Stori 59

?From Wanem Deved i Mas Ronwe?

AFTA we Deved i kilim Golaeat i ded, Abnere we i komanda blong ami blong Isrel, i tekem Deved i go luk Sol. Sol i glad tumas long Deved. Hem i mekem hem i kam kapten blong ol soldia blong hem, mo i tekem hem i go stap long haos blong king.

Biaen, taem ol soldia oli stap kambak long wan faet we oli mekem long ol man Filistia, ol woman oli stap singsing se: ‘King Sol i kilim plante taosen man, be Deved i kilim plante plante taosen moa, i winim hem.’ I stat long taem ya, Sol i stap jalus, from we oli leftemap Deved i bitim Sol. Be Jonatan we i pikinini blong Sol, hem i no jalus. Hem i laekem Deved tumas, mo Deved tu i laekem Jonatan tumas. Ale tufala i mekem wan strong promes, se bambae tufala i fren gogo i no save finis.

Deved i gat gudhan blong plei miusik long hap, mo Sol i laekem blong lesin long miusik ya. Be wan dei, jalus i pulum Sol blong mekem wan samting we i nogud tumas. Taem Deved i stap plei miusik, Sol i karem wan spia, i traem blong sperem Deved i ded. Hem i se: ‘!Bambae mi sperem man ya i go pas long wol ya!’ Ale, hem i sakem spia, be Deved i mufwe long hem, nao spia i no kasem hem. Biaen, Sol i traem bakegen blong sperem Deved, be Deved i mufwe bakegen. Naoia Deved i save se hem i mas lukaotgud.

?Yu yu rimemba promes we Sol i bin mekem? Hem i bin talem se bambae hem i givim gel blong hem long man we i kilim Golaeat i ded. Ale, afta we sam taem i pas, Sol i talem long Deved se hem i save karem gel blong hem, Mikal. Be fastaem, hem i mas kilim i ded 100 man Filistia. !Tingbaot samting ya! Sol i wantem nomo se ol man Filistia oli kilim Deved i ded. Be oli no mekem olsem. Ale Sol i mas givim gel blong hem long Deved.

Wan dei, Sol i talem long Jonatan mo ol man blong wok blong hem se hem i wantem kilim Deved i ded. Be Jonatan i talem long papa blong hem se: ‘Papa, i nogud yu mekem wan samting nogud long Deved. Neva hem i mekem wan samting we i nogud long yu. Ol samting we hem i bin mekem oli givhan tumas long yu. Long taem ya we hem i kilim Golaeat, hem i rere blong letem laef blong hem. Mo taem yu yu luk samting ya, yu tu yu glad from.’

Sol i lesin long boe blong hem, mo hem i mekem wan strong promes se bambae hem i no kilim Deved i ded. Ale, oli singaot Deved i kam, mo oli tekem hem i kambak long king, blong i wok blong hem bakegen olsem fastaem. Be wan dei, taem Deved i stap plei miusik, Sol i sakem wan spia bakegen long Deved. Deved i mufwe, nao spia ya i go planem long wol. !Hemia namba tri taem we Sol i traem blong kilim Deved i ded! !Deved i luksave nao se hem i mas ronwe!

Long naet ya, Deved i go stap long prapa haos blong hem. Be Sol i sanem sam man oli go blong kilim hem i ded. Mikal i save plan blong papa blong hem. Ale hem i talem long man blong hem se: ‘Sipos yu no aot long ples ya long naet ya nomo, tumora, bambae yu ded.’ Long naet ya, Mikal i givhan long Deved blong i klaem i goaot long wan windo, i slakem hem i godaon long graon, nao Deved i ronwe. Blong klosap seven yia, Deved i mas haed olbaot long ol defdefren ples blong Sol i no faenem hem.

1 Samuel 18⁠:​1-30; 19⁠:​1-18.

Stori 60

Abigel Mo Deved

?YU YU save hu ya naesfala woman ya we i stap kam blong mitim Deved? Nem blong hem Abigel. Woman ya i gat hed, mo hem i blokem Deved blong i no mekem wan nogud samting. Be bifo we yumi tokbaot samting ya, bambae yumi luk wanem i hapen long Deved.

Taem we Deved i ronwe long Sol, hem i go haed long wan hol blong ston. Ol brata blong hem mo ol narafala famle blong hem oli kam joen long hem. I gat samwe long 400 man evriwan oli kam joen long Deved, mo hem i kam lida blong olgeta. Wan dei, Deved i go luk king blong Moab mo i talem long hem se: ‘?Plis, yu save letem papa mo mama blong mi, tufala i stap wetem yu long ples ya fastaem, go kasem taem we mi faenemaot wanem samting bambae i hapen long mi?’ Biaen, Deved wetem ol man blong hem oli go haed olbaot long ol hil.

Afta long samting ya, Deved i mitim woman ya Abigel. Man blong woman ya, Nabal, i gat graon blong hem mo i rij we i rij. Hem i gat 3,000 sipsip blong hem mo 1,000 nani. Nabal i wan had man. Be woman blong hem, Abigel, i naes we i naes. Mo tu, woman ya i save stret samting blong mekem. Wan taem, hem i sevem ful famle blong hem. Bambae yumi luk wanem we hem i mekem blong sevem famle blong hem.

Deved mo ol man blong hem, oli bin mekem i gud long Nabal. Oli bin givhan long hem blong lukaot long ol sipsip blong hem. Taswe, wan dei, Deved i sanem sam man blong hem blong oli askem long Nabal, blong hem i givim sam samting long olgeta. Ol man blong Deved oli kam luk Nabal taem hem wetem sam narafala man oli stap katem hea blong ol sipsip blong hem. Long dei ya, oli mekem wan lafet, mo Nabal i mekemrere plante gudfala kakae. Ale, ol man blong Deved oli talem long hem se: ‘Mifala i bin mekem i gud long yu. Mifala i no stilim wan sipsip blong yu, be mifala i givhan blong lukaot long olgeta. Mo naoia, sipos yu save givim sam kakae long mifala, plis yu givim.’

Be Nabal i talem se: ‘!Mi mi no save givim ol samting ya long ol man we mi no save weples oli kam long hem!’ Hem i tok strong tumas, mo i tok nogud long Deved tu. Taem ol man blong Deved oli kambak mo talemaot olgeta tok ya we man ya i talem, Deved i kros we i kros. Nao hem i talem long ol man blong hem se: ‘!Yufala i hangem naef blong faet blong yufala!’ Ale oli wokbaot i go blong kilim Nabal mo ol man blong hem.

Nao wan man blong wok blong Nabal i go talemaot long Abigel ol strong tok we man blong hem i bin talem. Ale Abigel i hareap, i hivimap plante kakae, i putum kakae ya long ol dongki, mo i stat wokbaot i go. Taem hem i mitim Deved long rod, hem i jamdaon long dongki blong hem, i bodaon long Deved we fes blong hem i kasem graon. Nao hem i talem se: ‘!Masta, plis yu harem mi! Plis yu no moa tingbaot man blong mi Nabal. !Nem blong hem i min se “Hafmad,” mo fasin blong hem i stret gud long nem ya! Plis yu tekem presen ya we mi karem i kam. Mo plis yu fogivim mi from ol rabis fasin ya we mi mi mekem long yu.’

Deved i talem se: ‘Yu yu wan waes woman. Yu yu blokem mi, blong mi no go kilim Nabal i ded, mo blong mi no givimbak ol samting nogud we hem i mekem long mi. Yu gohom, yu no wari.’ Biaen, taem Nabal i ded, Deved i tekem Abigel i kam wan woman blong hem.

1 Samuel 22⁠:​1-4; 25⁠:​1-43.