Stori 97

Jisas i Kamtru Olsem King

SMOLTAEM afta we Jisas i mekem tufala blaenman i gud bakegen, hem i kamtru long wan smol vilej klosap long Jerusalem. Nao hem i talem long tufala disaepol blong hem se: ‘Yutufala i go long vilej ya, nao bambae yutufala i luk wan yangfala dongki we olgeta oli fasem finis. Bambae yutufala i tekemaot rop blong hem, yutufala i tekem hem i kam.’

Taem oli tekem dongki ya i kam long Jisas, Jisas i sidaon antap long hem. Nao hem i raed i go long Jerusalem, we i klosap nomo. Taem hem i kam klosap long doa blong taon ya, wan bigfala hip blong ol man i kam blong mitim hem. Plante blong olgeta oli tekemaot kot blong olgeta, oli putum long rod long fored blong Jisas. Samfala oli katem ol han blong pamtri tu mo oli putum olgeta long rod. Oli singaot se: ‘!Jeova bambae i blesem king ya we i kam long nem blong hem!’

Long Isrel bifo, ol man we oli jes kam king oli folem fasin ya blong sidaon long wan yangfala dongki mo raed i go long Jerusalem. Hemia blong ol man oli luk niufala king. Hemia nao samting we Jisas i stap mekem. Mo ol man ya oli stap soemaot se oli wantem we Jisas i king blong olgeta. Be i no olgeta man evriwan we oli wantem hem. Samting we i hapen long haos blong God, i soemaot se samfala oli no laekem hem.

Long haos blong God, Jisas i mekem ol blaenman oli gud bakegen wetem olgeta we leg blong olgeta i nogud. Taem ol pikinini oli luk samting ya, oli presem Jisas. Nao ol jif pris oli kam kros, oli talem long Jisas se: ‘!Ei! ?Yu harem tok ya we oli stap talem?’

Jisas i ansa se: ‘Yes, mi mi harem. ?Be ating yufala i no ridim wan tok long Baebol we i talem se, “Ol smosmol pikinini, be God i mekem we olgeta oli save presemgud hem.” ’ Ale ol pikinini oli gohed blong presem hem olsem king we God i jusumaot.

Yumi mas mekem olsem ol pikinini ya. Samfala bambae oli traem blokem yumi, blong yumi no tokbaot kingdom blong God. Be yumi mas gohed nomo blong talemaot ol nambawan samting we Jisas bambae i mekem long ol man.

Taem Jisas i stap long wol, i no stret taem yet blong hem i stat rul olsem king. ?Samting ya bambae i kamtru wetaem? Ol disaepol blong Jisas oli wantem save. Bambae yumi tokbaot kwestin ya long nekis stori.

Matiu 21⁠:​1-17; Jon 12⁠:​12-16.

Stori 98

Antap Long Hil Blong Ol Oliftri

LONG pija ya, Jisas i stap antap long Hil blong ol Oliftri. Fo man we oli stap wetem hem, hemia fo aposol blong hem. I gat Andru wetem brata blong hem Pita, mo Jemes wetem brata blong hem Jon. Biaen longwe, yu save luk haos blong God long Jerusalem.

Tu dei bifo, Jisas i sidaon long wan yangfala dongki, i raed i go long Jerusalem. Naoia, hem i Tusde, mo long eli moning, Jisas i go long haos blong God. Long ples ya, ol pris oli traem blong holem hem, oli wantem kilim hem i ded. Be oli fraet blong holem Jisas from we ol man oli laekem hem tumas.

Jisas i tok strong long ol lida blong skul ya, i se: ‘!Yufala i olsem snek! !Yufala i olsem pikinini blong snek stret!’ Nao Jisas i talem long olgeta se God bambae i panisim olgeta from ol rabis samting we oli mekem. Afta, Jisas i wokbaot i go antap long Hil blong ol Oliftri. Long ples ya, ol fo aposol ya blong hem oli askem kwestin long hem. ?Yu yu save wanem kwestin?

Ol aposol ya oli askem kwestin long saed blong fiuja. Oli save se Jisas bambae i finisim ol rabis fasin long wol ya. Be oli wantem save wetaem samting ya bambae i hapen. ?Wetaem Jisas bambae i kam King?

Jisas i save se taem hem i kambak bakegen, ol man blong hem long wol ya bambae oli no save luk hem wetem prapa ae blong olgeta. Hemia from we hem i stap long heven, mo ol man long wol ya oli no save luk wan man long heven. Ale, Jisas i talem long ol aposol blong hem, sam samting we bambae oli hapen long wol taem hem i rul olsem King long heven. ?Wanem ol samting ya?

Jisas i talem se bambae i gat ol bigfala faet, plante man bambae oli sik mo hanggri, bambae i gat fulap man blong kilim man mo man blong brekem loa, mo graon bambae i seksek bigwan. Jisas i talem tu se ol man blong hem bambae oli talemaot gud nius blong kingdom blong God long olgeta ples blong wol. ?Yumi luk ol samting ya long taem blong yumi? !Yes! Taswe, naoia yumi save se Jisas i stap rul long heven. I no longtaem, bambae hem i finisim ol rabis fasin long wol ya.

Matiu 21⁠:46; 23⁠:​1-39; 24⁠:​1-14; Mak 13⁠:​3-10.