Stori 45

Oli Gokros Long Jodan Reva

!YU LUK! !Ol man Isrel oli stap gokros long Jodan Reva! ?Be wehem ol wota blong reva ya? Long manis we oli krosem reva ya, oltaem i gat bigfala ren long ples ya. Smoltaem bifo we oli gokros, reva ya i fulapgud. !Be naoia i no moa gat wota long hem! !Ol man Isrel oli stap wokbaot long drae graon nomo olsem oli bin mekem blong gokros long Red Si! ?Ol wota i go wea? Bambae yumi luk.

Taem ol man Isrel oli rere blong gokros long Jodan Reva, Jeova i givim tok long Josua blong talem long ol man, i se: ‘Ol pris bambae oli karem bokis blong kontrak, mo bambae oli go fastaem. Ol man bambae oli kam biaen. Nao taem ol pris oli purumbut long wota blong Jodan Reva, long semtaem nomo, wota ya bambae i no moa ron.’

Nao ol pris oli karem bokis blong kontrak, oli go fastaem, mo ol man oli kam biaen. Taem oli kasem Jodan Reva, ol pris oli wokbaot i go nomo. Reva ya i ron strong mo wota i dip. !Be taem ol pris oli purumbut long wota ya, long semtaem nomo, wota i no moa ron! !Hemia wan merikel ya! Wota we i stap ron i kamdaon, Jeova i blokem, i mekem i stap fulap longwe. !Ale, smoltaem biaen, reva ya i drae!

Ol pris we oli stap karem bokis blong kontrak, oli wokbaot i go kasem medel blong ples ya we i drae. ?Yu luk olgeta ya long pija? !Oli stanap i stap long ples ya, gogo kasem we ol man Isrel evriwan oli gokros long reva ya long drae graon nomo!

Taem ol man oli gokros finis, Jeova i talem long Josua se: ‘Yu singaot 12 strong man, mo yu talem long olgeta blong oli go karemaot 12 bigfala ston, stret long ples we ol pris oli stap stanap long hem. Oli mas karem ol ston ya i kam, mo oli mas putum olgeta long ples ya we bambae yufala i stap long hem long naet ya. Mo samtaem, sipos ol pikinini blong yufala oli askem se “?Ol ston ya oli blong wanem?” bambae yufala i save talem long olgeta olsem wanem wota i no moa ron taem bokis blong kontrak blong mi i gokros long Jodan Reva. !Ol ston ya oli blong mekem yufala i tingbaot merikel ya oltaem!’ Josua tu i go hivimap twelef ston stret long medel blong krik ya, long ples we ol pris oli bin stanap long hem.

Taem oli mekem ol samting ya finis, Josua i talem long ol pris we oli stap karem bokis blong kontrak i se: ‘Yufala i kamaot long Jodan Reva ya.’ Nao taem olgeta ya oli kamaot, wota i stat ron bigwan bakegen olsem fastaem.

Josua 3⁠:​1-17; 4⁠:​1-18.

Stori 46

Stonwol We i Goraon Long Jeriko

?WANEM i mekem se stonwol ya we i goraon long Jeriko i foldaon? I luk olsem we samfala oli sakem wan bom long hem. Be long taem bifo, i no gat ol bom; mo i no gat ol masket tu. !Hemia wan merikel blong Jeova bakegen! Bambae yumi luk olsem wanem samting ya i hapen.

Lesin long tok we Jeova i talem long Josua: ‘Evri dei, yu wetem ol soldia blong yu, bambae yufala i mas maj i goraon long taon ya wan taem, gogo kasem sikis dei. Yufala i mas karem bokis blong kontrak i go wetem yufala. Seven pris bambae oli wokbaot i go fastaem long bokis blong kontrak, mo bambae oli stap blu long pupu blong olgeta.

‘Long namba seven dei, bambae yufala i mas maj i goraon long taon ya seven taem. Nao yufala i mas blu bigwan long pupu blong yufala mo pulum i longfala. Mo olgeta man evriwan oli mas singaot bigwan. !Nao bigfala stonwol blong taon ya bambae i foldaon evriwan!’

Ale, Josua mo ol man oli mekem olsem we Jeova i talem. Taem oli maj i goraon long taon ya, oli stap kwaet. I no gat wan long olgeta i toktok. I gat noes blong ol pupu we oli krae nomo wetem noes blong leg blong ol man we oli stap maj. Ol enemi blong ol man blong God long Jeriko oli mas fraet ya. ?Yu yu luk red string ya we i hang long wan windo? ?Hemia windo blong haos blong hu? Yes, Rehab i mekem olsem we tufala spae ya i bin talem long hem. Olgeta famle blong hem oli stap insaed wetem hem, oli stap lukluk i go afsaed.

Ale, long namba seven dei, ol man oli maj i goraon long taon ya seven taem. Nao, oli blu pupu, ol soldia oli singaot strong, mo stonwol i foldaon. Nao Josua i talem long olgeta se: ‘Yumi kilim evriwan long taon ya oli ded, mo yumi bonem olgeta long faea. Yumi bonem olgeta samting. Be bambae yumi no bonem ol silva mo gol wetem ol samting we oli wokem long bras mo long aean. Bambae yumi putum olgeta oli stapgud wetem ol sas samting long haos tapolen blong Jeova.’

Josua i talem long tufala spae ya se: ‘Yutufala i go long haos blong woman ya Rehab, yutufala i tekemaot hem, wetem ol famle blong hem.’ Yes, Rehab mo famle blong hem oli stap sef, olsem tufala spae i bin promes long hem.

Josua 6⁠:​1-25.