Stori 89

Jisas i Ronemaot Ol Man Ya Long Haos Blong God

LONG pija ya, Jisas i kros tumas. ?Yu save from wanem hem i kros? From we ol man ya long haos blong God long Jerusalem oli gat fasin blong wantem mane tumas. Oli stap traem blong winim plante mane long ol man we oli kam long haos blong God blong wosip.

Traem luk ol yangfala buluk ya, wetem ol sipsip mo nawimba. Ol man ya oli stap salem ol anamol ya long haos blong God. ?From wanem? From we ol man Isrel oli nidim ol anamol mo pijin blong mekem sakrefaes i go long God.

Folem loa blong God, taem wan man Isrel i mekem sin, hem i mas givim wan presen i go long God. Mo i gat sam narafala taem tu we oli mas mekem sakrefaes. ?Be ol man Isrel oli save kasem ol anamol mo pijin wea?

Sam man Isrel oli gat ol prapa anamol mo pijin blong olgeta we oli save givim olsem presen long Jeova. Be plante man oli no gat. Mo samfala oli stap longwe tumas long Jerusalem, ale oli no save karem ol prapa anamol blong olgeta oli kam long haos blong God. From samting ya, oli mas pem ol anamol mo pijin we oli nidim. Be ol man we oli stap salem ol anamol ya, oli sasem olgeta tumas. Oli stap stilim ol man. Mo tu, i no stret we oli salem ol anamol ya insaed long haos blong God.

Taem Jisas i luk samting ya, hem i kros tumas. Nao hem i girap i kafsaedem tebol blong ol man ya wetem ol mane blong olgeta. Mo tu, hem i tekem sam smol rop, i mekem wip long hem. Nao hem i ronem ol anamol oli aot long haos blong God. Mo hem i tok long ol man we oli stap salem ol nawimba, i se: ‘!Yufala i tekem ol samting ya i go afsaed! Yufala i no mekem haos blong Papa blong mi i kam wan ples blong winim mane.’

Sam disaepol blong Jisas oli stap wetem hem long haos blong God long Jerusalem. Oli sapraes taem oli luk samting we Jisas i mekem. Nao oli tingbaot tok blong Baebol long saed blong Jisas se: ‘Hem i wantem tumas we evri samting long haos blong God oli mas stret gud. Oltaem tingting ya i stap wok insaed long hem, olsem faea we i stap laet.’

Jisas i stap long Jerusalem blong mekem lafet blong Pasova, mo long semtaem, hem i mekem plante merikel. Afta, Jisas i aot long Judia, blong gobak long Galili. Hem i pas long Sameria. Bambae yumi luk wanem i hapen long ples ya.

Jon 2⁠:​13-25; 4⁠:​3, 4.

Stori 90

Hem i Toktok Long Wan Woman Long Wel Ya

LONG Sameria, Jisas i stop long wan wel blong spel smol. Ol disaepol blong hem oli go long taon blong pem kakae. Long pija ya, Jisas i stap toktok long wan woman we i kam blong pulum wota long wel ya. Hem i talem long woman ya se: ‘Ei, yu givim smol wota long mi. Mi wantem dring.’

Woman ya i sek. ?From wanem? From we Jisas i wan man Jiu be woman ya i blong Sameria. Mo plante man Jiu oli no laekem ol man Sameria. !Oli no save talem halo long olgeta! Be Jisas i lavem olgeta man. Taswe hem i talem long woman ya se: ‘Yu yu no save mi. Sipos yu save mi, bambae yu save askem wota long mi, nao mi bambae mi save givim wota long yu we i gat laef long hem.’

Woman ya i talem se: ‘Masta, yu yu no gat baket, mo wel ya i godaon tumas. ?Wota ya we i gat laef long hem, bambae yu yu save kasem olsem wanem?’

Jisas i talem se: ‘Man we i dring wota blong wel ya bambae i save tosta bakegen. Be man we i dring wota ya we mi bambae mi givim long hem, bambae hem i kasem laef we i no save finis.’

Woman ya i talem se: ‘Masta, plis yu givim wota ya long mi, blong bambae mi no moa save tosta bakegen samtaem, mo bambae mi no moa kam long ples ya bakegen blong kasem wota.’

Woman ya i ting se Jisas i stap tokbaot prapa wota. Be Jisas i stap tokbaot trutok long saed blong God mo kingdom blong hem. Trutok ya i olsem gudfala wota we i save givim laef long man. Trutok ya i save givim laef we i no save finis.

Nao Jisas i talem long woman ya se: ‘Ale, yu go singaot man blong yu, yutufala i kam long ples ya.’

Woman ya i talem se: ‘Mi mi no gat man.’

Jisas i talem se: ‘Tok blong yu i tru ya we yu talem se yu no gat man. Yu yu mared long faef man finis. Mo man ya we yu stap wetem hem naoia, hem i no stret man blong yu.’

Woman ya i sapraes tumas, from we Jisas i talem ol tok we i stret nomo. ?Olsem wanem Jisas i save ol samting ya? Hem i save from we hem i Man ya we God i promes blong sanem i kam long wol ya, mo God nao i stap givim ol save ya long hem. Nao stret long taem ya, ol man blong Jisas oli kambak, mo oli sapraes tumas taem oli luk we hem i stap toktok long wan woman Sameria.

?Stori ya i tijim yumi long wanem samting? Hem i soem se Jisas i mekem i gud long olgeta man nomata se oli blong wanem laen mo kala. Mo yumi mas mekem olsem hem. Yumi no mas ting se samfala oli nogud from we oli blong narafala laen. Jisas i wantem se olgeta man evriwan oli save trutok we i save givim laef blong olwe long olgeta. Mo yumi tu, yumi mas wantem blong givhan long olgeta man blong oli save trutok.

Jon 4⁠:​5-43; 17⁠:3.