Stori 61

Deved i Kam King

BAKEGEN, Sol i ronem Deved. Hem i tekem 3,000 nambawan soldia blong hem, ale oli go lukaot Deved. Taem Deved i harem nius ya, hem i sanem sam man blong hem oli go blong faenemaot weples Sol mo ol soldia blong hem oli stap long hem long naet. Nao hem i askem long tufala man blong hem se: ‘?Hu long yutufala i wantem kam wetem mi blong go long ples ya we Sol olgeta oli stap long hem?’

Abisae i ansa se: ‘Mi bambae mi kam.’ Abisae, hem i pikinini blong sista blong Deved we nem blong hem Jeruia. Ale, taem Sol mo ol soldia blong hem oli stap slip, Deved mo Abisae tufala i go insaed long ples ya we ol haos tapolen blong olgeta oli stap long hem. Tufala i luk we Sol i stap slip mo klosap long hed blong hem i gat spia blong hem wetem wan botel wota. Ale tufala i karem spia mo botel wota ya. I no gat man i luk no i harem tufala, from we olgeta evriwan oli slip ded.

Traem luk Deved mo Abisae long pija ya. Tufala i ronwe finis, nao tufala i stap antap long wan hil. Deved i stap singaot i go long nambawan haeman blong ami blong Isrel se: ‘?Abnere, from wanem yu no stap lukaotgud long masta blong yu, king blong yumi? !Yu traem luk! ?Wehem spia blong king? ?Mo wehem botel wota ya we i stap klosap long hed blong hem?’

Sol i sek long voes blong Deved, ale i wekap. Hem i haremsave voes blong hem, mo i askem se: ‘?Yu ya, pikinini blong mi Deved?’ ?Yu yu luk Sol mo Abnere long pija ya?

Deved i ansa long Sol se: ‘Yes, king mo masta blong mi, mi ya.’ Nao Deved i askem long hem se: ‘?Yu yu stap ronem mi from wanem? ?Wanem samting nogud we mi mi mekem? King, hemia spia blong yu. Yu sanem wan man blong yu i kam tekem.’

Nao Sol i talem se: ‘Yes, Deved, i tru. Fasin ya we mi mi mekem, hem i nogud. Mi mi krangke ya.’ Nao Deved i aot, i folem rod blong hem, i go, mo king i gobak long hom blong hem bakegen. Be Deved i stap tingting se: ‘Samtaem, King Sol bambae i kilim mi yet ya. I moa gud mi ronwe, mi go stap long Filistia.’ Ale Deved i mekem olsemia. Hem i mekem ol man Filistia oli ting se hem i stap long saed blong olgeta.

Samtaem biaen, ol man Filistia oli go mekem faet long ol laen blong Isrel, mo long faet ya Sol mo Jonatan tugeta i ded. Deved i harem nogud tumas, nao hem i wokem wan gudfala singsing we i talem se: ‘!Jonatan! !Yu yu brata blong mi! !Mi mi stap krae from yu! !Mi mi lavem yu tumas!’

Biaen long samting ya, Deved i go stap bakegen long taon ya Hebron long Isrel. Be ol man blong Sol oli wantem se pikinini blong hem Isboset i kam king, mo ol man blong Deved oli wantem se hem i kam king, ale wan faet i kamaot. Afta we faet ya i gohed longtaem lelebet, ol man blong Deved oli win. Taem Deved i kam king, hem i gat 30 yia blong hem. Hem i rul blong seven yia haf long Hebron. Sam long ol pikinini boe blong hem we oli bon long ples ya, i gat Amnon, Absalom mo Adonia.

Nao King Deved wetem ol man blong hem oli go mekem faet blong winim wan naesfala taon, nem blong hem Jerusalem. Joab i lidim ol man long faet ya. Joab i wan narafala pikinini blong Jeruia, sista blong Deved. From we oli winim faet ya, Deved i mekem Joab i kam komanda blong ami blong hem. Nao King Deved i go stap long taon ya Jerusalem.

1 Samuel 26⁠:​1-25; 27⁠:​1-7; 31⁠:​1-6; 2 Samuel 1⁠:26; 3⁠:​1-21; 5⁠:​1-10; 1 Kronikel 11⁠:​1-9.

Stori 62

Trabol Long Haos Blong Deved

AFTA we Deved i stat rul long Jerusalem, Jeova i mekem se ami blong hem i winim plante faet agens long ol enemi blong olgeta. Jeova i promes finis blong givim kantri blong Kenan long ol man Isrel. Mo naoia, Jeova i givhan long olgeta blong kasem kantri ya we hem i bin promes blong givim long olgeta.

Deved i wan gudfala king. Hem i lavem Jeova. Taswe, afta we hem i winim Jerusalem, hem i hareap blong karem bokis blong kontrak blong Jeova, i kam long Jerusalem. Mo hem i wantem wokem wan haos blong putum bokis blong kontrak long hem.

Taem Deved i kam olfala lelebet, hem i mekem wan bigfala mastik. Hem i save se i no stret blong stilim samting we i blong narafala man. Be, wan dei, long sapa, hem i stap tekem fres win antap long ruf blong haos blong hem, nao hem i lukluk i godaon, mo i luk wan woman we i naes tumas. Nem blong woman ya Batseba, mo man blong hem, Uria, hem i wan soldia blong Deved.

Deved i wantem Batseba tumas, ale hem i sanem wan man i go blong tekem Batseba i kam long haos blong hem. Man blong Batseba i no stap, hem i go blong mekem faet. Ale, Deved i slip wetem woman ya, mo biaen, woman ya i gat bel. Deved i wari nao, ale i sanem toktok i go long komanda blong ami blong hem, Joab, blong i putum Uria i stap long ples we faet i strong moa. Olsemia nao, bambae Uria i ded. Taem Uria i ded, Deved i tekem Batseba i kam woman blong hem.

Jeova i kros we i kros long Deved. Nao hem i sanem man blong hem Natan i go luk Deved blong talemaot long hem ol nogud samting we hem i mekem. Yu save luk long pija ya we Natan i stap tok long Deved. Deved i sore tumas from bigfala sin we hem i mekem, ale Jeova i no kilim hem i ded. Be Jeova i talem long hem se: ‘From we yu mekem ol nogud samting ya, plante trabol bambae i kamaot long famle blong yu.’ !Mo i tru se Deved i kasem bigfala trabol!

Fastaem, pikinini boe we Batseba i bonem, hem i ded. Biaen, Amnon we i fasbon pikinini blong Deved, hem i fosem sista blong hem Tama blong slip wetem hem. Nao Absalom we i narafala pikinini blong Deved i kros we i kros, ale i girap i kilim Amnon i ded. Biaen bakegen, Absalom i pulum plante man blong oli tinghae long hem, nao hem i putumap hem wan i kam king. Deved i mekem faet agens long Absalom, mo Deved i winim faet ya be Absalom i ded. Yes i tru, Deved i kasem bigfala trabol tumas.

Long medel blong ol trabol ya, Batseba i bonem wan pikinini boe mo i putum nem blong hem se Solomon. Taem Deved i kam olfala mo i sik, pikinini blong hem Adonia, i traem blong putumap hem wan i kam king. Be Deved i talem long wan pris we nem blong hem Jadok blong i kafsaedem oel i go long hed blong Solomon, blong soem se hem nao bambae i king. Smoltaem biaen, Deved i ded, taem hem i gat 70 yia blong hem. Hem i bin rul blong 40 yia, nao biaen, Solomon i kam king blong Isrel.

2 Samuel 11⁠:​1-27; 12⁠:​1-18; 1 King 1⁠:​1-48.