Stori 79

Oli Sakem Daniel i Go Long Ol Laeon

LONG pija ya, i luk olsem we Daniel i kasem bigfala trabol. !Be ol laeon oli no stap kakae hem! ?Yu save from wanem? ?Hu i sakem Daniel i go long ol laeon ya? Bambae yumi luk.

Naoia, man ya Darias i king blong Babilon. Hem i laekem Daniel tumas from we Daniel i kaen mo i waes. Darias i jusum Daniel blong i kam namba tu rula long kingdom blong hem. From samting ya, ol narafala man oli jalus long Daniel, ale oli traem spolem hem.

Oli go luk Darias mo oli talem long hem se: ‘Mifala i agri se i gud yu putum wan loa, se i stat naoia gogo kasem toti dei, bambae i no gat man i save askem samsamting long god no long ol man, bambae olgeta man oli mas askem long yu nomo. Mo man we i brekem loa ya, bambae oli sakem hem i go long hol we i fulap long ol laeon.’ Darias i no save from wanem ol man ya oli wantem hem blong putum loa ya. Be hem i ting se i wan gudfala loa, ale hem i raetem loa ya mo i saen long hem. Naoia i no gat wan man i save jenisim loa ya.

Taem Daniel i harem we king i putum wan loa olsem, hem i go long haos blong hem mo i prea long God, olsem hem i stap mekem oltaem. Ol man nogud ya oli save se Daniel i no save lego fasin ya blong prea oltaem long Jeova. Olgeta ya oli glad, from we i luk olsem we plan blong olgeta blong spolem Daniel i stap wok.

Taem King Darias i faenemaot from wanem ol man ya oli wantem putum loa ya, hem i harem nogud tumas. Be hem i no save jenisim loa ya, ale hem i givim oda long ol man blong hem blong oli go holem Daniel, oli sakem hem i go long ol laeon. Be king i talem long Daniel se: ‘Prea blong mi we God blong yu we yu stap wok blong hem, hem bambae i sevem yu.’

Long naet ya, Darias i no slip nating. Hem i harem nogud tumas. Long eli moning, hem i girap, i hareap blong go long hol ya we i fulap long ol laeon. Yu save luk hem long pija ya. Hem i singaot long Daniel se: ‘!Daniel o! !Yu yu man blong wok blong God ya we i laef i stap we i stap! ?Olsem wanem? ?Hem i sevem yu? ?Ol laeon oli no kakae yu?’

Daniel i ansa long hem se: ‘God i sanem enjel blong hem i kam satem maot blong ol laeon ya, nao oli no kakae mi.’

King i glad we i glad tumas, mo i talem long ol man blong hem blong oli pulumaot Daniel long hol ya. Nao king i putum wan tok blong oli holem ol man ya we oli bin tok agens long Daniel, oli sakem olgeta i godaon long hol ya we i fulap long ol laeon. Ol man ya oli no kasem botom blong hol ya yet, be ol laeon oli jam long olgeta oli terem olgeta, oli brebrekem ol bun blong olgeta.

Nao King Darias i raetem ol leta i go long olgeta man long ol kantri we hem i rul long olgeta. Hem i talem se: ‘Mi wantem talemaot se long evri ples, olgeta man oli mas ona long God blong Daniel. Hem i stap wokem ol saen mo ol samting blong sapraes. Hem i sevem Daniel, i blokem ol laeon oli no kakae hem.’

Daniel 6⁠:​1-28.

Stori 80

Ol Man Blong God Oli Aot Long Babilon

KLOSAP tu yia i pas finis, stat long taem we ol man Media mo ol man Pesia oli winim Babilon. !Traem luk wanem i stap hapen naoia! Yes, ol man Isrel oli stap goaot long Babilon. ?Olsem wanem oli kamfri? ?Hu i letem olgeta oli gofri?

Sirus, we i king blong Pesia, hem nao i letem olgeta oli gofri. Longtaem bifo we Sirus i bon, Jeova i givim tok long Aesea long saed blong Sirus se: ‘Sirus. Yu bambae yu mekem olsem we mi mi wantem. Doa blong bigfala stonwol blong taon ya, bambae i open i stap nomo, bambae yu go insaed mo winim taon ya.’ Mo i tru, Sirus nao i lidim ol ami blong oli go winim Babilon. Ol ami blong Media mo Pesia oli kam insaed long taon ya long naet, oli pastru long ol doa blong bigfala stonwol we oli open i stap nomo.

Aesea, profet blong Jeova, i bin talem tu se Sirus bambae i givim oda blong oli wokem bakegen Jerusalem mo haos blong God. ?Olsem wanem? ?Sirus i givim oda ya? Yes. Hem i talem long ol man Isrel se: ‘Yufala i mas gobak long Jerusalem, yufala i mas stanemap bakegen haos blong God blong yufala, Jeova.’ Mo hemia nao samting we ol man Isrel ya oli stap go blong mekem.

Be i no olgeta man Isrel evriwan we oli naf blong mekem longfala trip ya i gobak long Jerusalem. Rod ya i longfala tumas, samwe long 800 kilometa. Mo plante long olgeta oli olfala tumas mo oli sik. I gat sam narafala samting tu we i blokem samfala blong oli no gobak. Olgeta we oli no save gobak, Sirus i talem long olgeta se: ‘Yufala i mas givim silva mo gol mo ol narafala presen long olgeta we oli go blong bildim bakegen Jerusalem mo haos blong God.’

Ale, ol man oli givim plante samting long ol man Isrel we oli stap gobak long Jerusalem. Mo tu, Sirus i givimbak ol besin mo ol kap we King Nebukadnesa i bin karemaot long haos blong Jeova taem hem i spolem Jerusalem. Ol man ya oli karem plante samting i gobak wetem olgeta.

Ol man Isrel oli wokbaot klosap fo manis, nao oli kamtru long Jerusalem long stret taem we Jeova i makem. Hemia 70 yia stret, stat long taem we ol ami oli bin spolem Jerusalem, mo ol man oli aot long ples ya. Be, nating se ol man Isrel oli kasem ples blong olgeta bakegen, oli fesem hadtaem yet, olsem yumi luk long nekis stori.

Aesea 44⁠:28; 45⁠:​1-4; Esra 1⁠:​1-11.