Stori 51

Rut Mo Nomi

LONG Baebol, i gat wan buk we nem blong hem Rut. Hem i stori blong wan famle we oli stap laef long taem we ol jaj oli wok long Isrel. Rut i wan yangfala woman blong kantri ya Moab. Hem i no joen long nesen blong God, Isrel. Be taem Rut i kasem save long trufala God Jeova, hem i lavem hem tumas. Nomi i wan olfala woman we i givhan long Rut blong kasem save long Jeova.

Nomi i wan woman Isrel. Taem kakae i sot long Isrel, Nomi wetem man blong hem mo tufala boe blong tufala, oli muv i go long kantri blong Moab. Wan dei, man blong Nomi i ded. Biaen, tufala boe blong Nomi tufala i maredem tu gel blong Moab, we nem blong tufala se Rut mo Opa. Be afta we 10 yia i pas, tufala boe blong Nomi tu i ded. !Nomi mo tufala gel Moab ya oli harem nogud tumas! ?Bambae Nomi i mekem wanem?

Nomi i mekemap tingting blong hem blong folem longfala rod i gobak long ples blong hem mo ol famle blong hem. Rut mo Opa tufala i wantem stap wetem hem, ale tufala i folem hem i go. Be afta we oli wokbaot blong smoltaem, Nomi i talem long tufala gel ya se: ‘Tufala. I moa gud yutufala i gobak long ples blong yutufala, yutufala i go stap wetem tufala mama blong yutufala.’

Nao hem i kis long tufala blong talem tata long tufala. Be tufala i krae bigwan from we tufala i lavem Nomi tumas. Tufala i talem se: ‘!No! Mitufala i mas kam wetem yu blong go stap wetem ol famle blong yu.’ Be Nomi i talem se: ‘Tufala dota blong mi. I gud yutufala i gobak, i moagud we yutufala i go stap long ples blong yutufala.’ Ale, Opa i tanemraon i gobak. Be Rut i no wantem go.

Nao Nomi i talem long Rut se: ‘Yu luk. Sista blong yu Opa i gobak finis. I gud yu tu, yu gobak wetem hem.’ Be Rut i talem se: ‘!Plis yu no talem long mi blong mi lego yu! Mi wantem kam wetem yu. Ples we yu bambae yu go long hem, mi tu bambae mi go long hem. Ples we yu bambae yu stap long hem, mi tu bambae mi stap long hem. Ol man ples blong yu bambae oli man ples blong mi, mo God blong yu bambae i God blong mi. Ples we yu bambae yu ded long hem, mi bambae mi ded long hem, mo bambae oli berem mi tu long ples ya.’ Taem Nomi i harem tok ya blong Rut, hem i no moa traem fosem hem blong gobak.

Ale tufala i wokbaot i go, nao tufala i kamtru long Isrel mo tufala i stap long ples ya. Tufala i kamtru stret long taem we ol man oli stat blong tekemaot bale long ol garen blong olgeta. Ale, wantaem nomo, Rut i stat wok long garen. Wan man we nem blong hem Boas i letem Rut blong i pikimap bale long garen blong hem. ?Yu yu save hu ya mama blong Boas? Hemia Rehab we i stap long taon ya Jeriko.

Wan dei, Boas i talem long Rut se: ‘Mi mi harem nius finis blong ol gudfala samting we yu yu mekem long Nomi, mama blong man blong yu. Mi save we yu yu lego stret papa mo mama blong yu, mo yu aot long ples blong yu, nao yu kam stap wetem mifala, we fastaem yu no save mifala nating. !Prea blong mi we Jeova bambae i mekem i gud tumas long yu!’

Rut i talem long hem se: ‘Masta, yu yu mekem i gud tumas long mi. From we yu toktok gud long mi olsem, yu leftemap tingting blong mi, nao mi mi harem gud.’ Boas i laekem Rut tumas, mo i no longtaem, tufala i mared. !Nomi i glad we i glad! Mo hem i glad moa taem Rut mo Boas i gat wan smol pikinini boe, nem blong hem Obed. Biaen, Obed i kam bubu man blong Deved. Bambae yumi toktok moa long saed blong Deved long ol narafala japta.

Buk blong Rut long Baebol.

Stori 52

Gideon Mo 300 Man Blong Hem

?YU YU luk wanem i stap hapen long ples ya? Ol man ya oli ol soldia blong Isrel. Oli stap nildaon blong dring wota. Man we i stap stanap klosap long olgeta, hemia Jaj Gideon. Hem i stap wajem olgeta blong luk wanem fasin oli folem blong dring wota.

Traem luklukgud long defdefren fasin blong ol man ya blong dring wota. Samfala oli nildaon, oli stap pusum hed blong olgeta i go long wota blong dring. Be wan man i stap kasem wota long han blong hem, i stap sakem i go long maot blong hem. Hem i mekem olsem, blong i save lukluk gud ol samting we i stap hapen raonabaot long hem. Hemia i impoten, from we Jeova i talem long Gideon blong jusumaot ol man nomo we oli stap lukaot gud taem oli stap dring. God i talem se, hem i mas sanem ol narafala oli gobak long haos blong olgeta. Bambae yumi luk from wanem hem i talem olsem.

Ol man Isrel oli stap long trabol bakegen. Trabol ya i kamaot from we oli no obei long Jeova. Ale, hem i letem olgeta oli go long han blong ol man Midian, nao ol man Midian oli stap rul long olgeta long fasin we i strong tumas. Ale, ol man Isrel oli krae i go long Jeova blong i givhan long olgeta. Mo Jeova i harem krae blong olgeta.

Jeova i talem long Gideon blong hivimap ol soldia blong hem, nao Gideon i singaot 32,000 man blong faet. Be i gat 135,000 soldia we bambae oli faet agens long Isrel. Nating se i olsem, Jeova i talem long Gideon se: ‘Ol man ya blong yu oli plante tumas.’ ?From wanem Jeova i talem olsem?

From we, sipos ol man Isrel oli winim faet ya, bambae oli save ting se oli winim long paoa blong olgeta nomo. Maet oli ting se oli no nidim Jeova blong givhan long olgeta. Taswe, Jeova i talem long Gideon se: ‘Yu mas talem long olgeta se, “!Ei! Sipos sam long yufala oli fraet, i gud oli gobak long ples blong olgeta.” ’ Taem Gideon i talem samting ya, 22,000 soldia oli girap oli gobak long ples blong olgeta. Naoia i gat 10,000 soldia nomo oli stap blong faet agensem 135,000 soldia blong ol man Midian.

!Be yu harem! Jeova i talem se: ‘No, ol man ya oli plante tumas yet ya.’ Nao hem i talem long Gideon blong tekem ol man ya oli godaon long wota blong oli dring. Olgeta we oli nildaon mo pusum hed blong olgeta i go long wota blong dring, hem i mas sanem olgeta oli gobak long ples blong olgeta. Jeova i mekem promes ya se: ‘Bambae mi yusum ol 300 man ya nomo blong sevem yufala. Hemia olgeta ya we oli bin lukaot gud taem oli stap dring.’

Ale ol man Isrel oli go blong faet long ol man Midian. Gideon i seraot ol 300 man blong hem long tri kampani. Hem i givim pupu mo bigfala graonpot long olgeta evriwan. I gat laet i stap laet smosmol insaed long ol graonpot ya. Klosap long medel naet, oli raonem kamp blong ol soldia we oli enemi blong olgeta. Nao wantaem nomo, olgeta evriwan oli blu long ol pupu blong olgeta, oli smasem ol graonpot blong olgeta, mo oli singsingaot bigwan se: ‘!Naef blong faet blong Jeova mo naef blong faet blong Gideon!’ Wantaem nomo, ol soldia we oli enemi blong olgeta oli wekap, be tingting blong olgeta i fasfas mo oli fraet. Olgeta evriwan oli ronronwe, mo ol man Isrel oli winim faet ya.

Jajes japta 6 kasem 8.