Stori 57

God i Jusum Deved

?YU YU luk wanem i stap hapen long ples ya? Boe ya i sevem wan smol sipsip, i karemaot sipsip ya long han blong bea ya. Bea ya i bin tekemaot smol sipsip ya i go blong i kakae hem. Be boe ya i resis i go biaen long bea ya, i stap faet wetem hem blong sevem smol sipsip ya. !Mo taem bea i jam long hem, hem kilim bea ya i ded! Wan narafala taem, hem i faet wetem wan laeon blong sevem wan sipsip. Boe ya i no save fraet ya. ?Yu save nem blong boe ya?

Hemia yangfala Deved blong taon ya Betlehem. Bubu man blong hem, Obed, hem i pikinini blong Rut mo Boas. ?Yu yu rimemba stori blong tufala ya? Papa blong Deved, hemia Jese. Deved i mekem wok blong lukaot long ol sipsip blong papa blong hem. Deved i bon 10 yia afta we Jeova i jusum Sol blong i kam king.

Wan dei, Jeova i talem long Samuel se: ‘Yu tekem spesel oel ya, yu go long Betlehem, yu go luk wan man, nem blong hem Jese. Mi mi jusumaot wan pikinini blong hem finis blong bambae i kam king.’ Taem Samuel i kamtru long Betlehem, hem i luk Eliab, fasbon pikinini blong Jese, nao i stap tingting se: ‘Mi ting se hem nao we Jeova i jusumaot.’ Be Jeova i talem long hem se: ‘Yu no tingbaot we man ya i longfala mo i naes. Mi mi no wantem man ya.’

Nao Jese i singaot narafala pikinini blong hem, Abinadab, i kam luk Samuel. Be Samuel i talem se: ‘No, hemia tu, Jeova i no jusum.’ Nao Jese i tekem Sama i kam. Samuel i talem se: ‘No, i no hemia yet we Jeova i jusum.’ Mo long fasin ya, hem i tekem seven pikinini blong hem oli kam pas long profet ya, be Jeova i no jusum wan long olgeta ya. Nao Samuel i askem long hem se: ‘?Yu gat sam moa pikinini blong yu i stap yet?’

Jese i talem se: ‘Yes, lasbon long olgeta i stap yet, be i stap lukaot long ol sipsip.’ Jese i sanem wan man i go blong tekem Deved i kam. Samuel i luk se boe ya i naes, bodi blong hem i strong mo fes blong hem i saen. Jeova i talem se: ‘!Hemia nao! !Yu girap, yu kafsaedem oel long hed blong hem!’ Mo Samuel i mekem olsem we Jeova i talem. Deved nao bambae i kam king blong Isrel.

1 Samuel 17⁠:​34, 35; 16⁠:​1-13.

Stori 58

Deved Mo Golaeat

BAKEGEN, ol man Filistia oli kam blong mekem faet long ol man Isrel. Tri bigfala brata blong Deved oli joen finis long ami blong Sol. Ale, wan dei, Jese i talem long Deved se: ‘Yu tekem kakae ya wetem ol bred ya, yu hareap, yu go long ples we trifala brata blong yu oli stap long hem, yu givim long trifala. Mo yu traem luk se trifala i oraet no olsem wanem.’

Taem Deved i kamtru long ples we ol ami oli stap long hem, hem i resis i go long ples blong faet, i go blong luk trifala brata ya blong hem. Golaeat, jampion blong ol man Filistia ya, i kamaot bakegen, i stap singaot i kam long ol man Isrel blong jikim olgeta. Hem i bin mekem samting ya evri moning mo evri sapa blong 40 dei. Hem i stap singaot se: ‘Yufala i traem jusumaot wan strong man blong yufala blong i kamdaon, mitufala i faet. Sipos hem i winim mi, i kilim mi, bambae mifala i kam slef blong yufala. Be sipos mi mi winim hem, mi kilim hem, bambae yufala i kam slef blong mifala. Yufala i no naf long mi. Yufala i traem jusumaot wan man.’

Deved i askem long sam soldia se: ‘?Sipos wan man i kilim Golaeat ya mo i tekemaot sem blong Isrel, bambae hem i kasem wanem?’

Wan soldia i talem se: ‘Sol bambae i givim bigfala mane long man we i kilim man ya, mo bambae i givim dota blong hem tu long hem.’

Be ol man Isrel oli fraet long Golaeat from we hem i bigwan tumas. Hem i longfala we i longfala, klosap 3 mita, mo hem i givim sil blong hem long wan narafala soldia blong i stap karem.

Sam soldia oli resis i go long King Sol blong talem long hem se Deved i wantem faetem Golaeat. Ale Sol i talem long Deved se: ‘!Deved! !Yu yu no naf nating! ?Bambae yu faet long man Filistia ya olsem wanem? Man ya i soldia oltaem long laef blong hem, be yu yu wan yang boe nomo.’ Be Deved i talem long hem se: ‘King, mi mi kilim wan laeon mo wan bea finis we tufala i kam tekemaot wan smol sipsip blong papa blong mi. Mo man Filistia ya we i stap jikim yumi, bambae mi kilim hem tu olsem we mi bin kilim laeon mo bea ya. !Jeova bambae i givhan long mi!’ Nao Sol i talem long hem se: ‘Oraet, yu go. Prea blong mi we Jeova bambae i stap wetem yu.’

Ale, Deved i godaon long wan smol reva, i pikimap faef ston we oli raon gud, i putum long basket blong hem. Nao hem i holem sling blong hem, i go blong faet agensem Golaeat. Taem Golaeat i luk Deved, hem i stap lukluk rabis long hem, from we hem i no naf nating blong faet. Long tingting blong Golaeat, bambae i isi nomo blong kilim Deved i ded.

Golaeat i talem se: ‘Ale, yu kam. Bambae mi givim bodi blong yu long ol pijin mo long ol wael anamol, blong oli kakae.’ Be Deved i ansa long hem se: ‘Yu yu kam blong faet long mi long spia mo naef blong faet mo sil blong yu, be mi mi kam blong faet long yu long nem blong Jeova. Tede nomo, hem bambae i putum yu long han blong mi. Hem bambae i winim yu, i kilim yu yu ded.’

Nao Deved i resis i go blong mekem faet long Golaeat. Deved i pusum han blong hem i go long basket blong hem, i tekemaot wan ston, i putum long sling, nao i slingim i go long man ya wetem olgeta paoa blong hem. Ston ya i go faerap long fored blong Golaeat, mo i brekem bun blong hed blong hem, nao hem i foldaon, we i ded wantaem. Taem ol man Filistia oli luk we jampion blong olgeta i ded, oli girap, oli ronronwe. Ol man Isrel oli biaen long olgeta mo oli winim olgeta long faet.

1 Samuel 17⁠:​1-54.