Stori 93

Jisas i Givim Kakae Long Plante Man

WAN nogud samting i jes hapen. Oli kilim Jon Baptaes i ded. Woman blong king, nem blong hem Herodias, hem i no laekem Jon. Ale, hem i wokem wan plan blong pulum king blong talem long ol man blong hem se oli mas katemaot hed blong Jon.

Nius ya i mekem Jisas i harem nogud tumas. Ale, hem i wokbaot i go long wan ples we i no gat man long hem. Be ol man oli biaen long hem. Taem Jisas i luk bigfala hip blong ol man ya, hem i sore long olgeta. Ale, hem i tijim olgeta long saed blong kingdom blong God, mo hem i mekem ol sikman oli kamgud bakegen.

Long sapa ya, ol disaepol blong Jisas oli kam long hem mo oli talem se: ‘Ples ya i wan trabol ples, mo i no longtaem bambae i tudak. I gud yu sanemaot ol man ya, blong oli save go long ol vilej blong pem kakae blong olgeta.’

Jisas i talem se: ‘No, oli save stap. I gud yufala nomo i givim kakae long olgeta.’ Jisas i askem long Filip se: ‘?Bambae yumi save pem bred wea, blong ol man ya oli save kakae?’

Filip i talem se: ‘!Ei! Bambae yumi nidim bigfala mane blong pem kakae we i naf blong olgeta evriwan ya oli save kakae smosmol nomo.’ Nao Andru i talem long Jisas se: ‘Yang boe ya we i stap karem kakae blong yumi, hem i gat faef bred mo tu fis. Be bambae i no naf nating long olgeta man ya.’

Jisas i talem se: ‘Yufala i mekem olgeta ya oli sidaon long gras.’ Nao Jisas i talem tangkiu long God, mo i brekem bred ya long ol pis. Nao ol disaepol oli givimaot bred ya long olgeta evriwan. Oli mekem olsem long fis tu. I gat 5,000 man long ples ya, wetem plante taosen woman mo pikinini. Olgeta evriwan oli kakae olsem oli wantem. !Nao ol disaepol oli go pikimap ol haf kakae we i stap, mo oli fulumap long 12 bigfala basket, we oli fulapgud!

Nao Jisas i talem long ol disaepol blong hem blong oli klaem long wan bot, oli gokros long Bigfala Lugun blong Galili. Nao i kam tudak, mo i gat wan bigfala win i blu, we i mekem wota long lugun ya i raf we i raf, nao ol wef oli saksakem bot blong olgeta i go olbaot. Ol disaepol oli fraet tumas. Be, long medel naet, oli luk wan narakaen samting. Wan man i stap wokbaot antap long wota, i stap kam klosap long bot blong olgeta. Oli fraet tumas mo oli kraeaot, from we oli no save wanem samting oli stap lukluk.

Jisas i talem long olgeta se: ‘!Mi nomo ya! Yufala i no fraet.’ Be oli no savegud yet se Jisas. Ale, Pita i talem se: ‘?Masta, i tru, yu ya? Sipos i olsem, yu talem long mi blong mi wokbaot antap long wota, mi kam long yu.’ Jisas i talem se: ‘!Yu kam!’ Mo Pita i aot long bot, i stat wokbaot antap long wota. Be taem hem i harem we win ya i strong, hem i fraet, nao i stat draon, be Jisas i sevem hem.

Long wan narafala taem bakegen, Jisas i givim kakae long plante taosen man. Long taem ya, hem i gat seven bred mo sam smol fis nomo. Mo bakegen, i gat plante kakae blong olgeta man. ?Yu yu ting se fasin blong Jisas blong lukaotgud long ol man i gud tumas? !Taem hem i rul olsem king we God i putumap, bambae yumi no moa trabol from wan samting!

Matiu 14⁠:​1-32; 15⁠:​29-38; Jon 6⁠:​1-21.

Stori 94

Hem i Lavem Ol Pikinini

LONG pija ya, Jisas i stap putum han blong hem i goraon long wan smol boe. Yu luksave nomo se Jisas i rili laekem ol pikinini. Ol man we oli stap lukluk Jisas, hemia ol aposol blong hem. ?Jisas i stap talem wanem long olgeta? Bambae yumi luk.

Jisas mo ol aposol blong hem oli jes kambak long wan longfala trip. Long rod, ol aposol oli stap raorao. Long en blong trip ya, Jisas i askem long olgeta se: ‘?Wanem samting ya we yufala i stap rao from long rod?’ Jisas i save finis wanem samting oli stap rao from. Be hem i askem kwestin ya blong luk sipos ol aposol blong hem bambae oli talem long hem.

Be olgeta oli no save ansa long hem, from we long rod, oli stap rao se hu long olgeta i hae moa. Sam aposol oli wantem kam ol man we oli impoten moa long ol narafala. ?Jisas i talem wanem blong soem se i no stret we oli wantem kam hae moa long ol narafala?

Hem i singaot wan smol boe i kam long hem, i putum hem i stanap long medel blong olgeta. Nao hem i talem long ol disaepol blong hem se: ‘Tru mi talem long yufala, sipos yufala i no jenisim fasin blong yufala blong kam olsem pikinini, bambae yufala i no save kam insaed long kingdom blong God. Man we i kam olsem pikinini, hem bambae i hae moa long kingdom blong God.’ ?From wanem Jisas i talem olsem?

Hem i talem olsem from we ol smol pikinini oli no gat tingting blong kam hae moa no impoten moa i bitim ol narafala. Ale, ol aposol oli mas tekem fasin ya blong ol pikinini, oli no mas raorao se hu nao i moa hae no hu i moa impoten.

I gat sam narafala taem bakegen we Jisas i soem se hem i laekem tumas ol pikinini. Sam manis biaen, sam man oli karem ol pikinini blong olgeta oli kam long Jisas. Be ol aposol oli traem blokem olgeta. Jisas i talem long ol aposol ya se: ‘Yufala i no blokem ol pikinini ya. Yufala i letem olgeta oli kam long mi, from we ol pikinini tu oli gat raet wetem ol man long kingdom blong God.’ Nao hem i putum han blong hem i goraon long ol pikinini ya, mo i blesem olgeta. I gud tumas blong save se Jisas i lavem ol pikinini.

Matiu 18⁠:​1-4; 19⁠:​13-15; Mak 9⁠:​33-37; 10⁠:​13-16.