Stori 81

Oli Trastem God Blong Halpem Olgeta

PLANTE taosen man oli aot long Babilon, oli mekem longfala trip ya blong gobak long Jerusalem. Be taem oli kamtru long Jerusalem, oli luk we ol haos oli brobrok nogud. I no moa gat man i stap long ples ya. Ol man Isrel oli mas bildim evri samting bakegen.

Wan long ol faswan samting we oli wokem, hemia wan olta. Olta i wan ples blong bonem ol anamol, blong givim presen i go long Jeova. Sam manis biaen, oli stat blong bildim haos blong God bakegen. Be ol enemi we oli stap long ol kantri klosap, oli no wantem we ol man Isrel oli bildim bakegen haos blong God. Oli traem blong mekem olgeta oli fraet, blong bambae oli no moa gohed long wok ya. Afta we sam taem i pas, ol enemi ya oli pulum niufala king blong Pesia blong putum wan loa blong stopem wok ya.

Stat long taem we ol man Isrel oli aot long Babilon oli kambak, 17 yia i pas finis. Nao Jeova i sanem tufala profet blong hem, Hagae mo Sekaraea, blong tufala i talem long ol man se oli mas gohed long wok blong bildim Jerusalem bakegen. Oli trastem God se bambae hem i halpem olgeta, ale oli obei long tufala profet ya. Oli gohed blong bildim taon ya, nating se loa i stap se oli no mas mekem wok ya.

Nao wan haeman blong Pesia, nem blong hem Tatenae, i kam askem long ol man Isrel se hu nao i givim raet long olgeta blong bildim bakegen haos blong God. Oli talem long hem se taem oli stap long Babilon, King Sirus i talem long olgeta se: ‘Yufala i go long Jerusalem, nao yufala i bildim bakegen haos blong God blong yufala, Jeova.’

Tatenae i sanem wan leta i go long Babilon blong faenemaot sipos Sirus i rili bin talem samting ya. Be Sirus i ded finis. I no longtaem, niufala king blong Pesia i sanem wan leta i kambak. Hem i talem se i tru we Sirus i bin talem tok ya long olgeta. King i raetem se: ‘Yufala i mas letem ol man Isrel oli gohed blong wokem haos blong God bakegen. Mo mi mi talem long yufala se, yufala tu i mas givhan long olgeta.’ Samwe long fo yia biaen, oli finisim haos blong God, mo ol man Isrel oli glad tumas.

Klosap 48 yia i pas, nao ol man Jerusalem oli kam pua tumas, mo taon ya wetem haos blong God i no moa naes. Man Isrel ya Esra we i stap long Babilon yet, hem i harem nius se haos blong God i kam nogud bakegen. ?Esra i mekem wanem?

Hem i go luk Ataksekses we i king blong Pesia. Gudfala king ya i givim plante samting long Esra blong karem i gobak long Jerusalem. Esra i askem long ol man Isrel long Babilon blong oli go wetem hem, blong karem ol presen ya oli gobak long Jerusalem. Samwe long 6,000 man oli glad blong go wetem hem. Oli karem plante silva mo gol mo ol narafala sas samting oli gobak.

Esra i wari from we i gat plante nogud man long rod we oli save kilim ol man Isrel ya mo stilim silva mo gol we oli stap karem. Taswe Esra i singaot ol man oli kam wanples, olsem yu luk long pija ya. Nao oli prea long Jeova blong askem long hem blong lukaotgud long olgeta long longfala trip ya.

Mo i tru se Jeova i lukaotgud long olgeta. Afta we oli wokbaot blong fo manis, oli kamtru long Jerusalem. Mo i no gat wan trabol long rod. Samting ya i soem se Jeova i save lukaotgud long ol man we oli trastem hem.

Esra japta 2 kasem 8.

Stori 82

Modekae Mo Esta

BAMBAE yumi tingbaot samting we i hapen sam yia bifo we Esra i gobak long Jerusalem. Modekae mo Esta we tufala i blong Isrel, tufala i hae moa i bitim ol narafala man Isrel long kingdom blong Pesia. Esta i kwin, mo kasen brata blong hem Modekae, i namba tu rula long kantri ya. Bambae yumi luk olsem wanem tufala i kasem haenem olsem.

Taem Esta i smol, papa mama blong hem i ded, nao Modekae i lukaot long hem. Long taem ya, Sekses i king blong Pesia, mo haos blong hem i stap long taon ya Susa. Modekae i wan man blong wok blong hem. Wan dei, woman blong king we nem blong hem Vasti, i no wantem obei long king, nao king i jusum wan narafala woman blong bambae i kam kwin. ?Hem i jusum hu? Yes, hem i jusum yangfala Esta we hem i naes tumas.

Long pija ya, yu save luk wan flas man we ol man oli stap bodaon long hem. Hemia Haman. Hem i wan haeman long Pesia. Haman i wantem se Modekae tu i bodaon long hem. Yu save luk Modekae long pija ya. Hem i stap sidaon nomo, i no wantem bodaon long Haman. Hem i ting se i no stret blong bodaon long wan man nogud olsem. Haman i kros we i kros, nao hem i mekem wan samting blong traem spolem Modekae.

Haman i go luk king mo i talem ol giaman toktok long saed blong ol man Isrel. Hem i se: ‘Olgeta ya oli rabis man we oli no save obei long ol loa blong yu. I moa gud se oli ded.’ King Sekses i no save se woman blong hem Esta i wan woman Isrel. Ale, hem i harem tok blong Haman, nao hem i putum wan loa blong makem wan stret dei we ol man Isrel oli mas ded long hem.

Taem Modekae i harem nius ya, hem i harem nogud tumas. Hem i sanem toktok i go long Esta se: ‘Yu mas talemaot ol samting ya long king, mo yu mas plis long hem blong i sevem yumi.’ Folem loa blong Pesia, i tabu blong wan man i go luk king sipos king i no singaot hem i kam. Be nating, Esta i go luk hem. Taem Esta i kam insaed, king i stretem han blong hem blong Esta i holem wokingstik blong hem we oli wokem long gol. Samting ya i min se bambae oli no kilim Esta i ded. Nao Esta i singaot king mo Haman blong tufala i kam long wan bigfala lafet. Long lafet ya, king i askem long Esta wanem samting we hem i wantem. Esta i ansa se, bambae hem i talemaot samting ya long nekis dei, sipos king mo Haman i kam long wan narafala kakae bakegen.

Long kakae ya, Esta i talem long king se: ‘Mi wetem ol man ples blong mi, wan man i gat plan blong kilim mifala i ded.’ King i kros we i kros. Hem i askem se: ‘?Hu ya i wantem mekem samting ya?’

Esta i talem se: ‘!Enemi ya blong mifala we i wantem spolem mifala, man nogud ya Haman!’

King i kros we i kros gud, nao hem i givim oda se oli mas kilim Haman i ded. Afta, king i putumap Modekae i kam namba tu rula, king nomo i hae moa long hem. Nao Modekae i meksua se i gat wan niufala loa we i givim raet long ol man Isrel blong faet blong sevem laef blong olgeta, long dei ya we oli mas ded long hem. From we Modekae i wan haeman naoia, plante man oli givhan long ol man Isrel, nao oli winim faet ya.

Buk blong Esta long Baebol.