Stori 37

Haos Tapolen i Ples Blong Mekem Wosip

?YU YU save wanem haos ya? Hemia wan spesel haos tapolen, wan ples blong mekem wosip long Jeova. Narafala nem blong hem se, tabenakel. Wan yia afta we ol man Isrel oli kamaot long Ijip, oli finisim wok blong stanemap haos tapolen ya. ?Yu save hu i gat tingting ya blong wokem haos ya?

Hemia tingting blong Jeova. Taem Moses i stap antap long Hil ya Sinae, Jeova i talem plan blong haos tapolen ya long hem. Hem i talem se oli mas wokem haos ya long wan fasin we i isi blong tekemaot mo karem i go long narafala ples, nao oli save stanemap bakegen long ol defdefren ples we oli go long hem. Ale, taem ol man Isrel oli wokbaot olbaot long drae ples, oli karem haos tapolen ya i go wetem olgeta.

Long smol rum long en blong haos tapolen ya, yu save luk wan bokis. Nem blong bokis ya se, bokis blong kontrak. Long tufala en blong lid blong bokis ya, oli wokem tu enjel, hemia ol jerubim, long gol. Moses i brekem tufala flat ston we God i raetem ol Tenkomanmen long tufala, ale God i wokem tu narafala bakegen. Nao oli putum tufala ston ya insaed long bokis blong kontrak. Oli putum wan botel blong mana insaed long hem tu. ?Yu yu tingbaot yet wanem samting ya mana?

Nao Jeova i jusumaot Eron we i brata blong Moses, blong i kam hae pris. Hem i lidim ol man Isrel long saed blong wosip long Jeova. Mo ol boe blong hem oli pris tu.

Traem luk long bigfala rum blong haos tapolen ya. Rum ya i bigfala moa, i dabolem faswan rum. ?Yu luk wan smol samting we smok i stap kamaot long hem? Hemia olta blong bonem insens long hem. Insens i olsem senta we smel blong hem i gud tumas. Mo tu, i gat wan samting blong putum laet i stanap long hem, we i gat seven han blong hem. Mo namba tri samting long rum ya, hemia wan tebol. Oli putum 12 bred i stap long tebol ya.

Long yad blong haos tapolen ya, i gat wan bigfala besin we i fulap long wota. Ol pris oli yusum wota ya blong swim long hem. I gat wan bigfala olta tu long yad ya. Long ples ya, oli bonem ol anamol we oli kilim finis, blong givim i go long Jeova olsem presen. Haos tapolen ya i stap stret long medel blong ol haos blong ol man Isrel, hemia i min se oli stanemap ol haos tapolen blong olgeta raon long hem.

Eksodas 25⁠:​8-40; 26⁠:​1-37; 27⁠:​1-8; 28⁠:1; 30⁠:​1-10, 17-21; 34⁠:​1, 2; Hibrus 9⁠:​1-5.

Stori 38

Ol 12 Spae

LONG pija ya, yu save luk tu man we tufala i stap karem ol frut. Ol grep ya oli bigwan we i bigwan. Oli hevi tumas, mekem se tufala man ya oli yusum stik blong karem wan bandel grep. Traem lukluk ol fig mo grenadin. ?Ol gudfala frut ya oli kam weples? Oli kam long kantri blong Kenan. Traem tingbaot: Ebraham, Aesak mo Jekob, trifala oli stap long Kenan bifo. Be from we kakae i sot long ples ya, Jekob i tekem famle blong hem i go stap long Ijip. Naoia, klosap 216 yia i pas finis, ale Moses i lidim ol man Isrel oli kambak long Kenan. Oli wokbaot long drae ples gogo oli kasem wan ples we nem blong hem Kades.

I gat plante nogud man oli stap long kantri blong Kenan. Taswe Moses i sanem 12 spae fastaem, blong oli lukluksave ples ya. Hem i talem long olgeta se: ‘Traem faenemaot hamas man oli stap long ples ya, mo oli strong olsem wanem. Traem luksave sipos graon i gud. Mo yufala i mas karem sam frut i kambak.’

Taem ol spae oli kambak long Kades, oli talem long Moses se: ‘Kantri ya i gud tumas.’ Mo blong pruvum tok blong olgeta, oli soem sam frut long Moses. Be 10 long ol spae ya oli talem se: ‘Ol man we oli stap long ples ya oli bigbigfala man mo oli strong tumas. Bambae oli kilim yumi i ded sipos yumi traem tekem kantri ya.’

Taem ol man Isrel oli harem samting ya, oli fraet. Oli stap taltalem se: ‘I moagud we yumi ded long Ijip, no long drae ples ya. Sipos yumi go mekem faet long olgeta, bambae oli kilim yumi i ded, mo bambae oli tekem ol woman mo ol pikinini blong yumi. !Yumi mas jusum wan narafala lida blong tekem ples blong Moses! !Yumi mas gobak long Ijip!’

Be i gat tu spae we tufala i trastem Jeova, mo tufala i traem blong mekem tingting blong ol man Isrel i stap kwaet. Nem blong tufala ya, Josua mo Keleb. Tufala i talem se: ‘Yufala i no fraet. Jeova i stap wetem yumi. Bambae i isi nomo blong tekem kantri ya i blong yumi.’ Be ol man Isrel oli no lesin. Oli wantem kilim Josua mo Keleb i ded.

Samting ya i mekem Jeova i kros tumas, mo hem i talem long Moses se: ‘Olgeta man we oli gat 20 yia i go antap, bambae oli no go long kantri blong Kenan. Oli luk finis ol merikel we mi mi mekem long Ijip mo long drae ples, be oli no trastem mi yet. Taswe, bambae oli wokbaot 40 yia long drae ples ya, go kasem we laswan blong olgeta ya i ded. Long olgeta ya, Josua mo Keleb nomo bambae oli go long kantri blong Kenan.’

Namba 13⁠:​1-33; 14⁠:​1-38.