tu oli kam ol snek. !Be traem luk wanem i hapen! Snek blong Eron i stap solemdaon ol snek blong ol waes man. Nating se i olsem, Fero i strong yet, i no wantem letem ol man Isrel oli go.

Ale, Jeova i mekem se Fero i lanem wan bigfala lesen. ?Yu save olsem wanem hem i mekem olsemia? Hem i mekem 10 panis no 10 bigfala trabol, i kamaot long Ijip.

Afta we sam panis oli kamaot, Fero i singaot Moses i kam, nao i talem long hem se: ‘Yu mas stopem ol panis ya, nao bambae mi letem ol man Isrel oli go.’ Be taem ol panis ya oli stop, Fero i jenisim tingting blong hem bakegen. Hem i no moa letem ol man Isrel oli go. Be, afta long namba 10 panis, Fero i sanemaot ol man Isrel.

?Yu save talem ol 10 panis ya? Sipos yu tanem pej, bambae yu faenemaot olgeta ya.

Eksodas 4⁠:​27-31; 5⁠:​1-23; 6⁠:​1-13, 26-30; 7⁠:​1-13.

Stori 32

Ol 10 Panis

OL PIJA ya oli soem ol panis we Jeova i putum long Ijip. Long faswan pija, Eron i stap kilim Nael Reva wetem wokingstik blong hem. Taem hem i mekem olsem, wota blong reva i kam blad. Ol fis oli ded, mo reva i stap sting nomo.

Nekis samting, Jeova i mekem se ol frog oli kamkamaot long Nael Reva. Oli fulap we oli fulap​—⁠oli stap insaed long ol oven mo ol sospen blong mekem bred, mo long bed blong ol man⁠—​long evri ples. Taem ol frog ya oli ded, ol man Ijip oli sakem olgeta long ol bigbigfala hip, mo kantri ya i sting from ol frog ya.

Biaen, Eron i kilim graon wetem wokingstik blong hem, nao asis blong graon oli kam ol smosmol moskito. Oli flae olbaot mo oli kakae man. Hemia namba tri panis long kantri ya Ijip.

Ol narafala panis we oli kam biaen, oli kasem ol man Ijip nomo, be i no ol man Isrel. Namba fo panis, hemia ol bigbigfala flae we oli go insaed long olgeta haos blong ol man Ijip. Namba faef panis i spolem ol anamol. Plante buluk, sipsip mo nani blong ol man Ijip oli ded.

Nekis panis, Moses mo Eron tufala i tekem sam asis blong faea mo tufala i sakem oli go antap. Nao ol boela oli kamaot long ol man mo ol anamol. Hemia namba sikis panis.

Afta long samting ya, Moses i leftemap han blong hem i go antap, mo Jeova i mekem tanda i faerap, mo ol ston blong aes oli folfoldaon. Ol man Ijip oli neva luk ol ston blong aes we oli bigbigwan olsemia.

Namba eit panis, hemia ol lokis we oli kam fulap long evri ples. I no gat wan taem bifo no afta, we ol man oli luk fulap lokis olsem. Ol lokis ya oli kakae evri samting we i stap, afta we ol ston blong aes oli spolem ples.

Namba naen panis, hemia tudak. Blong tri dei, evri ples long kantri ya i tudak we i tudak. Be ol man Isrel oli gat laet long ples blong olgeta.

Laswan samting, God i talem long ol man blong hem blong sakem blad blong wan yangfala nani no wan yangfala sipsip i go long doa blong haos blong olgeta. Ale, enjel blong God we i pastru long Ijip bambae i luk blad ya, nao hem i no save kilim wan man long haos ya. Be long ol haos we i no gat blad long doa blong olgeta, enjel ya blong God i kilim i ded fasbon blong famle ya, mo blong ol anamol blong olgeta tu. Hemia namba 10 panis.

Afta long laswan panis ya, Fero i talem long ol man Isrel blong oli go. Ol man blong God oli rere finis, ale long naet ya nomo oli goaot long Ijip.

Eksodas japta 7 kasem 12.