Stori 71

God i Promes Blong Mekem Paradaes

PIJA ya i soemaot paradaes. Maet hem i klosap sem mak long vison we God i givim long profet Aesea we i stap laef jes afta long Jona.

Tok ya paradaes i minim “garen” no “ples blong spel.” ?Pija ya i mekem yu yu tingbaot wan narafala pija we yu luk finis long buk ya? Hem i olsem naesfala garen ya we Jeova God i wokem blong Adam mo Iv. ?Be yu ting se wan dei, olgeta ples long wol ya bambae oli kam paradaes?

Jeova i talem long profet Aesea blong raetemdaon tok blong hem long saed blong paradaes ya we ol man blong Hem bambae oli stap long hem long fiuja. Hem i se: ‘Wael dog mo pikinini blong sipsip bambae tufala i save stap wanples nomo, we tufala i fren gud. Ol pikinini blong buluk mo ol pikinini blong laeon bambae oli stap kakae wanples, mo smol pikinini nomo bambae i naf blong lukaot long olgeta. Mo bambae smol pikinini i save go pleplei stret long ples we posen snek i stap long hem.’

Plante man oli talem se: ‘Samting ya i no save hapen. Stat long taem bifo olgeta, i gat trabol long wol ya, mo bambae i stap olsem gogo i no save finis.’ Be traem tingbaot: ?Ples we God i wokem blong Adam mo Iv i stap long hem, hem i olsem wanem?

God i putum Adam mo Iv long wan paradaes. Tufala i lusum naesfala hom ya from we tufala i no moa obei long God. Biaen, tufala i kam olfala mo tufala i ded. God i mekem promes se bambae i givim ol samting ya we Adam mo Iv tufala i bin lusum, i go long ol man we oli lavem hem.

Long paradaes long fiuja, bambae i no gat samting we i save spolem man mo mekem ples i kam nogud. Bambae i gat pis olwe. Ol man bambae oli glad mo bodi blong olgeta bambae i strong mo helti. Bambae i olsem we God i wantem fastaem. Biaen, bambae yumi tokbaot olsem wanem God bambae i mekem paradaes ya i kamtru.

Aesea 11⁠:​6-9; Revelesen 21⁠:​3, 4.

Stori 72

God i Halpem King Hesekia

?YU YU save from wanem man ya i stap prea long Jeova? ?From wanem hem i putum ol leta ya oli stap long fored blong olta blong Jeova? Man ya hem i Hesekia. Hem i king blong tufala laen blong Isrel long saot. Mo hem i kasem bigfala trabol. ?From wanem?

Ol ami blong Asiria oli spolem finis ol 10 laen blong Isrel long not. Jeova i letem samting ya i hapen, from we ol man ya oli kam nogud tumas. Mo naoia, ol ami blong Asiria oli stap kam blong faet agens long tufala laen we oli stap.

King blong Asiria i jes sanem sam leta i kam long King Hesekia. Hemia nao ol leta we Hesekia i putum long fored blong God long pija ya. Ol leta ya oli jikim Jeova, mo oli talem long Hesekia se i westem taem blong trastem Jeova. Taswe, Hesekia i prea long Jeova se: ‘Jeova, plis yu blokem ol man Asiria ya, yu sevem mifala, blong ol man blong olgeta ples long wol bambae oli save we yu nomo yu tru God.’ ?Jeova i lesin long Hesekia?

Hesekia i wan gudfala king. Hem i no folem ol nogud fasin olsem ol rabis king blong ol 10 laen blong Isrel, mo olsem papa blong hem King Ahas. Hesekia i traehad oltaem blong obei long ol loa blong Jeova. Taswe, afta we Hesekia i prea, profet Aesea i sanem toktok blong Jeova i kam long hem se: ‘King blong Asiria wetem ol soldia blong hem bambae oli no save kam insaed long taon ya Jerusalem. Bambae oli no save lego wan ara nating i kam long hem. Ol soldia ya bambae oli no save kam klosap long taon ya.’

Traem lukluk pija ya. ?Yu luk ol soldia ya we oli ded finis? Hemia ol soldia blong Asiria. Jeova i sanem wan enjel blong hem i kam, nao long wan naet, enjel ya i kilim i ded 185,000 soldia blong Asiria. King blong Asiria i sem, nao hem i aot i gobak long ples blong hem.

Jeova i sevem tufala laen blong Isrel, mo blong smoltaem i gat pis. Be afta we Hesekia i ded, pikinini blong hem Manase i kam king, mo Manase wetem pikinini blong hem Amon, tufala i folem ol nogud fasin. Ale, kantri i kam fulap bakegen long ol rabis fasin mo fasin blong kilim man. King Amon i ded long han blong wan man blong wok blong hem nomo, mo pikinini blong hem Josaea i kam king blong tufala laen ya.

2 King 18⁠:​1-36; 19⁠:​1-37; 21⁠:​1-25.